யோபு 28

28 ¹"நிச்சயமாக வெள்ளிக்கு ஒரு சுரங்கம் உண்டு, பொன் புடமிடப்படும் இடமும் உண்டு. ²இரும்பு மண்ணிலிருந்து எடுக்கப்படுகிறது, செம்பு கல்லிலிருந்து உருக்கி எடுக்கப்படுகிறது. ³மனிதன் இருளுக்கு எல்லை வைக்கிறான்; இருள்சூழ்ந்த காரிருள் நிறைந்த இடங்களில் தாதுவைத் தேடி மிக ஆழத்திற்குச் சென்று தோண்டுகிறான். ⁴அவன் ஒரு குழியை ஆழமாய்த் தோண்டுகிறான், மனிதர் வாழும் இடத்திற்கு வெகுதூரத்தில், ஒரு கால்கூட நடந்திராத இடங்களில்; அங்கே அவர்கள் யாருமற்ற இடத்தில் வெகுதூரத்தில் தொங்கி அசைந்தாடுகிறார்கள். ⁵பூமி—அதிலிருந்து உணவு விளைகிறது, ஆனால் அதன் அடிப்பாகமோ நெருப்பினால் என்பதுபோல் புரட்டப்படுகிறது. ⁶அதன் கற்கள் நீலரத்தினங்களைக் கொண்டிருக்கின்றன, அதன் மண்ணில் பொன் உண்டு. ⁷அது ஒரு பாதை, எந்தக் கழுகும் அறியாதது, வல்லூறின் கண்ணும் என்றும் கண்டிராத ஒன்று. ⁸கர்வமுள்ள மிருகங்கள் அதில் மிதித்ததில்லை, சிங்கமும் அதன்மேல் நடமாடியதில்லை. ⁹மனிதன் தன் கையை கடினமான பாறையின்மேல் வைத்து, மலைகளை வேரோடு புரட்டிப்போடுகிறான். ¹⁰அவன் பாறைகளுக்குள் வழிகளை வெட்டுகிறான், அவனுடைய கண் விலையேறப்பெற்ற ஒவ்வொன்றையும் காண்கிறது. ¹¹அவன் வடிந்தோடும் நீரோடைகளைத் தடுத்து நிறுத்தி, மறைவானவற்றை வெளிச்சத்திற்குக் கொண்டுவருகிறான்.

¹²"ஆனால் ஞானம்—அது எங்கே காணப்படும்? புத்தியின் இடம் எங்கே இருக்கிறது? ¹³அதன் மதிப்பை மனிதன் அறியான், ஜீவனுள்ளோரின் தேசத்திலும் அது காணப்படுவதில்லை. ¹⁴ஆழம், ‘அது என்னில் இல்லை’ என்கிறது, சமுத்திரமும், ‘அது என்னிடத்தில் இல்லை’ என்கிறது. ¹⁵மேன்மையான பொன்னைக் கொடுத்தும் அதை வாங்கமுடியாது, அதன் விலையை வெள்ளியால் நிறுத்துக் கொடுக்கவும் முடியாது. ¹⁶ஓப்பீரின் பொன்னால் அதன் மதிப்பை மதிக்கமுடியாது, விலையேறப்பெற்ற கோமேதகத்தாலோ நீலரத்தினத்தாலோ மதிக்கமுடியாது. ¹⁷பொன்னும் பளிங்கும் அதற்கு நிகராகா, சுத்தப் பொன்னின் பாத்திரங்களுக்காகவும் அதை மாற்றிக்கொள்ளமுடியாது. ¹⁸பவளத்தையும் பளிங்கையும் குறிப்பிடத் தேவையில்லை; ஞானத்தின் விலை மாணிக்கங்களைவிட மேலானது. ¹⁹கூஷ் தேசத்துப் புஷ்பராகம் அதற்கு நிகராகா, சுத்தப் பொன்னாலும் அதை மதிக்கமுடியாது.

²⁰"அப்படியானால், ஞானம் எங்கிருந்து வருகிறது? புத்தியின் இடம் எங்கே இருக்கிறது? ²¹அது ஜீவனுள்ள யாவரின் கண்களுக்கும் மறைவாயிருக்கிறது, ஆகாயத்துப் பறவைகளுக்கும் அது மறைக்கப்பட்டிருக்கிறது. ²²அழிவும் மரணமும் சொல்லுகின்றன, ‘அதைப்பற்றிய ஒரு செய்தியை எங்கள் காதுகளால் கேட்டோம்.’

²³"தேவனே அதற்கான வழியை அறிந்திருக்கிறார், அதன் இடத்தையும் அவர் அறிவார். ²⁴ஏனென்றால் அவர் பூமியின் கடையாந்தரங்கள்வரை பார்க்கிறார், வானங்களின்கீழுள்ள யாவையும் காண்கிறார். ²⁵அவர் காற்றுக்கு அதன் நிறையைக் கொடுத்து, தண்ணீர்களை அளந்து வைத்தபோதும், ²⁶மழைக்கு ஒரு கட்டளையையும், இடிமின்னலுக்கு ஒரு பாதையையும் ஏற்படுத்தினபோதும், ²⁷அப்பொழுது அவர் ஞானத்தைக் கண்டு அதை அறிவித்தார்; அதை நிலைநிறுத்தி, அதை ஆராய்ந்தறிந்தார்.

²⁸மேலும் அவர் மனுக்குலத்தை நோக்கி, ‘தேவனுக்குப் பயந்திருப்பதே ஞானம், தீமையைவிட்டு விலகுவதே புத்தி’ என்று சொன்னார்."