ايُوب 27 FHB Father's Heart Bible™

27 ¹اَيوب بيا خپله خبره شروع کړه او ووئيل چې، ²”قسم په ژوندى خُدائ پاک چې زما اِنصاف يې اخستے دے، او په قادرِ مُطلق چې زما روح يې تريخ کړے دے، ³تر څو چې زما ساه په ما کښې وى، او د زمونږ پلار روح زما په پزه کښې وى، ⁴زما شونډې به دروغ ونۀ وائى، او زما ژبه به فريب ونۀ وائى. ⁵زۀ به هيچرې دا ونۀ منم چې تاسو حق پۀ خوا يئ؛ تر مرګه به زۀ خپله راستى نۀ پرېږدم. ⁶زۀ خپل صداقت ټينګ نيسم او نۀ يې پرېږدم؛ زما زړۀ ما ته د خپلو هيڅ ورځو دپاره ملامتى نۀ راکوى.

⁷”زما دښمن دې د بدکارو په شان وى، او څوک چې زما خلاف راپاڅى هغه دې د ناصادقو په شان وى. ⁸ځکه چې کله بې‌دينه ووهل شى نو د هغۀ اُميد څۀ وى، کله چې خُدائ پاک د هغۀ ژوند واخلى؟ ⁹آيا کله چې پرې مصيبت راشى، نو خُدائ پاک به د هغۀ چغه واورى؟ ¹⁰آيا هغه به په قادرِ مُطلق خوشحاله شى؟ آيا هغه به هر وخت خُدائ پاک رابلى؟ ¹¹زۀ به تاسو ته د خُدائ پاک د لاس په حقله ښوونه کوم؛ څۀ چې د قادرِ مُطلق سره دى هغه به زۀ نۀ پټوم. ¹²ګوره، تاسو ټولو دا پخپله ليدلى دى؛ نو بيا تاسو داسې بې‌کاره خبرې ولې کوئ؟ ¹³د خُدائ پاک له طرفه د بدکار سړى برخه دا ده، هغه ميراث چې ظالمان يې د قادرِ مُطلق نه مومى: ¹⁴کۀ د هغۀ بچى ډېر وى، نو هغوئ به په تُوره ووهلى شى، او د هغۀ اولاد ته به ډوډۍ بس نۀ شى. ¹⁵د هغۀ هغه کسان چې تر هغۀ وروستو ژوندى پاتې شى، هغوئ به په وبا ښخ کړى شى، او د هغوئ کونډې به ژړا نۀ کوى. ¹⁶اګر کۀ هغه د دوړو په شان سپين زر راغونډوى، او د خټو په شان جامې ور په ور کوى، ¹⁷هغه دې يې ور په ور کوى، خو صادق به يې اغوندى، او بې‌ګناه به سپين زر وېشى. ¹⁸هغه خپل کور د زاله د ځالې په شان جوړوى، د هغه جونګړې په شان چې چوکيدار يې جوړوى. ¹⁹هغه مالدار پرېوځى، خو بيا به داسې نۀ کوى؛ هغه خپلې سترګې غړوى، او هيڅ نۀ وى. ²⁰وېرې د سېلاب په شان پرې راځى؛ د شپې يې بوړبوکۍ وړى. ²¹د ختيځ باد يې اوچتوى او هغه ځى؛ هغه د خپل ځائ نه وباسى. ²²هغه ځان پرې بې‌رحمه ګذار کوى؛ هغه د هغۀ د طاقت نه په سر ور ورتښتى. ²³هغه پرې لاسونه ټکوى او د هغۀ د ځائ نه يې په شڼ شڼ شړى.“