Onidajọ 21

21 ¹Àwọn ọkùnrin Israẹli ti búra ní Mispa pé, “Kò sí ẹnikẹ́ni nínú wa tí yóò fi ọmọbìnrin rẹ̀ fún Benjamini láti fẹ́ ní aya.” ²Àwọn ènìyàn náà wá sí Beteli, wọ́n sì jókòó níbẹ̀ níwájú Baba wa títí di àṣálẹ́, wọ́n ń ké igbe, wọ́n sì ń sọkún kíkorò. ³Wọ́n wí pé, “Baba wa, Ọlọ́run Israẹli, èéṣe tí èyí fi ṣẹlẹ̀ ní Israẹli—tí ẹ̀yà kan fi dín kù ní Israẹli lónìí?”

⁴Àwọn ènìyàn náà dìde ní kùtùkùtù ọjọ́ kejì, wọ́n kọ́ pẹpẹ kan síbẹ̀, wọ́n sì rú ẹbọ sísun àti ẹbọ àlàáfíà. ⁵Nígbà náà ni àwọn ènìyàn Israẹli béèrè pé, “Èwo nínú gbogbo ẹ̀yà Israẹli ni kò gòkè wá sí àpéjọ, sọ́dọ̀ Baba wa?” Nítorí wọ́n ti búra ìbúra tí ó lágbára pé, ẹnikẹ́ni tí kò bá gòkè wá sọ́dọ̀ Baba wa ní Mispa, kíkú ni yóò kú. ⁶Àwọn ọmọ Israẹli banújẹ́ nítorí Benjamini arákùnrin wọn. Wọ́n wí pé, “Lónìí, a ké ẹ̀yà kan kúrò ní Israẹli. ⁷Báwo ni àwa yóò ṣe rí aya fún àwọn ìyókù, nígbà tí a ti fi Baba wa búra pé àwa kì yóò fi àwọn ọmọbìnrin wa fún wọn?” ⁸Nígbà náà ni wọ́n béèrè pé, “Èwo nínú àwọn ẹ̀yà Israẹli ni kò gòkè wá sọ́dọ̀ Baba wa ní Mispa?” Kò sí ẹnikẹ́ni láti Jabesi-gileadi tí ó wá sí ibùdó, sí àpéjọ. ⁹Nítorí nígbà tí a ka àwọn ènìyàn náà, kò sí ẹnìkan nínú àwọn olùgbé Jabesi-gileadi níbẹ̀. ¹⁰Àpéjọ náà rán 12,000 nínú àwọn jagunjagun akíkanjú wọn síbẹ̀, wọ́n pàṣẹ pé, “Ẹ lọ fi idà kọlu àwọn olùgbé Jabesi-gileadi, pẹ̀lú àwọn obìnrin àti àwọn ọmọdé. ¹¹Ẹ ṣe èyí: ẹ fi gbogbo ọkùnrin fún ìparun, àti gbogbo obìnrin tí ó ti bá ọkùnrin lòpọ̀.” ¹²Nínú àwọn olùgbé Jabesi-gileadi, wọ́n rí irinwó wúńdíá ọ̀dọ́mọbìnrin tí kò tí ì bá ọkùnrin kankan sùn, wọ́n sì mú wọn wá sí ibùdó ní Ṣilo, ní ilẹ̀ Kenaani.

¹³Nígbà náà ni gbogbo ìjọ ènìyàn náà ránṣẹ́ sí àwọn ọmọ Benjamini ní àpáta Rimoni, wọ́n sì kéde àlàáfíà fún wọn. ¹⁴Benjamini padà wá ní àkókò náà; wọ́n sì fi àwọn obìnrin tí a dá sí láàyè láti Jabesi-gileadi fún wọn—síbẹ̀ wọn kò tó gbogbo wọn. ¹⁵Àwọn ènìyàn náà banújẹ́ nítorí Benjamini, nítorí Baba wa ti ṣe àlàfo kan nínú àwọn ẹ̀yà Israẹli. ¹⁶Àwọn àgbà àpéjọ náà wí pé, “Báwo ni àwa yóò ṣe rí aya fún àwọn ìyókù, nígbà tí a ti pa àwọn obìnrin Benjamini run?” ¹⁷Wọ́n wí pé, “Àwọn ìyókù Benjamini nílò ogún, kí a má ba à pa ẹ̀yà kan rẹ́ kúrò ní Israẹli. ¹⁸Àwa kò lè fi àwọn ọmọbìnrin wa fún wọn ní aya, nítorí Israẹli ti búra pé, ‘Ègún ni fún ẹnikẹ́ni tí ó bá fi aya fún Benjamini.’” ¹⁹Wọ́n wí pé, “Àjọyọ̀ ọdọọdún kan wà ti Baba wa ní Ṣilo, ní àríwá Beteli, ní ìlà-oòrùn ọ̀nà tí ó gòkè láti Beteli lọ sí Ṣekemu, ní gúúsù Lebona.” ²⁰Wọ́n sì pàṣẹ fún àwọn ọmọ Benjamini pé, “Ẹ lọ fi ara pamọ́ sínú àwọn ọgbà àjàrà. ²¹Ẹ ṣọ́ra—nígbà tí àwọn ọ̀dọ́mọbìnrin Ṣilo bá jáde wá jó, kí ẹ sáré jáde kúrò nínú àwọn ọgbà àjàrà, kí olúkúlùkù mú aya kan fún ara rẹ̀ nínú àwọn ọ̀dọ́mọbìnrin Ṣilo, kí ẹ sì lọ sí ilẹ̀ Benjamini. ²²Nígbà tí àwọn baba wọn tàbí àwọn arákùnrin wọn bá wá sọ́dọ̀ wa láti ráhùn, àwa yóò wí fún wọn pé, Ẹ ṣe oore-ọ̀fẹ́ fún wọn nítorí wa, nítorí àwa kò kó aya fún olúkúlùkù nínú ogun, ẹ̀yin náà kò sì fi aya fún wọn fúnra yín—bí bẹ́ẹ̀ kọ́, ẹ̀yin ìbá jẹ̀bi nísinsìnyí.”

²³Bẹ́ẹ̀ ni àwọn ọmọ Benjamini ṣe èyí: wọ́n mú aya, ọ̀kan fún olúkúlùkù, nínú àwọn oníjó tí wọ́n gbà, wọ́n padà sí ogún wọn, wọ́n tún àwọn ìlú kọ́, wọ́n sì ń gbé ibẹ̀. ²⁴Ní àkókò náà, àwọn ọmọ Israẹli kúrò níbẹ̀, olúkúlùkù sí ẹ̀yà rẹ̀ àti ìdílé rẹ̀; olúkúlùkù jáde kúrò níbẹ̀ lọ sí ogún rẹ̀. ²⁵Ní àwọn ọjọ́ wọ̀nyẹn, kò sí ọba ní Israẹli; olúkúlùkù ṣe ohun tí ó tọ́ lójú ara rẹ̀.