Job 28

28 ¹“Sa pagkatinuod adunay minahan alang sa plata, ug dapit diin ginalunsay ang bulawan. ²Ang puthaw ginakuha gikan sa abog, ug ang tumbaga ginatunaw gikan sa bato. ³Ang tawo nagbutang ug utlanan sa kangitngit; gipangita niya hangtod sa kinalayoan ang mineral diha sa kadulom ug sa lawom nga landong. ⁴Nagkalot siya ug lalom nga bangag halayo sa gipuy-an sa mga tawo, sa mga dapit diin walay tiil nga nakalakaw sukad; didto nagbitay sila ug nagtabyog, halayo gikan sa bisan kinsa. ⁵Ang yuta—gikan niini nagatubo ang pagkaon, apan ang ilalom niini daw giukay pinaagi sa kalayo. ⁶Ang mga bato niini nagbaton ug mga sapiro, ug ang abog niini nagbaton ug bulawan. ⁷Kini maoy agianan nga wala mailhi sa manunukob nga langgam, nga wala gayod makita sa mata sa banog. ⁸Ang mapahitas-ong mga mananap wala makatunob niini, ni makaagi ang liyon sa ibabaw niini. ⁹Ginabutang sa tawo ang iyang kamot sa gahi nga bato ug ginalintuwad niya ang mga bukid gikan sa ilang gamot. ¹⁰Nagbugha siya ug mga kanal latas sa mga bato, ug nakita sa iyang mata ang matag bililhong butang. ¹¹Ginapugngan niya ang nagtulo nga mga sapa, ug ginadala niya sa kahayag ang mga tinagong butang.

¹²“Apan ang kaalam—asa man kini makaplagan? Ug hain man ang dapit sa pagsabot? ¹³Wala masayod ang tawo sa bili niini, ug dili kini makaplagan sa yuta sa mga buhi. ¹⁴Ang kahiladman miingon, ‘Wala kini kanako,’ ug ang dagat miingon, ‘Wala kini uban kanako.’ ¹⁵Dili kini mapalit sa labing lunsay nga bulawan, ni matimbang ang bili niini pinaagi sa plata. ¹⁶Dili kini kabayran sa bulawan sa Ofir, sa bililhong onix o sapiro. ¹⁷Ang bulawan ug kristal dili makatupong niini, ni mabaylo kini sa mga sudlanan nga lunsay nga bulawan. ¹⁸Ang koral ug kristal dili takos hisgotan; ang bili sa kaalam labaw pa sa mga rubi. ¹⁹Ang topasyo sa Cus dili makatupong niini, ni kini kabayran sa lunsay nga bulawan.

²⁰“Busa, asa man gikan ang kaalam? Ug hain man ang dapit sa pagsabot? ²¹Natago kini gikan sa mga mata sa tanang buhi, gililong bisan gikan sa mga langgam sa kalangitan. ²²Ang Kalaglagan ug ang Kamatayon miingon, ‘Pinaagi sa among mga dalunggan nadungog namo ang balita mahitungod niini.’

²³“Ang Dios nakasabot sa dalan paingon niini, ug nasayod siya sa dapit niini. ²⁴Kay nagatan-aw siya sa mga kinatumyan sa yuta ug nakita niya ang tanan nga anaa sa ilalom sa kalangitan. ²⁵Sa dihang gihatagan niya ang hangin sa gibug-aton niini ug gisukod niya ang mga tubig, ²⁶sa dihang naghimo siya ug sugo alang sa ulan ug usa ka agianan alang sa kilat, ²⁷nan nakita niya ang kaalam ug gipahayag kini; gitukod niya kini ug gisusi pag-ayo.

²⁸Ug miingon siya sa katawhan, ‘Ang pagkahadlok sa Dios—mao kana ang kaalam, ug ang pagbiya sa daotan mao ang pagsabot.’”