ايوب جواب ورکوى
ایوب په هغه مرسته ملنډې وهي چې ورکړل شوې ده، بیا د زموږ د پلار د قدرت په اړه تر خپل ملګري ښه سندره وايي: ځمکه پر هیڅ ځوړنده، اوبه په ورېځو کې غوټه شوې، سمندر ارام شوی، رهب ټوټې ټوټې شوی. او هغه وايي، دا ټول یوازې د هغه د یوې پسپسې کمزورې څنډه ده.
26 1بيا ايوب جواب ورکړو چې، 2”تا بېطاقته سره څومره ښۀ مدد وکړو! تا هغه بازو چې هيڅ زور نۀ لرى څومره ښۀ وساتله! 3تا هغه چا ته چې هيڅ حکمت نۀ لرى څومره ښۀ مشوره ورکړه، او ښۀ سمجهه دې په فراخۍ سره ونوموله! 4دا خبرې دې د چا په مدد سره ووئيلې؟ او د چا ساه ستا نه راووتله؟ 5د مړو روحونه رپيږى، هغه چې د اوبو لاندې دى او ټول هغه چې هلته اوسيږى. 6قبر د زمونږ پلار په مخکښې بربنډ پروت دے، او هلاکت هيڅ پوښ نۀ لرى. 7هغه د شمال آسمانونه په تش ځائ باندې غځوى، هغه زمکه په هيڅ شى باندې ځوړندوى. 8هغه اوبۀ په خپلو ګنو ورېځو کښې تړى، خو ورېځې د دې وزن لاندې نۀ چوى. 9هغه د بشپړ سپوږمۍ مخ پټوى، او خپلې ورېځې پرې خوروى. 10هغه د اوبو په مخ باندې يوه کړۍ راکښلې ده، د رڼا او تيارې په پوله باندې. 11د آسمانونو ستنې رپيږى، د هغۀ په جهړکى حېران دى. 12هغۀ په خپل طاقت سره سمندر ارام کړو، هغۀ په خپل عقل سره د سمندر هغه ښاپېرے رهب ټوټې ټوټې کړو. 13د هغۀ په ساه سره آسمانونه صاف شول، د هغۀ لاس هغه تښتېدونکے مار وويشتو. 14او دا خو يواځې د هغۀ د لارو غاړې دى، مونږ د هغۀ په حقله څومره کمزورے پسېکار اورو! خو د هغۀ د طاقت تندر، څوک يې سمجهه کولے شى؟“
