Job Zaghachiri Okwu
Job kwara emo n'enyemaka e nyere ya, mesịa bụọ abụ karịa enyi ya banyere ike Nna anyị: ụwa a kwụbara n'ihe efu, mmiri e kechiri n'ígwé ojii, oké osimiri e mere ka ọ dị jụụ, Rehab e tipịara etipịa. Ọ sịkwa na ihe ndị a niile bụ naanị nsọtụ nke ịtamụ ntamụ nke olu ya.
26 1Mgbe ahụ, Job zara sị: 2“Lee ka i si nyere onye na-enweghị ike aka! Lee ka i si zọpụta ogwe aka ahụ na-enweghị ume! 3Lee ka i si nye onye na-enweghị amamihe ndụmọdụ, ma kesaakwa nghọta ziri ezi nke ukwuu! 4Site nʼinyeaka onye ka i ji kwuo okwu ndị a? Nkuume onye sikwa nʼime gị pụta? 5Mmụọ ndị nwụrụ anwụ na-ama jijiji—ndị nọ nʼokpuru mmiri na ndị niile bi nʼebe ahụ. 6Ili gba ọtọ nʼihu Nna anyị, Mbibi enwekwaghị ihe mkpuchi. 7Ọ na-agbasa mbara igwe nke ugwu nʼelu oghere efu; ọ na-akwụba ụwa nʼelu ihe efu. 8Ọ na-ekechi mmiri nʼime igwe ojii ya gbara ọkpụrụkpụ, ma igwe ojii ahụ adịghị agbawa nʼokpuru ịdị arọ ha. 9Ọ na-ekpuchi ihu ọnwa ahụ zuru ezu, na-agbasa igwe ojii ya nʼelu ya. 10O serela okirikiri nʼelu ihu mmiri, nʼoke dị nʼetiti ìhè na ọchịchịrị. 11Ogidi niile nke eluigwe na-ama jijiji, na-enwe oke iju anya nʼihi ịba mba ya. 12Site nʼike ya, o mere ka oké osimiri dere jii; site na nghọta ya, ọ kụrisịrị Rahab, anụ ọjọọ nke oké osimiri. 13Site na nkuume ya, eluigwe dịrị ọcha; aka ya mapuru agwọ ahụ na-agba ọsọ. 14Ihe ndị a bụ naanị nsọtụ nke ụzọ ya niile—lee ka mkpọtụ dị nta nke anyị na-anụ banyere ya si dị! Ma egbe eluigwe nke ike ya, onye pụrụ ịghọta ya?”
