Deuteronomi 3

3 ¹A sì yípadà, a sì gba ọ̀nà tí ó lọ sí Baṣani, Ogu ọba Baṣani sì jáde wá, òun àti gbogbo àwọn ènìyàn rẹ̀, láti bá wa jà ní Edrei.

²Baba wa sì sọ fún mi pé, “Má bẹ̀rù rẹ̀, nítorí mo ti fi òun, àti gbogbo àwọn ènìyàn rẹ̀, àti ilẹ̀ rẹ̀ fún ọ; ṣe sí i gẹ́gẹ́ bí ìwọ ti ṣe sí Sihoni ọba àwọn ará Amori, tí ó gbé ní Heṣboni.”

³Bẹ́ẹ̀ ni Baba wa sì fi Ogu ọba Baṣani àti gbogbo àwọn ènìyàn rẹ̀ fún wa pẹ̀lú, a sì kọlù wọ́n, a sì pa wọ́n, a kò sì fi ẹnìkankan sílẹ̀ láàyè. ⁴Ní àkókò náà ni a gba gbogbo àwọn ìlú rẹ̀—gbogbo rẹ̀ tí ó jẹ́ ọgọ́ta, kò sí èyí tí a kò gbà—gbogbo agbègbè Argobu, ìjọba Ogu ní Baṣani. ⁵Gbogbo ìwọ̀nyí jẹ́ àwọn ìlú tí a fi odi gíga àti ẹnu-bodè onídẹ̀kùn dáàbò bò, yàtọ̀ sí ọ̀pọ̀lọpọ̀ àwọn abúlé tí kò ní odi. ⁶A sì run wọ́n pátápátá, gẹ́gẹ́ bí a ti ṣe sí Sihoni ọba Heṣboni, tí a run gbogbo ìlú pátápátá—àwọn ọkùnrin rẹ̀, àwọn obìnrin àti àwọn ọmọdé. ⁷Ṣùgbọ́n gbogbo àwọn ẹran ọ̀sìn àti ìkógun àwọn ìlú náà ni a kó fún ara wa. ⁸Bẹ́ẹ̀ ni ní àkókò náà ni a gba ilẹ̀ náà lọ́wọ́ àwọn ọba ará Amori méjèèjì tí ó wà ní ìhà kejì Jọdani, láti àfonífojì Arnoni títí dé Òkè Hermoni ⁹(àwọn ará Sidoni ń pe Hermoni ní Sirioni, nígbà tí àwọn ará Amori ń pè é ní Seniri), ¹⁰gbogbo àwọn ìlú orí pẹ̀tẹ́lẹ̀, gbogbo Gileadi, àti gbogbo Baṣani títí dé Saleka àti Edrei—àwọn ìlú ìjọba Ogu ní Baṣani. ¹¹(Ogu ọba Baṣani nìkan ṣoṣo ni ó kù nínú àwọn ìyókù àwọn Refaimu. Ibùsùn rẹ̀ jẹ́ ibùsùn irin; kì í ha ṣe pé ó wà ní Rabba ti àwọn ará Ammoni? Ó tó ìwọ̀n ẹsẹ̀ bàtà mẹ́tàlá àbọ̀ ní gígùn, ó sì tó ẹsẹ̀ bàtà mẹ́fà ní fífẹ̀.). ^a a v11 Àwọn Refaimu jẹ́ ìran àwọn jagunjagun òmìrán olókìkí tí ó ti gbé ní Kenaani nígbà kan rí.

Pípín Ilẹ̀ náà ní Ìhà Ìlà-Oòrùn Jọdani

¹²Ilẹ̀ yìí ni a gbà nígbà náà: láti Aroeri tí ó wà létí àfonífojì Arnoni, pẹ̀lú ìlàjì ilẹ̀ olókè Gileadi àti àwọn ìlú rẹ̀, ni mo fi fún àwọn ọmọ Reubeni àti àwọn ọmọ Gadi. ¹³Ìyókù Gileadi àti gbogbo Baṣani—ìjọba Ogu—ni mo fi fún ìdajì ẹ̀yà Manasse: gbogbo agbègbè Argobu. (Gbogbo apá Baṣani náà ni a ń pè ní ilẹ̀ àwọn Refaimu. ¹⁴Jairi ọmọ Manasse gba gbogbo agbègbè Argobu títí dé ààlà àwọn ará Geṣuri àti àwọn ará Maakati, ó sì fi orúkọ ara rẹ̀ sọ Baṣani ní Hafoti-Jairi, títí di òní olónìí.). ¹⁵Mo sì fi Gileadi fún Makiri. ¹⁶Fún àwọn ọmọ Reubeni àti àwọn ọmọ Gadi ni mo fún láti Gileadi títí dé àfonífojì Arnoni—àárín rẹ̀ ni ààlà—títí dé odò Jabbok, ààlà àwọn ará Ammoni. ¹⁷Àti pẹ̀lú Araba, Jọdani sì ni ààlà rẹ̀, láti Kinnereti títí dé Òkun Araba (Òkun Òkú), ní ìsàlẹ̀ ìdàgẹ̀rẹ́ Pisga, ní ìhà ìlà-oòrùn.

¹⁸Ní àkókò náà ni mo pa àṣẹ fún yín pé, “Baba yín ti fi ilẹ̀ yìí fún yín láti ní; gbogbo àwọn akọni ológun yín gbọ́dọ̀ hámọ́ra, kí wọ́n sì rékọjá síwájú àwọn arákùnrin yín, àwọn ọmọ Israẹli. ¹⁹Ṣùgbọ́n àwọn aya yín, àwọn ọmọ yín, àti àwọn ẹran ọ̀sìn yín nìkan—mo mọ̀ pé ẹ ní ọ̀pọ̀ ẹran ọ̀sìn—ni kí wọ́n ó dúró sí àwọn ìlú tí mo fi fún yín, ²⁰títí Baba wa yóò fi fún àwọn arákùnrin yín ní ìsinmi gẹ́gẹ́ bí ó ti fi fún yín, àwọn pẹ̀lú yóò sì gba ilẹ̀ tí Baba yín ń fi fún wọn ní ìhà kejì Jọdani. Nígbà náà ni ẹnìkọ̀ọ̀kan yín yóò padà sí ìní tí mo fi fún un.”

²¹Mo sì pàṣẹ fún Joṣua nígbà náà pé, “Ojú ara rẹ ni ó ti rí gbogbo ohun tí Baba rẹ ṣe sí àwọn ọba méjèèjì yìí. Bẹ́ẹ̀ ni Baba rẹ yóò ṣe sí gbogbo àwọn ìjọba tí ìwọ ń rékọjá lọ sí.

Má Bẹ̀rù — Òun Ni Yóò Jà fún Yín

²²Má bẹ̀rù wọn, nítorí Baba rẹ fúnra rẹ̀ ni yóò jà fún ọ.”

²³Mo sì bẹ Baba wa ní àkókò náà pé, ²⁴“Baba mi Olódùmarè, ẹ ti bẹ̀rẹ̀ sí í fi títóbi yín àti ọwọ́ agbára yín han ìránṣẹ́ yín. Ọlọ́run wo ni ó wà ní ọ̀run tàbí ní ayé tí ó lè ṣe iṣẹ́ àti iṣẹ́ agbára bí tiyín? ²⁵Jọ̀wọ́ ẹ jẹ́ kí n rékọjá lọ kí n sì rí ilẹ̀ rere tí ó wà ní ìhà kejì Jọdani, ilẹ̀ olókè rere yìí, àti Lebanoni.”

²⁶Ṣùgbọ́n Baba wa bínú sí mi nítorí yín, kò sì fetí sí mi; Baba wa sì sọ fún mi pé, “Ó tó! Má sọ̀rọ̀ sí mi nípa èyí mọ́. ²⁷Gun orí òkè Pisga, gbé ojú rẹ sókè sí ìhà ìwọ̀-oòrùn, sí àríwá, sí gúúsù, àti sí ìlà-oòrùn, kí o sì fi ojú ara rẹ wò ó, nítorí ìwọ kì yóò rékọjá Jọdani yìí. ²⁸Ṣùgbọ́n yan Joṣua, mú ọkàn rẹ̀ le, kí o sì fún un ní ìgboyà, nítorí òun ni yóò rékọjá níwájú àwọn ènìyàn yìí, òun ni yóò sì mú kí wọ́n jogún ilẹ̀ tí ìwọ yóò rí.”

²⁹Bẹ́ẹ̀ ni a dúró sí àfonífojì tí ó kọjú sí Beti-peori.