Rireenet agobo che ki ng'et che po Benjamin
Kingo kiiyasyo kole ma kigoochi chepto age Benjaminindet koik kwony, koriir piigap Israel eng' taitap Kwandanyo amu pet pororyet agenge, ak kolitiit niito eng' pooryeet ne ya kosiir: kibarei piigap Jabes-gilead amu pergeinikwak pogol ang'wan che neranik, ak kemwachi che kichililso kong'wekyi pergeigap Shiloh che kourerei.
21 1Ki iyasyo murenigap Israel eng' Mispa, koleenji, “Ma kigoochi age eng' acheek tyennyi Benjamin koik kwony.” 2Ki bwa piik Bethel ak kotebi olooto eng' taitap Kwandanyo agoi koleny, koriir ak kowaach eng' ng'wanindo. 3Ak ki le, “Amu nee, ee Kwandanyo, Kamuktaindetap Israel, si kayaak niito eng' Israel—kobet pororyet agenge eng' Israel rani?”
4Ki ng'eet piik karon mutai, koteech keriinget olooto, ak kogoochi kagoochinoik che kibeelei ak che po kalya. 5Ki teebe anyun piigap Israel, koleenji, “Aino eng' pororyosyegap Israel tugul ne ma ki togosta tuiyet, eng' taitap Kwandanyo?” Amu ki iyasyo icheek kayasyoet ne oo kole, kibarei iman age tugul ne ma togosta kwo ole mi Kwandanyo eng' Mispa. 6Ki aragen piigap Israel agobo tupcho Benjamin. Ak ki le, “Rani kagotil pororyet agenge eng' Israel. 7Kinyoorchin ano kwonyiik che ki ng'et, amu ki kiyasyechi Kwandanyo kole ma kigoochi icheek tiibiikwok?” 8Ak ki teebe, koleenji, “Aino eng' pororyosyegap Israel ne ma ki togosta kwo ole mi Kwandanyo eng' Mispa?” Ma ki bwa chiito age eng' Jabes-gilead koit imuung'et, eng' tuiyet. 9Amu ye kingo kigiit piik, ma ki mi agot agenge eng' piik che menyei Jabes-gilead olooto. 10Ki iyookto tuiyet murenik eliphuusyek taman ak aeng' che nyigoonen miising' koba olooto, kong'at icheek koleenji, “Oba obar piik che menyei Jabes-gilead eng' rotweet, kobooto kwonyiik ak lagok. 11Oyai niito: owong'u kot koma ng'et murenik tugul, ak kwonyiik tugul che ki koruiyo ak muren.” 12Ki konyoor eng' piik che ki menyei Jabes-gilead pergeinik pogol ang'wan che ma ki koru ak muren, ak koip icheek koit imuung'et eng' Shiloh, eng' emetap Kanaan.
13Ak ki yookto tuiyet komugul logoiywek koba Benjaminik che menyei rwandetap Rimon, ak koleenji icheek kalya. 14Ki weekyigei Benjamin eng' sainooto; ak kigoochi icheek kwonyiik che kigiribto eng' Jabes-gilead—ago ma ki yam icheek tugul. 15Ki aragen piik agobo Benjamin, amu ki mong'u Kwandanyo pororyosyegap Israel. 16Ki le poisyegap tuiyet, “Kinyoorchin ano kwonyiik che ki ng'et, amu kagoistogei kwonyiigap Benjamin?” 17Ak ki le, “Mache che ki ng'et eng' Benjamin kebeberta, si ma purburto pororyet eng' Israel. 18Ma kimuuchi kegoochi icheek tiibiikwok koik kwonyiik, amu ki iyasyo Israel kole, ‘Chuboot chii ne goochi kwony Benjamin.’” 19Ak ki le, “Miitei igoortap kenyiit age tugul ne po Kwandanyo eng' Shiloh, murot kaataam eng' Bethel, murot koryeet eng' ooreet ne togosta kobun Bethel koba Shekem, murot kipsengwony eng' Lebona.” 20Ak ki ng'atji Benjaminik, koleenji, “Oba ouny eng' mbareenigap sabibuk. 21Ogeer—ye komong' pergeiigap Shiloh koba urernatet, olabat eng' mbareenigap sabibuk, onam age tugul kwony eng' pergeiigap Shiloh, ak oba emetap Benjamin. 22Ye kobwanech kwaniik anan tupchosyekwak koing'alaalji, kiwolji icheek, Oriree icheek agobo acheek, amu ki ma kinam age tugul kwony eng' lugeet, ak ma ki ogoochi icheek kwonyiik okweek—anyun oek owong' tengek rani.”
23Ki yai lagogap Benjamin ko uu nooto: konam kwonyiik, age tugul kwonyi, eng' che ki ureru che konam, koweekyigei kebeberwekwok, koteech kogeny nganasook, ak komeny olooto. 24Ki wo piigap Israel eng' sainooto eng' olooto, age tugul kobee pororyennyi ak oriitinnyi; ki mang'une age tugul eng' olooto koba kebebertanyi. 25Eng' peetuusyekoto ko ki ma mi laitoryat eng' Israel; ki yaei age tugul ne karaaran eng' konyeennyi.