நியாயாதிபதிகள் 21

21 ¹இஸ்ரவேலின் மனிதர் மிஸ்பாவிலே: “நம்மில் ஒருவனும் தன் மகளைப் பென்யமீனனுக்கு மனைவியாகக் கொடுப்பதில்லை” என்று ஆணையிட்டிருந்தார்கள். ²மக்கள் பெத்தேலுக்கு வந்து, சத்தமிட்டு மனங்கசந்து அழுதுகொண்டே, மாலைவரைக்கும் எங்கள் பிதாவின் சந்நிதியில் அங்கே உட்கார்ந்திருந்தார்கள். ³அவர்கள்: “எங்கள் பிதாவே, இஸ்ரவேலின் தேவனே, இன்று இஸ்ரவேலில் ஒரு கோத்திரம் குறைந்துபோகும்படியாக, இப்படி இஸ்ரவேலில் ஏன் நடந்தது?” என்றார்கள்.

⁴மறுநாள் மக்கள் அதிகாலையில் எழுந்து, அங்கே ஒரு பலிபீடத்தைக் கட்டி, சர்வாங்க தகனபலிகளையும் சமாதானபலிகளையும் செலுத்தினார்கள். ⁵பின்பு இஸ்ரவேல் மக்கள்: “இஸ்ரவேலின் எல்லாக் கோத்திரங்களிலும் எங்கள் பிதாவின் சந்நிதியிலே சபைகூடுதலுக்கு வராதவர் யார்?” என்று விசாரித்தார்கள்; ஏனெனில், மிஸ்பாவிலே எங்கள் பிதாவினிடத்தில் வராதவன் நிச்சயமாய்க் கொலைசெய்யப்படவேண்டும் என்று அவர்கள் உறுதியான ஆணையிட்டிருந்தார்கள். ⁶இஸ்ரவேலர் தங்கள் சகோதரனாகிய பென்யமீனுக்காக மனம் நொந்து: “இன்று இஸ்ரவேலில் ஒரு கோத்திரம் அறுப்புண்டுபோயிற்று. ⁷நம் மகள்களை அவர்களுக்குக் கொடுப்பதில்லை என்று நாம் எங்கள் பிதாவின்பேரில் ஆணையிட்டிருக்கிறபடியால், தப்பிப்பிழைத்தவர்களுக்கு நாம் எப்படி மனைவிகளைச் சம்பாதிப்போம்?” என்றார்கள். ⁸பின்பு அவர்கள்: “இஸ்ரவேலின் கோத்திரங்களில் மிஸ்பாவிலே எங்கள் பிதாவினிடத்தில் வராதவர் யார்?” என்று விசாரித்தார்கள்; அப்பொழுது கீலேயாத்தேசத்து யாபேசிலிருந்து ஒருவரும் பாளயத்திலே சபைகூடுதலுக்கு வரவில்லை என்று கண்டார்கள். ⁹மக்கள் எண்ணிப்பார்க்கப்பட்டபோது, கீலேயாத்தேசத்து யாபேசின் குடிகளில் ஒருவரும் அங்கே இல்லை. ¹⁰அப்பொழுது சபையார் தங்கள் பராக்கிரமசாலிகளில் பன்னிரண்டாயிரம்பேரை அங்கே அனுப்பி: “நீங்கள் போய், கீலேயாத்தேசத்து யாபேசின் குடிகளையும், ஸ்திரீகளையும் பிள்ளைகளையும் பட்டயத்தினால் வெட்டிப்போடுங்கள். ¹¹நீங்கள் செய்யவேண்டியது என்னவென்றால்: ஆண்பிள்ளை எல்லாவற்றையும், ஆணோடே சேர்ந்து படுத்திருந்த ஒவ்வொரு ஸ்திரீயையும் சங்காரத்திற்கு ஒப்புக்கொடுங்கள்” என்று கட்டளையிட்டார்கள். ¹²கீலேயாத்தேசத்து யாபேசின் குடிகளுக்குள்ளே, ஆணோடே சேர்ந்து படுத்திராத நானூறு கன்னியாஸ்திரீகளைக் கண்டுபிடித்து, அவர்களைக் கானான்தேசத்திலிருக்கிற சீலோவிலுள்ள பாளயத்திற்குக் கொண்டுவந்தார்கள்.

¹³பின்பு சபையார் எல்லாரும் ரிம்மோன் கன்மலையிலிருக்கிற பென்யமீன் புத்திரருக்குச் செய்தி அனுப்பி, அவர்களுக்குச் சமாதானம் கூறினார்கள். ¹⁴அக்காலத்திலே பென்யமீனர் திரும்பிவந்தார்கள்; கீலேயாத்தேசத்து யாபேசிலே உயிரோடே காப்பாற்றப்பட்ட ஸ்திரீகளை அவர்களுக்குக் கொடுத்தார்கள்; ஆனாலும் அவர்கள் எல்லாருக்கும் அவர்கள் போதவில்லை. ¹⁵எங்கள் பிதா இஸ்ரவேல் கோத்திரங்களில் ஒரு பிளவை உண்டாக்கினபடியால், மக்கள் பென்யமீனுக்காக மனம் நொந்தார்கள். ¹⁶சபையின் மூப்பர்கள்: “பென்யமீனிலே ஸ்திரீகள் அழிந்துபோனபடியால், தப்பிப்பிழைத்தவர்களுக்கு நாம் எப்படி மனைவிகளைச் சம்பாதிப்போம்?” என்றார்கள். ¹⁷பின்னும் அவர்கள்: “இஸ்ரவேலில் ஒரு கோத்திரம் அழிந்துபோகாதபடிக்கு, பென்யமீனில் தப்பிப்பிழைத்தவர்களுக்கு ஒரு சுதந்தரம் வேண்டியதே. ¹⁸ஆனாலும் நம் மகள்களை அவர்களுக்கு மனைவிகளாகக் கொடுக்கக்கூடாது; ஏனெனில், ‘பென்யமீனனுக்கு மனைவியைக் கொடுக்கிறவன் சபிக்கப்பட்டவன்’ என்று இஸ்ரவேலர் ஆணையிட்டிருக்கிறார்களே” என்றார்கள். ¹⁹பின்பு அவர்கள்: “இதோ, பெத்தேலுக்கு வடக்கேயும், பெத்தேலிலிருந்து சீகேமுக்குப் போகிற பெரும்பாதைக்குக் கிழக்கேயும், லெபனோனாவுக்குத் தெற்கேயுமிருக்கிற சீலோவிலே, ஆண்டுதோறும் எங்கள் பிதாவின் பண்டிகை உண்டு” என்றார்கள். ²⁰அவர்கள் பென்யமீன் புத்திரருக்குக் கட்டளையிட்டு: “நீங்கள் போய், திராட்சத்தோட்டங்களில் பதுங்கியிருந்து, ²¹கவனித்துப்பாருங்கள்—சீலோவின் இளம்பெண்கள் நடனமாடப் புறப்பட்டு வரும்போது, நீங்கள் திராட்சத்தோட்டங்களிலிருந்து பாய்ந்துவந்து, சீலோவின் இளம்பெண்களில் அவனவன் தன் மனைவியைப் பிடித்துக்கொண்டு, பென்யமீன் தேசத்திற்குப் போங்கள். ²²அவர்களுடைய தகப்பன்மாராவது சகோதரராவது நம்மிடத்தில் முறையிட வந்தால், நாங்கள் அவர்களை நோக்கி: ‘எங்கள் நிமித்தம் இவர்கள்மேல் தயவாயிருங்கள்; ஏனெனில், நாங்கள் யுத்தத்திலே அவனவனுக்கு ஒரு மனைவியைப் பிடித்துக்கொள்ளவில்லை; நீங்களும் அவர்களுக்கு மனைவிகளைக் கொடுக்கவில்லையே; கொடுத்திருந்தால் இப்பொழுது நீங்கள் குற்றவாளிகளாயிருப்பீர்கள்’ என்று சொல்லுவோம்” என்றார்கள்.

²³பென்யமீன் புத்திரர் அப்படியே செய்து, நடனமாடினவர்களில் தாங்கள் பிடித்துக்கொண்ட ஸ்திரீகளில் அவனவன் ஒருத்தியை மனைவியாக்கிக்கொண்டு, தங்கள் சுதந்தரத்திற்குத் திரும்பிப்போய், பட்டணங்களைத் திரும்பக் கட்டி, அவைகளில் குடியிருந்தார்கள். ²⁴அக்காலத்திலே இஸ்ரவேலர் அவரவர் தங்கள் கோத்திரத்திற்கும் தங்கள் குடும்பத்திற்கும் அங்கேயிருந்து புறப்பட்டு, அவரவர் தங்கள் சுதந்தரத்திற்குப் போனார்கள். ²⁵அந்நாட்களிலே இஸ்ரவேலில் ராஜா இல்லை; அவனவன் தன் பார்வைக்குச் சரியாய்த் தோன்றினபடி செய்தான்.