اَیّوب 27 FHB Father's Heart Bible™

27 ¹ایّوب گئنه اؤز صؤحبتئنه باشلاییب ددی: ²«حاقّیمی الئمدن آلان، وار اولان تارییا، و جانیمی آجی ادن قادئری‌موطلقا آند اولسون، ³نَفَسئم منده اولدوقجا، و آتامیزین روحو بورنومدا اولدوقجا، ⁴دوداقلاریم یالان دانیشماز، و دئلئم ده حئیله سؤیله‌مز. ⁵هچ واخت سئزه حاق وئرمه‌رم؛ اؤلَنه قدر اؤز دوغرولوغومدان ال چکمه‌رم. ⁶اؤز صالحلئیئمه باغلی قالیب اونو بوراخمارام؛ اوره‌یئم عؤمروم بویو منی قینامیر.

⁷«قوی دوشمنئم پئس آدام کئمی اولسون، و منه قارشی قالخان، حاقسیز آدام کئمی اولسون. ⁸چونکی تاریسیز آدامین اومئدی ندئر، او محو اولاندا، تاری اونون جانینی آلاندا؟ ⁹مگر تاری اونون فغانینی اِشئدَر، اوستونه دارلیق گلنده؟ ¹⁰مگر قادئری‌موطلقدا کف ادر؟ مگر هر واخت تارینی چاغیرار؟ ¹¹سئزه تارینین الی حاقّیندا اؤیرَده‌جیم؛ قادئری‌موطلقدا اولانی گئزلتمه‌رم. ¹²باخین، هامینیز اؤزونوز بونو گؤروبسونوز؛ بس نئیه بله بوش سؤزلر دانیشیرسینیز؟ ¹³بو، پئس آدامین تاریدان آلدیغی پای، ظالئملرئن قادئری‌موطلقدان آلدیغی مئراثدیر: ¹⁴اگر اؤولادلاری چوخ اولسا، قیلینجدان کچه‌جکلر، و نسلی دویونجا چؤرک تاپمایاجاق. ¹⁵اوندان صاغ قالانلاری وبا دفن اده‌جک، و اونلارین دول‌لاری آغلامایاجاق. ¹⁶گرچی گوموشو توز کئمی ییغسا، و پالتاری گئل کئمی قالاق-قالاق ائتسه، ¹⁷او ییغار، آمّا اونو صالح آدام گییه‌جک، و گوموشو معصوم آدام بؤله‌جک. ¹⁸اِوئنی گوه یوواسی کئمی، نؤوبتچئنئن قوردوغو کومه کئمی تئکر. ¹⁹وارلی یاتار، آمّا بئر داها بله اولماز؛ گؤزلرئنی آچار، و هر شی یوخ اولار. ²⁰زَهملر سل کئمی اونو توتار؛ گجه فیرلانان یِل اونو سووورار. ²¹شرق کوله‌یی اونو قالدیرار و او یوخ اولار؛ اونو اؤز یرئندن سووورار. ²²رحم اتمه‌دن اونا هوجوم ادر؛ او، اونون الئندن باش گؤتوروب قاچار. ²³اونا ال چالار و اونو ایسلیقلا اؤز یرئندن قووار.»