UYobi Uphakamisa Ilizwi Lakhe Kwakhona

Efunga ngaye kanye uThixo osusileyo ubulungisa bakhe, uYobhi wala ukuvuma ukuba abahlobo bakhe balungile; uya kuyibambelela ingqibelelo yakhe ade afe. Aze achaze ngokwakhe isabelo sendoda engendawo: isilivere efunjelweyo evathwa ngamalungisa, isaqhwithi sasebusuku, nendlu yobulembu besigcawu.

Isahluko 27.

UYobi waphinda wasusela ngentetho yakhe, wathi: Ehleli nje uThixo osusileyo ubulungisa bam, noSomandla owenze umphefumlo wam wakrakra, lo gama impefumlo yam isekum, noMoya kaBawo wethu usemathatheni am, imilebe yam ayiyi kuthetha buxoki, nolwimi lwam alusayi kuthetha nkohliso. Andisayi kuze ndivume ukuba nilungisile; ndide ndife, andisayi kuyilahla ingqibelelo yam. Ndibambe ngokuqinileyo ubulungisa bam, andisayi kubulahla; intliziyo yam ayindigxeki ngayo nanye imihla yam.

Utshaba lwam malube njengongendawo, lowo undivukelayo abe njengomntu ongenabulungisa. Kaloku yintoni na ithemba longenaThixo xa enqunyulwa, xa uThixo ewususa umphefumlo wakhe? Uya kuva na uThixo isikhalo sakhe xa ifikile kuye inkxwaleko? Uya kuziyolisa na ngoSomandla? Uya kumbiza na uThixo ngamaxesha onke? Ndiya kunifundisa ngesandla sikaThixo; andiyi kukufihla oko kukuSomandla. Khangelani, nani nonke nikubonile oku ngokwenu; yini na ke ukuba nithethe amazwi alilize kangaka? Sesi isabelo somntu ongendawo esivela kuThixo, ilifa abalamkela kuSomandla abacinezeli: Ukuba abantwana bakhe baninzi, baya kuwa likrele, nenzala yakhe iya kuswela isonka. Abasinda kuye baya kungcwatywa sisibetho, nabahlolokazi babo abayi kulila. Nakuba efumba isilivere njengothuli, efumba iingubo njengodongwe, angayifumba, kodwa ilungisa liya kuyambatha, nomsulwa aya kwaba isilivere. Uyakha indlu yakhe njengendlwana yenundu, njengephempe elenziwa ngumlindi. Ulala esisityebi, kodwa akayi kuphinda abe njalo; uvula amehlo akhe, kungabikho nto. Izothuso zimfumana njengonogumbe; ebusuku umoya ovuthuzayo uyamthabatha emke. Umoya wasempumalanga uyamfukula, emke; uyamkhupha endaweni yakhe. Uzijula kuye ungenanceba; ubaleke ngobungxamo, esaba emandleni awo. Uyazibethela izandla zawo kuye, uyamncinca emke endaweni yakhe.