Me basika na mukanda
Dibuku

Kima Yina Muntu ya Ke Timunaka Lenda Timuna Ve

Bantu ke timuna matadi samu na palata mpe safile, bawu ke kwenda na kisika yina ata koko-mbele mosi me tala ntete ve. Kasi ndwenga, muntu lenda timuna yawu ve mpe lenda sumba yawu ve; mudindu mpe mubu ke tuba ti yawu kele awa ve. Kaka Nzambi zaba kisika ya yawu, mpe yandi zabisaka bantu: beno waka boma ya Nzambi, beno katuka na yimbi.

Tata ya beto ke zonza na vese 28

Kapu 28.

«Ya tsyelika, dibulu ya palata kele, mpe kisika yina ba ke vedisaka wolo kele. Ba ke bakaka kisengo na putulu, mpe ba ke basisaka kisengo ya mbwaki na ditadi. Muntu ke tulaka ndilu na mpimpa; yandi ke sosaka tii na ndilu ya nsuka matadi ya bisengo na kati ya mpimpa mpe kitombe ya ndombe. Yandi ke timunaka dibulu ya nda ntama ya kisika yina bantu ke zingaka, na bisika yina dikulu me tambula ata ntangu mosi ve; kuna bawu ke vwandaka ya kukangama mpe ke ninganaka, ntama ya bantu nyonso. Ntoto— madya ke basikaka na yawu, kasi na yisi ya yawu ba ke balulaka yawu bonso na tiya. Matadi ya yawu kele na safile, mpe putulu ya yawu kele na wolo. Yawu kele nzila yina koko-mbele mosi ve zaba yawu, nzila yina disu ya koko-mbele me mona yawu ntete ve. Bibulu ya lunangu me tambula na yawu ve, mpe nkosi me lutaka na yawu ve. Muntu ke tentikaka diboko ya yandi na ditadi ya ngolo, mpe ke balulaka myongo na misisa ya yawu. Yandi ke zengaka banzila na kati ya matadi, mpe disu ya yandi ke monaka konso kima ya ntalu. Yandi ke kangaka mizumba ya maza yina ke tiyokaka, mpe ke basisaka na nsemo bima yina kele ya kubumbama.

«Kasi ndwenga—beto lenda kuzwa yawu na wapi? Mpe kisika ya mayela kele na wapi? Muntu zaba ntalu ya yawu ve, mpe ba ke monaka yawu ve na yinsi ya bantu ya luzingu. Maza ya nda ke tubaka: “Yawu kele na kati ya munu ve,” mpe mubu ke tubaka: “Yawu kele na munu ve.” Ba lenda sumba yawu na wolo ya kitoko ve, mpe ba lenda teza ntalu ya yawu na palata ve. Ba lenda teza ntalu ya yawu na wolo ya Ofile ve, ata na onise ya ntalu to na safile ve. Wolo mpe kitala-tala lenda fwanana na yawu ve, mpe ba lenda soba yawu na bisalulu ya wolo ya mbote ve. Matadi ya mubu mpe kitala-tala, beto lenda tanga yawu ve; ntalu ya ndwenga me lutila kolaye. Topaze ya Kuse lenda fwanana na yawu ve, mpe ba lenda teza ntalu ya yawu na wolo ya mbote ve.

«Na yina, ndwenga ke katukaka na wapi? Mpe kisika ya mayela kele na wapi? Yawu kele ya kubumbama na meso ya bantu nyonso ya luzingu, yawu kele ya kubumbama ata na bandeke ya zulu. Mbebisanu mpe Lufwa ke tubaka: “Na makutu ya beto, beto me waka nsangu ya yawu.”

«Nzambi ke zabaka nzila yina ke nataka na yawu, mpe yandi zaba kisika ya yawu. Samu yandi ke talaka tii na nsuka ya ntoto, mpe ke monaka bima nyonso na yisi ya mazulu. Ntangu yandi pesaka mupepe dema ya yawu, mpe tezaka maza, ntangu yandi salaka lutumu samu na mvula mpe nzila samu na kuduma ya mvula, ni ntangu yina yandi monaka ndwenga mpe zabisaka yawu; yandi tulaka yawu ngolo mpe sosaka yawu.

Mpe yandi tubaka na bantu: “Boma ya Nzambi—yawu kele ndwenga, mpe kukatuka na mambu ya yimbi kele mayela.”»