Ayubi Langzü
Jobi pa nem agüba teyari dang jashidak, anungji pei tenzüker nungi tilaba agi asen Tebu tashi indang jembir: ita teperiba tejak nembang, tzütem mepet temelem nung akhümbang, tzüyim anen, aser Rahab ajensa. Aser itemji ajaki pa indang ola tila ka tatem balala kabosa lir ta pai ashi.
26 1Idangji Ayubi langzü, 2Nai tashi maliba koda yariogo! Tashi mali tepen koda kümzükogo! 3Nai shisatsü maliba dang koda sensak agütsüogo, aser teshisadangba jenti sayuogo! 4Shiba teyari agi nai item o jembiogo? Aser shiba tangu ne nungi adok? 5Tasüba tanelatem atenten—shirnok tzü temelem aliba aser idak aliba ajak. 6Sheol Tebu madang mangsa lir, aser Tesamatsü dak tenembangba mali. 7Pai anüdoklentip anüngtem tazüngla manung atsülangdaktsür; pai alima kecha mali manung zükoktsür. 8Pai tzütem pei mepet temelem nung akhümbangtsür, saka mepettemi iba khuret agi marakpoktsü. 9Pai ita teperiba tejak nembangtsür, pei mepet iba manung satakdaktsür. 10Pai tzüma nung khen ka tatakzükogo, tesangwa o tammang na tsüngda arrtsü nung. 11Anüng tongshitem atenten, pa arürtsüba agi süngmangtsü. 12Pa ain agi pai tzüyim anendaktsü; pa tangatetba agi pai tzüyim shiruru Rahab ajensatsü. 13Pa tangu agi anüngtem tanüdangtsü aküm; pa teka agi ajenba per atsüng. 14Aser itemji pa lenmangtem tatem balala lir—koda tila agi ola ka asenoki pa indang angashir! Saka pa ain tsüngmok, shibai angatetdaktsü?