Ayubu 26

26 ¹Ndipo Ayubu akajibu: ²"Jinsi ulivyomsaidia asiye na nguvu! Jinsi ulivyouokoa mkono usio na uwezo! ³Jinsi ulivyomshauri asiye na hekima, na kumkirimia ufahamu mzuri kwa wingi! ⁴Kwa msaada wa nani umenena maneno haya? Na pumzi ya nani ilitoka kwako? ⁵Roho zilizoondoka hutetemeka—wale walio chini ya maji na wote wakaao humo. ⁶Kaburi liko wazi mbele za Baba yetu, na Uharibifu hauna kifuniko. ⁷Yeye huzitandaza mbingu za kaskazini juu ya nafasi tupu; huiangika dunia juu ya utupu. ⁸Huyafunga maji katika mawingu yake mazito, wala mawingu hayapasuki chini ya uzito wake. ⁹Huufunika uso wa mwezi mpevu, akiyatandaza mawingu yake juu yake. ¹⁰Amechora mviringo juu ya uso wa maji, penye mpaka kati ya nuru na giza. ¹¹Nguzo za mbingu hutetemeka, zikishangaa kwa kukemea kwake. ¹²Kwa nguvu zake aliituliza bahari; kwa ufahamu wake alimponda yule joka la baharini Rahabu. ¹³Kwa pumzi yake mbingu zilikuwa angavu; mkono wake alimchoma yule nyoka akimbiaye. ¹⁴Na haya ni pambizo tu za njia zake—jinsi ilivyo hafifu minong'ono tunayoisikia juu yake! Lakini ngurumo ya nguvu zake, ni nani awezaye kuielewa?"