Mi eng' bukuit
Bukuit

Kowolji Job

Tiendi Job toreteet ne ki kagoyaachi, yeityo kosiir tupchosyekyik eng' tyendo agobo kimnateetap Kwandanyo: ng'wony ne kilaachi eng' ne ma mi kiy, peek che kiyumi eng' poolik, nyanjet ne kisiis, Rahab ne kitui. Ak tugul chooto, mwaei, ko tuleetap mutyonatet ne po ineendet kityo.

Sura 26.

Kowolji anyun Job, koleenji: Ki itoret ano ne ma tinyei kimnateet! Ki isaru ano euut ne ma tinyei kimnateet! Ki ineet ano ne ma tinyei utaatyet, ak ki iboorun abun naet ne ititaat! Ki itoret ng'oo si imwa ng'aleechu? Ak ki punu koong'ung' kabuusetap ng'oo? Kibotanso saboonwegap che ki pek—icheek che mi kurereetap peek ak che menyei olooto tugul. Tebyei aach ngor Olemi Che ki kobek eng' taitap Kwandanyo, ak ma tinyei ne ilaach Yaityet. Iitoi kipsengwet ne po murot kaataam eng' parak po ole puch; ingosongini ng'wony eng' ne ma mi kiy. Iyumi peek eng' poolikyik che tuuen, ago ma betak poolik eng' weigeenywa. Ilaach taitap arawet ne noo, iitoi poolikyik kobooch. Kagoyai poroindo eng' taitap peek, eng' kiwoteet ne mi kwenutap lapkeiyet ak mesundeito. Kibotanso lumeiywegap kipsengwet, ak kwong'yo eng' kereetap kong'nyi. Isiis nyanjet eng' kimnateennyi; ak eng' naennyi, kotui Rahab tyong'indap nyanjet. Eng' kabuusennyi, koek kipsengwet kotiliil; kitoor eunnyi ndaret ne mwei. Ak tuguuchu ko tabanwegap ortinwekyik kityo— ii ming'in ano tuugeet ne kigasei agobo ineendet! Ago tuleetap kimnateennyi, ng'oo ne imuuchi konai?