Jobu 28

28 ¹“Nítòótọ́, ibi tí a ti ń wa fàdákà wà, àti ibi tí a ti ń sọ wúrà di mímọ́. ²A ń gbé irin jáde kúrò nínú erùpẹ̀, a sì ń yọ́ bàbà jáde láti inú àpáta. ³Ènìyàn ṣe ààlà fún òkùnkùn; ó ń wá ohun àlùmọ́nì dé òpin tí ó jìnnà jùlọ, nínú òkùnkùn àti òjìji ikú. ⁴Ó gbẹ́ ihò kòtò jíjìn jìnnà sí ibi tí ènìyàn ń gbé, ní àwọn ibi tí ẹsẹ̀ kò tíì rìn rí; níbẹ̀ ni wọ́n ń rọ̀ tí wọ́n sì ń mì, jìnnà réré sí ẹnikẹ́ni. ⁵Ayé—láti inú rẹ̀ ni oúnjẹ ti ń jáde wá, síbẹ̀ abẹ́ rẹ̀ ni a ń yí padà bí ẹni pé pẹ̀lú iná. ⁶Àwọn òkúta rẹ̀ ní safáírì nínú, erùpẹ̀ rẹ̀ sì ní wúrà nínú. ⁷Ọ̀nà kan ni tí ẹyẹ aṣọdẹ kankan kò mọ̀, tí ojú àṣá kò tíì rí rí. ⁸Àwọn ẹranko agbéraga kò tíì fi ẹsẹ̀ tẹ̀ ẹ́, bẹ́ẹ̀ ni kìnnìún kò tíì rìn kọjá lórí rẹ̀. ⁹Ènìyàn fi ọwọ́ rẹ̀ lé àpáta tí ó le koko, ó sì tú àwọn òkè ńlá ní gbòǹgbò wọn. ¹⁰Ó gbẹ́ ipa ọ̀nà omi nínú àwọn àpáta, ojú rẹ̀ sì rí ohun iyebíye gbogbo. ¹¹Ó dá omi tí ń jò dúró, ó sì mú ohun ìkọ̀kọ̀ wá sí ìmọ́lẹ̀.

¹²“Ṣùgbọ́n ọgbọ́n—níbo ni a lè rí i? Níbo sì ni ibi òye wà? ¹³Ènìyàn kò mọ iyì rẹ̀, a kò sì rí i ní ilẹ̀ alààyè. ¹⁴Ibú wí pé, ‘Kò sí nínú mi,’ Òkun sì wí pé, ‘Kò sí lọ́dọ̀ mi.’ ¹⁵A kò lè fi wúrà tí ó dára jùlọ rà á, bẹ́ẹ̀ ni a kò lè fi fàdákà wọn iye rẹ̀. ¹⁶A kò lè fi iye lé e pẹ̀lú wúrà Ofiri, tàbí pẹ̀lú óníkìsì iyebíye tàbí safáírì. ¹⁷Wúrà àti kírísítálì kò lè bá a dọ́gba, bẹ́ẹ̀ ni a kò lè fi ohun èlò wúrà dídára ṣe pàṣípàrọ̀ rẹ̀. ¹⁸Iyùn àti kírísítálì kò yẹ kí a dárúkọ wọn; iye ọgbọ́n ju òkúta rúbì lọ. ¹⁹Òkúta topasì ti Kuṣi kò lè bá a dọ́gba, bẹ́ẹ̀ ni a kò lè fi wúrà mímọ́ díye lé e.

²⁰“Nítorí náà, níbo ni ọgbọ́n ti wá? Níbo sì ni ibi òye wà? ²¹Ó fi ara pamọ́ kúrò lójú gbogbo alààyè, a sì bò ó mọ́lẹ̀ kúrò lọ́dọ̀ àwọn ẹyẹ ojú ọ̀run pẹ̀lú. ²²Ìparun àti Ikú wí pé, ‘Pẹ̀lú etí wa ni àwa ti gbọ́ ìròyìn rẹ̀.’

²³“Ọlọ́run mòye ọ̀nà tí ó lọ sí ọ̀dọ̀ rẹ̀, ó sì mọ ibi tí ó wà. ²⁴Nítorí ó wo òpin ilẹ̀ ayé, ó sì rí ohun gbogbo tí ó wà lábẹ́ ọ̀run. ²⁵Nígbà tí ó fi ìwọ̀n fún afẹ́fẹ́, tí ó sì wọn omi, ²⁶nígbà tí ó pàṣẹ fún òjò, tí ó sì ṣe ọ̀nà fún mànàmáná ààrá, ²⁷nígbà náà ni ó rí ọgbọ́n, ó sì sọ ọ́ jáde; ó fi ìdí rẹ̀ múlẹ̀, ó sì wádìí rẹ̀ dópin.

²⁸Ó sì wí fún aráyé pé, ‘Ìbẹ̀rù Ọlọ́run—èyí ni ọgbọ́n, àti láti yẹra fún ibi ni òye.’”