Ihe Onye Na-egwu Ala Apụghị Igwupụta

Ndị na-egwu ala na-egwu ọwa n'ime nkume maka ọlaọcha na nkume safaya, na-aga ebe ọ dịghị egbe hụrụ. Ma a pụghị igwupụta amamihe ma ọ bụ zụta ya; ogbu mmiri na oké osimiri na-asị na ọ nọghị ebe a. Naanị Chineke maara ebe ọ dị, o wee gwa mmadụ: tụọ egwu Chineke, sikwa n'ihe ọjọọ wezụga onwe gị.

Isi 28.

“Nʼezie, e nwere ebe a na-egwuta ọlaọcha, na ebe a na-anụcha ọlaedo. A na-ewepụta igwe site nʼaja, a na-anụchakwa ọlakọpa site nʼnkume. Mmadụ na-akpa oke nye ọchịchịrị; ọ na-enyocha ruo nʼebe kachasị anya maka nkume igwe dị nʼọchịchịrị na nʼime oké onyinyo. Ọ na-egwu olulu miri emi nʼebe dị anya site nʼebe ndị mmadụ bi, nʼebe ụkwụ ọbụla na-azọbeghị; nʼebe ahụ, ha na-akwụfe ma na-amagharị, tere aka site nʼebe mmadụ ọbụla nọ. Ụwa—site na ya ka nri si abịa, ma a na-atụgharị ihe dị nʼokpuru ya dịka ọ bụ ọkụ. Nkume ya nwere nkume safaịa nʼime ha, aja ya nwekwara ọlaedo. Ọ bụ ụzọ nke nnụnụ na-adọgbu anụ na-amaghị, nke anya egbe na-ahụtụbeghị. Anụ ọhịa ndị na-anya isi azọtụbeghị ya, ọdụm agabigabeghịkwa nʼelu ya. Mmadụ na-atụ aka ya nʼelu nkume siri ike, na-akwatukwa ugwu ukwu site na mgbọrọgwụ ha. Ọ na-egwupụta ụzọ mmiri site nʼetiti nkume, anya ya na-ahụkwa ihe ọbụla dị oké ọnụ ahịa. Ọ na-egbochi iyi ndị na-asọ asọ, na-ewepụtakwa ihe ndị zoro ezo nʼìhè.

“Ma amamihe—olee ebe a ga-achọta ya? Olee kwa ebe nghọta dị? Mmadụ amaghị ọnụ ahịa ya, a dịghịkwa achọta ya nʼala ndị dị ndụ. Ogbu mmiri na-asị, ‘Ọ dịghị nʼime m,’ oké osimiri na-asịkwa, ‘Ọ dịnyeghị m.’ A pụghị iji ọlaedo kacha mma zụta ya, a pụghịkwa iji ọlaọcha tụọ ọnụ ahịa ya. A pụghị iji ọlaedo nke Ọfịa tụnyere ya, maọbụ iji nkume ọniks dị oké ọnụ ahịa maọbụ safaịa. Ọlaedo na kristal enweghị ike iha ya, a pụghịkwa iji efere ọlaedo a nụchara anụcha gbanwere ya. Koral na kristal erughị ka a kpọtụ aha ha; ọnụ ahịa amamihe karịrị nkume rubi. Topaz nke Kush enweghị ike iha ya, a pụghịkwa iji ọlaedo a nụchara anụcha tụnyere ya.

“Olee ebe, mgbe ahụ, amamihe si abịa? Olee kwa ebe nghọta dị? E zochiri ya site nʼanya ihe niile dị ndụ, e zokwara ya ọbụladị nʼebe nnụnụ nke mbara igwe nọ. Mbibi na Ọnwụ na-asị, ‘Anyị ejirila ntị anyị nụ asịrị gbasara ya.’

“Chineke ghọtara ụzọ nke na-eduga na ya, ọ makwaara ebe ọ dị. Nʼihi na ọ na-ele anya ruo nʼoke nsọtụ ụwa, na-ahụkwa ihe niile dị nʼokpuru eluigwe. Mgbe o nyere ikuku ịdị arọ ya, ma tụọ mmiri niile nʼihe ọtụtụ, mgbe o nyere iwu maka mmiri ozuzo na ụzọ maka egbe eluigwe, mgbe ahụ, ọ hụrụ amamihe ma kwupụta ya; o hiwere ya ma nyochaa ya nke ọma.

Ọ sịkwara ụmụ mmadụ, ‘Ịtụ egwu Chineke—nke ahụ bụ amamihe, ịsị nʼajọ omume wezuga onwe bụkwa nghọta.’”