Job aru ekbar tar awaj uthaise
Jun Isor tai laga nyay loi loise, Ttai laga nam loi kosom khaikena, Iyob tai laga sathi khan thik ase koi mani lobole mana kore; tai mora tak nijor laga sidha-pon dhori thakibo. Tai pichete tai nijor pora biya manuh laga bhag koi: joma kora chandi dharmik manuh khan pindhibo, rati laga ghurni-batah, makra-jal laga ghor.
27 1Aru Job pora aru ekbar tar kotha uthai loi kene koise: 2“Jivit Isor laga kosom, kun pora moi laga nyay hatai loise, aru Sorbo-Shaktiman laga kosom, kun pora moi laga jibon tita kori dise, 3jiman tak moi laga saas moi logot te ase, aru amar Pitri laga Atma moi laga nak te ase, 4moi laga oth pora misa kotha nakobo, aru moi laga jiba pora thogai laga kotha nakobo. 5Tumikhan thik ase eneka moi kitia bhi namanibo; moi namora tak moi laga imandari ke nachari dibo. 6Moi laga dharmikota ke moi dhori rakhise aru eitu ke nachari dibo; moi laga jibon bhor moi laga mon pora moi ke golti nadiye.
7“Moi laga dushman tu paapi manuh nisina hobi, aru kun moi laga birodh te uthe, hei adharmik nisina hobi. 8Kilemane Isor-ke namana manuh ke kati phelai dile, tar laga asha ki hobo, jitia Isor pora tar jibon hatai loi? 9Isor pora tar hala-kanda hunibo naki, jitia tar uporte bipod ahe? 10Tai Sorbo-Shaktiman te khushi pabo naki? Tai hodai somoi te Isor ke matibo naki? 11Moi tumikhan ke Isor laga hath laga kotha sikhai dibo; Sorbo-Shaktiman logote ki ase, eitu moi nalukabo. 12Sabi, tumikhan sob nijor pora eitu dekhise; tenehole kele tumikhan eneka khali kotha kobe? 13Eitu ase paapi manuh laga bhag Isor pora, aru joborjosti kora khan pora Sorbo-Shaktiman pora pa-a adhikar eneka ase: 14Jodi tar bacha khan bisi ase, tarkhan tolwar pora moribo, aru tar bongsho khan pora kha-bole pet-bhorta roti napabo. 15Tar pichete bachi thaka khan ke mohamari pora kobor dibo, aru taikhan laga bidhowa khan nakandibo. 16Jodiu tai dhuli nisina chandi joma kore aru mati nisina kapor khan joma kori rakhe, 17tai joma kori bo pare, kintu dharmik manuh pora eitu pindhibo, aru nirdosi manuh pora chandi ke bhag kori lobo. 18Tai tar ghor poka laga baah nisina bonai, chowkidar pora bona kuri-ghor nisina. 19Tai dhoni hoi kene ghumai jai, kintu aru eneka nahobo; tai suku khuli diye, aru sob harai jaise. 20Bhoi khan baan-pani nisina tar uporte girise; rati te dangor andhi pora tai ke urai loi jai. 21Purbo phale laga batah pora tai ke uthai loi jai aru tai harai jai; eitu pora tai ke tar jagah pora urai phelai. 22Eitu bina doya pora tar uporte giri pore; tai eitu laga takot pora polabole kosis kore. 23Eitu tar phale taali mari diye aru tai ke tar jagah pora hush-hush kori khedai diye.”