ኢዮብ 28

28 ¹“ለብር ማዕድን ማውጫ፣ ወርቅም የሚነጥርበት ስፍራ በእርግጥ አለ። ²ብረት ከዐፈር ይወጣል፤ መዳብም ከዐለት ይቀልጣል። ³ሰው ለጨለማ ድንበር ያበጃል፤ በጭጋግና በጥልቅ ጥላ ውስጥ ያለውን ማዕድን እስከ መጨረሻው ዳርቻ ድረስ ይፈልጋል። ⁴ሰዎች ከሚኖሩበት ሩቅ፣ እግር ረግጦት በማያውቅ ስፍራ የማዕድን ጒድጓድ ይቈፍራል፤ በዚያም ከማንም ሰው ርቀው ተንጠልጥለው ይወዛወዛሉ። ⁵ምድር — ከእርሷ ምግብ ይገኛል፤ ከበታችዋ ግን በእሳት እንደ ተገለበጠ ይሆናል። ⁶ዐለቶቿ ሰንፔር ይይዛሉ፤ ዐፈሯም ወርቅ ይዟል። ⁷ይህ ዐዳኝ ወፍ የማያውቀው፣ የጭልፊትም ዐይን አይቶት የማያውቀው መንገድ ነው። ⁸ትዕቢተኛ አራዊት አልረገጡትም፤ አንበሳም በእርሱ ላይ አልተንጎማለለም። ⁹ሰው እጁን ወደ ጠጣር ዐለት ይዘረጋል፤ ተራሮችንም ከሥራቸው ይገለብጣል። ¹⁰በዐለቶች ውስጥ መተላለፊያዎችን ይቈርጣል፤ ዐይኑም እጅግ የከበረውን ነገር ሁሉ ያያል። ¹¹የሚንጠባጠቡትን ምንጮች ይገድባል፤ የተሰወሩትንም ነገሮች ወደ ብርሃን ያወጣል።

¹²“ጥበብ ግን የት ትገኛለች? የማስተዋልስ ስፍራ የት ነው? ¹³ሰው ዋጋዋን አያውቅም፤ በሕያዋን ምድርም አትገኝም። ¹⁴ጥልቁ፣ ‘በእኔ ውስጥ የለችም’ ይላል፤ ባሕሩም፣ ‘ከእኔ ዘንድ የለችም’ ይላል። ¹⁵በጥሩ ወርቅ ልትገዛ አትችልም፤ ዋጋዋም በብር ሊመዘን አይችልም። ¹⁶በኦፊር ወርቅ ዋጋዋ ሊተመን አይችልም፤ በከበረ መረግድ ወይም በሰንፔርም አይሆንም። ¹⁷ወርቅና ብርሌ ሊተካከሏት አይችሉም፤ በጥሩ ወርቅ ዕቃዎችም ልትለወጥ አትችልም። ¹⁸ኮራልና ብርሌ ሊጠቀሱ አይገባም፤ የጥበብ ዋጋ ከሩቢ ይበልጣል። ¹⁹የኵሽ ቶጳዝዮን ሊተካከላት አይችልም፤ በጥሩ ወርቅም ዋጋዋ ሊተመን አይችልም።

²⁰“እንግዲህ ጥበብ ከወዴት ትመጣለች? የማስተዋልስ ስፍራ የት ነው? ²¹ከሕያዋን ሁሉ ዐይን ተሰውራለች፤ ከሰማይ ወፎችም እንኳ ተደብቃለች። ²²ጥፋትና ሞት እንዲህ ይላሉ፤ ‘ዝናዋን በጆሮዋችን ሰምተናል።’

²³“እግዚአብሔር ወደ እርሷ የሚወስደውን መንገድ ያስተውላል፤ ስፍራዋንም ያውቃል። ²⁴እርሱ እስከ ምድር ዳርቻ ድረስ ይመለከታልና፤ ከሰማያት በታች ያለውንም ሁሉ ያያል። ²⁵ለነፋስ ክብደቱን ሲሰጥ፣ ውኆችንም በመስፈሪያ ሲለካ፣ ²⁶ለዝናብ ሥርዐት ሲሠራ፣ ለመብረቅም መንገድ ሲያበጅ፣ ²⁷ያን ጊዜ ጥበብን አይቶ ተናገራት፤ አጸናትም፤ መረመራትም።

²⁸ለሰው ልጆችም እንዲህ አለ፤ ‘እግዚአብሔርን መፍራት፣ ጥበብ ያ ነው፤ ከክፋትም መራቅ ማስተዋል ነው።’”