መሳፍንት 21

21 ¹የእስራኤል ሰዎች በምጽጳ፣ “ከእኛ አንዳችን ቢሆን ሴት ልጁን ለብንያም ሚስት አድርጎ አይሰጥም” ብለው ምለው ነበር። ²ሕዝቡም ወደ ቤቴል መጥተው እስከ ማታ ድረስ በአባታችን ፊት ተቀመጡ፤ ድምፃቸውንም ከፍ አድርገው አምርረው አለቀሱ። ³እንዲህም አሉ፤ “አባታችን ሆይ፤ የእስራኤል አምላክ ሆይ፤ ዛሬ ከእስራኤል አንድ ነገድ እንዲጐድል ይህ በእስራኤል ላይ ለምን ሆነ?”

⁴በማግሥቱ ሕዝቡ ማልደው ተነሥተው በዚያ መሠውያ ሠሩ፤ የሚቃጠልና የኅብረት መሥዋዕቶችንም አቀረቡ። ⁵የእስራኤልም ሰዎች፣ “ከእስራኤል ነገዶች ሁሉ ወደ ጉባኤው፣ ወደ አባታችን ያልወጣ ማን ነው?” ብለው ጠየቁ፤ ወደ ምጽጳ ወደ አባታችን ያልወጣ ሰው ፈጽሞ ይገደል ዘንድ ታላቅ መሐላ ምለው ነበርና። ⁶እስራኤላውያንም ስለ ወንድማቸው ስለ ብንያም አዘኑ፤ “ዛሬ ከእስራኤል አንድ ነገድ ተቈርጧል።” አሉ። ⁷“ሴቶች ልጆቻችንን እንዳንሰጣቸው በአባታችን ምለን ስለ ነበር፣ ለተረፉት እንዴት ሚስት ልናገኝ እንችላለን?” ⁸እንዲህም ብለው ጠየቁ፤ “ከእስራኤል ነገዶች ወደ ምጽጳ ወደ አባታችን ያልወጣ ማን ነው?” ከኢያቤስ ገለዓድ ወደ ሰፈሩ፣ ወደ ጉባኤው የመጣ አንድም አልነበረም። ⁹ሕዝቡ በተቈጠረ ጊዜ ከኢያቤስ ገለዓድ ነዋሪዎች አንድም በዚያ አልነበረምና። ¹⁰ጉባኤውም ከኀያላን ተዋጊዎቻቸው ዐሥራ ሁለት ሺሕ ወደዚያ ላከ፤ እንዲህም ብሎ አዘዛቸው፤ “ሂዱ፤ የኢያቤስ ገለዓድን ነዋሪዎች ከሴቶችና ከሕፃናት ጋር በሰይፍ ምቱ። ¹¹የምታደርጉት ይህ ነው፤ ወንዱን ሁሉ፣ ከወንድ ጋር ተኝታ የምታውቅን ሴት ሁሉ ፈጽማችሁ አጥፉ።” ¹²ከኢያቤስ ገለዓድ ነዋሪዎች መካከል ከወንድ ጋር ተኝተው የማያውቁ አራት መቶ ወጣት ደናግል አገኙ፤ በከነዓን ምድር ወደ ነበረው ወደ ሴሎ ሰፈር አመጧቸው።

¹³ከዚያም ማኅበሩ ሁሉ በሬሞን ዓለት ወዳሉት ብንያማውያን ልኮ ሰላምን አወጀላቸው። ¹⁴በዚያም ጊዜ ብንያም ተመለሰ፤ ከኢያቤስ ገለዓድ በሕይወት የተጠበቁትን ሴቶች ሰጧቸው፤ ነገር ግን ለሁሉ አልበቁአቸውም። ¹⁵አባታችን በእስራኤል ነገዶች መካከል ክፍተት አድርጎ ስለ ነበር ሕዝቡ ስለ ብንያም አዘኑ። ¹⁶የጉባኤውም ሽማግሌዎች፣ “የብንያም ሴቶች ጠፍተዋልና ለተረፉት እንዴት ሚስት እናገኝላቸዋለን?” አሉ። ¹⁷እንዲህም አሉ፤ “ከእስራኤል አንድ ነገድ እንዳይደመሰስ ለብንያም ተራፊዎች ርስት ያስፈልጋቸዋል። ¹⁸እስራኤል፣ ‘ለብንያም ሚስት የሚሰጥ ሁሉ የተረገመ ይሁን’ ብሎ ምሎ ስለ ነበር፣ ሴቶች ልጆቻችንን ሚስት አድርገን ልንሰጣቸው አንችልም።” ¹⁹እንዲህም አሉ፤ “ከቤቴል በስተ ሰሜን፣ ከቤቴል ወደ ሴኬም ከሚወጣው መንገድ በስተ ምሥራቅ፣ ከለቦና በስተ ደቡብ ባለችው በሴሎ በየዓመቱ የአባታችን በዓል አለ።” ²⁰ብንያማውያንንም፣ “ሂዱ፤ በወይን ተክል ቦታዎች ተደበቁ፤ ²¹ተመልከቱ፤ የሴሎ ወጣት ሴቶች ለዘፈን በወጡ ጊዜ ከወይኑ ተክል ቦታዎች ተወርውራችሁ ውጡ፤ እያንዳንዳችሁ ከሴሎ ወጣት ሴቶች ለራሳችሁ ሚስት ያዙ፤ ወደ ብንያም ምድርም ሂዱ። ²²አባቶቻቸው ወይም ወንድሞቻቸው ሊከሱን ወደ እኛ በመጡ ጊዜ፣ ‘ስለ እኛ ብላችሁ ለእነርሱ ሞገስ አድርጉላቸው፤ በጦርነቱ ለእያንዳንዱ ሚስት አልማረክንላቸውምና፤ እናንተም ራሳችሁ ሚስት አልሰጣችኋቸውም፤ አለዚያማ አሁን በደለኞች በሆናችሁ ነበር’ እንላቸዋለን።”

²³የብንያምም ልጆች እንዲሁ አደረጉ፤ ከያዟቸው ዘፋኞች ለእያንዳንዳቸው አንዳንድ ሚስት ወሰዱ፤ ወደ ርስታቸውም ተመልሰው ከተሞቹን እንደ ገና ሠርተው በዚያ ኖሩ። ²⁴በዚያም ጊዜ እስራኤላውያን እያንዳንዱ ወደ ነገዱና ወደ ወገኑ ከዚያ ወጡ፤ እያንዳንዱ ከዚያ ወደ ርስቱ ወጣ። ²⁵በዚያን ዘመን በእስራኤል ንጉሥ አልነበረም፤ ሰው ሁሉ በራሱ ዓይን ትክክል መስሎ የታየውን ያደርግ ነበር።