Koeeti Job tweguunennyi kogeny
Kayasyo Job eng' Kamuktaindet, ne kagonam kirwooget ne po iman eng' ineendet, ago eesyoi komwa kole po iman chorwennyi; riibei imandanyi agoi komee. Yeityo komwa ineegei kebebertap chii ne ya: fedha ne kagoyumyum ne laach che po imanda, kipchurchuryet ne po kemeut, ak koot ne teechi ko uu usweet.
27 1Ki tes Job kogeny komwa kalewenennyi, kole: 2“Ko uu ye sabei Kamuktaindet, ne kagonam mugetuutinyu, ak Ne po Kamuktaet, ne kagong'woneen saboondanyu, 3koigeny ye mi kabuusennyu eng' aneendet, ak mi Kabuusetap Kwandanyo eng' seruunekyik, 4ma komwa kutinnyu lembech, ak ma komwa ng'elyeptanyu keniisyet. 5Ma achame kole po iman okweek agoi; agoi ye ameet ma abagaakte lititnyu. 6Anamegei ak imandanyu ak ma abagaakte; ma arosyin muguleldanyu agobo peetuusyekyuk age tugul.
7“Ingoek punyondennyu ko uu kiptengeginik, ak ingoek ineendet ne ng'eetei konaata ko uu ne ma po imanda. 8Amu nee amang'unetap chii ne ma po Kamuktaindet ye kitil, ye konam Kamuktaindet saboondanyi? 9Tos kogas Kamuktaindet kuurennyi ye konyo ng'oiyondit ineendet? 10Tos koboiboitu ineendet Ne po Kamuktaet? Tos koguure Kamuktaindet sait age tugul? 11Aneetook agobo eutap Kamuktaindet; ma auny ne mi ak Ne po Kamuktaet. 12Ogeero, kagogeer okweek tugul niito; amu nee anyun si omwa ng'aleek che puch? 13Ni kebebertap chii ne yaacheen ne punu Kamuktaindet, poroteet ne taachei usiik eng' Ne po Kamuktaet: 14Ngot ko chaang' lagokyik, ko tuun meei rotweet, ak ma konyoor orgeekyik amitwogik che yamei. 15Che sabei eng' ineendet, ko tuun kitup eng' koroyooto, ak ma koriir mosoogikwak. 16Agot ngo iyum fedha ko uu temburyek, ak koyumat ngoroik ko uu ng'ung'unyek, 17Imuuchi koyumat, ago ilaach ineendet ne po imanda, ak kopchei ineendet ne ma tinyei yaityo fedha. 18Koteechei koonnyi ko uu kootap biot, ko uu koriit ne yaei riibindet. 19Karu ko mogoryot, ago ma koyai nooto kogeny; koyaat konyekyik, ak kobetito. 20Ityin kamuisosyek ineendet ko uu maraneet, eng' keemeet koip kipchurchuryet ineendet. 21Koeeti usoonet ne punu kong'asiis ineendet ak kobetito, ak koresyo komang'une oldanyi. 22Kowiirtoegei ineendet ama tinyei rireenet; komwei iman komang'une kimnateennyi. 23Koring'chi eunekyik agobo ineendet ak kosirsirchi komang'une oldanyi.”