Ayubu 28

28 ¹"Hakika kuna machimbo ya fedha, na mahali ambapo dhahabu husafishwa. ²Chuma hutolewa katika mavumbi, na shaba huyeyushwa kutoka jiwe. ³Mwanadamu huweka mpaka kwa giza; hutafuta hadi mwisho kabisa madini yaliyo katika utusitusi na kivuli kizito. ⁴Huchimba shimo refu mbali na wanapoishi watu, mahali ambapo hakuna mguu uliowahi kukanyaga; huko wao huning'inia na kuyumbayumba, mbali na mtu yeyote. ⁵Nchi—kutoka kwake hutoka chakula, lakini chini yake hupinduliwa kama kwa moto. ⁶Mawe yake yana yakuti samawi, na mavumbi yake yana dhahabu. ⁷Ni njia ambayo hakuna ndege mwindaji aijuaye, ambayo jicho la kipanga halijawahi kuiona. ⁸Wanyama wenye kiburi hawajaikanyaga, wala simba hajapita juu yake akiwinda. ⁹Mwanadamu huweka mkono wake kwenye jiwe gumu na kuzipindua milima kwenye mizizi yake. ¹⁰Huchonga mifereji katika miamba, na jicho lake huona kila kitu cha thamani. ¹¹Huyazuia maji yatiririkayo, na kuvitoa vitu vilivyofichwa nuruni.

¹²"Lakini hekima—yaweza kupatikana wapi? Na mahali pa ufahamu pako wapi? ¹³Mwanadamu haijui thamani yake, wala haipatikani katika nchi ya walio hai. ¹⁴Vilindi husema, 'Haiko ndani yangu,' na bahari husema, 'Haiko kwangu.' ¹⁵Haiwezi kununuliwa kwa dhahabu iliyo bora, wala bei yake haiwezi kupimwa kwa fedha. ¹⁶Haiwezi kuthaminiwa kwa dhahabu ya Ofiri, kwa akiki ya thamani au yakuti samawi. ¹⁷Dhahabu na kioo haviwezi kulingana nayo, wala haiwezi kubadilishwa kwa vyombo vya dhahabu safi. ¹⁸Marijani na kioo havistahili kutajwa; bei ya hekima huzidi lulu. ¹⁹Yakuti manjano ya Kushi haiwezi kulingana nayo, wala haiwezi kuthaminiwa kwa dhahabu safi.

²⁰"Basi, hekima hutoka wapi? Na mahali pa ufahamu pako wapi? ²¹Imefichwa mbali na macho ya vyote vilivyo hai, imesitirika hata kwa ndege wa angani. ²²Uharibifu na Mauti husema, 'Kwa masikio yetu tumesikia uvumi wake.'

²³"Mungu anaifahamu njia yake, naye anapajua mahali pake. ²⁴Kwa maana yeye huangalia hadi miisho ya dunia na kuona kila kitu kilicho chini ya mbingu. ²⁵Alipoupa upepo uzito wake na kuyapima maji, ²⁶alipoiwekea mvua amri na njia kwa radi ya ngurumo, ²⁷ndipo alipoiona hekima na kuitangaza; aliithibitisha na kuichunguza.

²⁸Naye akawaambia wanadamu, 'Kumcha Mungu—hiyo ndiyo hekima, na kujiepusha na uovu ndio ufahamu.'"