Yobe Alonga Pontho
Mbalumbira na Mulungu ene adabula cilungamo cace, Yobe asakhonda kubvuma kuti axamwali ace ali na cilungamo; iye anadzaphatisisa kukhulupirika kwace mpaka anafa. Buluka penepo iye ekha asalonga gawo la munthu wakuipa: prata yakuunjikwa yakubvalwa na anyakulungama, kanyamweyamwe wa usiku, nyumba ya nthandaudzi.
27 1Na tenepo Yobe apitiriza pontho kulonga kwace, mbalonga tenepa: 2“Mulungu ali maso, ule adakwata cilungamo canga, na Wamphambvu Zonsene, ule acitisa moyo wanga kuwawa, 3mu ndzidzi onsene kupuma kwanga kuciri mwanga, na Nzimu wa Baba wathu uli m'phuno mwanga, 4milomo yanga nkhabe kulonga uthambi, na lirimi yanga nkhabe kulonga cinyengo. 5Nkhabe kudzatawira cipo kuti imwe ndimwe akulungama; mpaka ndife nkhabe kusiya undimo wanga. 6Ndaphata mwamphambvu kulungama kwanga, nee ndinasiya kweneko; ntima wanga nkhabe kundipasa mulando mu ntsiku zonsene za umaso wanga.
7“Nyamalwa wanga mbakhale ninga anthu akuipa, na ule anandimukira mbakhale ninga wakukhonda kulungama. 8Thangwi ndi cidikhiro canji ca munthu wakukhonda kuopa Mulungu, angamalisidwa, Mulungu angakwata umaso wace? 9Kodi Mulungu anadzabva kulira kwace, nyatwa ingamugwera? 10Kodi iye anadzakomerwa na Wamphambvu Zonsene? Kodi anadzacemera Mulungu mu midzidzi yonsene? 11Ndinakupfundzisani pya djanja ya Mulungu; nee ndinabisa pinthu piri na Wamphambvu Zonsene. 12Onani, imwe monsene mwapiona pyenepi na maso anu; ninji thangwi yace musalonga mafala akusowa basa tenepa? 13Uyu ndi mugawo wa munthu wakuipa unaupaswa na Mulungu, unthaka unatambira anyakutambudza kwa Wamphambvu Zonsene: 14Anace angakhala azinji, anadzaphiwa na supada, na ana a ana ace nee anadzakhuta nkate. 15Ale anadzasala naye anadzaikhwa na utenda, na akazi awo adafedwa nkhabe kudzalira. 16Maseze angaunjika parata ninga pfumbi mbaunjika nguwo ninga matope, 17iye anakwanisa kuunjika, mbwenye wakulungama anadzabvala pyenepyo, na wakusowa mulando anadzagawa parata. 18Iye asamanga nyumba yace ninga nyumba ya cidzedze, ninga kanyumba inamanga nyakuonera. 19Iye asagona ali wakupfuma, mbwenye nkhabe kudzacitambo tenepo pontho; angafungula maso ace, pyonsene pyamala kale. 20Pinthu pyakugopswa pisamphata ninga cigumukira ca madzi; namasiku, conzi cisamkwata mbacienda naye. 21Mphepo ya kumabulukiro a dzuwa isamkwata, iye mbaenda; isamkukula buluka pa mbuto yace. 22Isamuponyera yokha mwakusowa ntsisi; iye asathawa mwakucimbiza buluka pa mphambvu zace. 23Isamwombera manja iye, mbaimphunyira toera abuluke pa mbuto yace.”
