Ayubu Agĩcookia
Ayubu anyũrũria ũteithio ũrĩa aheetwo, agacooka akarĩmbĩrĩra mũrata wake ũhoro wa hinya wa Ithe witũ gũkĩra we: thĩ yacuurĩtio igũrũ rĩa gũtarĩ kĩndũ, maaĩ makoohererwo matu-inĩ, iria rĩkahoreria, Rahabu agahehenjwo. Na ũguo wothe, oiga, nĩ o mũthia ũtarĩ hinya wa mũhehũ wake.
26 1Naake Ayubu agĩcookia atĩrĩ: 2“Kaĩ nĩũteithĩtie ũrĩa ũtarĩ na hinya-ĩ! Kaĩ nĩũhonoketie guoko kũrĩa gũtarĩ na hinya-ĩ! 3Kaĩ nĩũtaarĩte ũrĩa ũtarĩ na ũũgĩ, na ũkaheana ũmenyo mwega na waingĩ-ĩ! 4Nĩ ũ ũgũteithĩtie kwaria ciugo ici? Naguo mĩhũmũ ya ũ yoimire thĩinĩ waku? 5Maroho ma andũ arĩa akuũ nĩmainainaga—o acio marĩ rungu rwa maaĩ na arĩa oothe matũũraga kuo. 6Mbĩrĩra ĩrĩ njaga mbere ya Ithe witũ, naguo Mwanangĩko ndũrĩ kĩndũ kĩa kũũhumbĩra. 7Aatambũrũkagia igũrũ rĩa mwena wa gathigathini igũrũ rĩa handũ hatarĩ kĩndũ; acuuragia thĩ handũ hatarĩ kĩndũ. 8Oohaga maaĩ thĩinĩ wa matu make maritũ, no matu macio matitũrĩkaga nĩ ũndũ wa ũritũ wamo. 9Aahumbĩraga ũthiũ wa mweri mũrĩ mũiganu, aatambũrũkagia matu make igũrũ rĩaguo. 10Nĩakururĩte gĩthiũrũrĩ igũrũ rĩa ũthiũ wa maaĩ, o mũhakainĩ wa gatagatĩ ka ũtheri na nduma. 11Itugĩ cia igũrũ nĩcinainainaga, igagegearĩra gũkaanio gwake. 12Nĩ ũndũ wa hinya wake nĩahooreretie iria; na nĩ ũndũ wa ũmenyo wake nĩahehenjire nyamũ ĩrĩa nene ya iria ĩĩtagwo Rahabu. 13Nĩ mĩhũmũ yake igũrũ rĩgĩthera; guoko gwake gũgĩtheeca nyoka ĩrĩa ĩroora. 14Na maya no icunjĩ nini cia njĩra ciake—kaĩ ũhoro ũrĩa tũiguaga wake ũrĩ wa heehũ mũnini-ĩ! No ngwa ya hinya wake-rĩ, nũũ ũngĩhota kũmĩmenya?”