इयोब 26 FHB Father's Heart Bible™

26 ¹तब इयोबले जवाफ दिए: ²“शक्तिहीनलाई तिमीले कस्तो सहायता गर्‍यौ! बल नभएको पाखुरालाई कस्तो गरी बचायौ! ³बुद्धि नभएकालाई तिमीले कस्तो सल्लाह दियौ, र प्रशस्त गरी असल ज्ञान बाँड्यौ! ⁴यी वचन तिमीले कसको सहायताले बोल्यौ? अनि तिमीबाट कसको सास निस्क्यो? ⁵मृत आत्माहरू थरथर काम्छन्— पानीमुनि भएका र त्यहाँ बस्ने सबै। ⁶हाम्रा पिताको सामु चिहान नाङ्गै छ, र विनाशको कुनै आवरण छैन। ⁷उहाँले उत्तरी आकाशलाई शून्यमाथि फैलाउनुहुन्छ; उहाँले पृथ्वीलाई केहीमाथि नटेकाई झुन्ड्याउनुहुन्छ। ⁸उहाँले पानीलाई आफ्ना बाक्ला बादलमा बेर्नुहुन्छ, तैपनि त्यसको भारले बादल फुट्दैन। ⁹उहाँले पूर्णिमाको चन्द्रमाको मुहार ढाक्नुहुन्छ, त्यसमाथि आफ्ना बादल फैलाउनुहुन्छ। ¹⁰उहाँले पानीको सतहमा एउटा घेरा कोर्नुभएको छ, ज्योति र अन्धकारको सीमानामा। ¹¹आकाशका खम्बाहरू काम्छन्, उहाँको हप्कीले स्तब्ध हुन्छन्। ¹²उहाँले आफ्नो शक्तिले समुद्रलाई शान्त पार्नुभयो; आफ्नो समझले समुद्री दैत्य राहाबलाई चूरचूर पार्नुभयो। ¹³उहाँको सासले आकाश सफा भयो; उहाँले आफ्नो हातले भाग्दै गरेको सर्पलाई छेड्नुभयो। ¹⁴अनि यी त उहाँका मार्गका बाहिरी छेउ मात्र हुन्— उहाँको विषयमा हामीले सुन्ने फुसफुसाहट कति मधुरो छ! तर उहाँको शक्तिको गर्जन कसले बुझ्न सक्छ?”