Jobu 26

26 ¹Nígbà náà ni Jobu dáhùn pé: ²“Báwo ni ìwọ ṣe ran aláìlágbára lọ́wọ́ tó! Báwo ni ìwọ ṣe gba apá tí kò lókun là tó! ³Báwo ni ìwọ ṣe gba ẹni tí kò lọ́gbọ́n nímọ̀ràn, tí o sì fi òye tí ó yè kooro hàn lọ́pọ̀lọpọ̀ tó! ⁴Pẹ̀lú ìrànlọ́wọ́ ta ni ìwọ fi sọ ọ̀rọ̀ wọ̀nyí? Èémí ta sì ni ó jáde láti ọ̀dọ̀ rẹ? ⁵Àwọn ẹ̀mí òkú ń wárìrì—àwọn tí ó wà nísàlẹ̀ omi àti gbogbo àwọn tí ń gbé inú rẹ̀. ⁶Isà òkú wà ní ìhòhò níwájú Baba wa, Ìparun kò sì ní ìbòrí. ⁷Ó na ojú ọ̀run àríwá bo òfo; ó so ayé rọ̀ sórí òfo. ⁸Ó fi ìkùukùu rẹ̀ tí ó nípọn di omi mọ́, síbẹ̀ ìkùukùu náà kò fàya lábẹ́ ìwúwo wọn. ⁹Ó bo ojú òṣùpá kíkún, ó ta ìkùukùu rẹ̀ bò ó. ¹⁰Ó ti fa ìyíká sórí ojú omi, ní ààlà láàrin ìmọ́lẹ̀ àti òkùnkùn. ¹¹Àwọn ọ̀wọ̀n ọ̀run ń wárìrì, ẹnu sì yà wọ́n sí ìbáwí rẹ̀. ¹²Nípa agbára rẹ̀ ó mú òkun dákẹ́; nípa òye rẹ̀ ó fọ́ Rahabu, ẹranko búburú inú òkun, túútúú. ¹³Nípa èémí rẹ̀ ojú ọ̀run mọ́ kedere; ọwọ́ rẹ̀ gún ejò tí ń sálọ. ¹⁴Ìwọ̀nyí sì jẹ́ etí ọ̀nà rẹ̀ lásán—báwo ni ọ̀rọ̀ kẹ́lẹ́kẹ́lẹ́ tí a gbọ́ nípa rẹ̀ ṣe rẹlẹ̀ tó! Ṣùgbọ́n àrá agbára rẹ̀, ta ni ó lè mòye rẹ̀?”