ዘዳግም 3

3 ¹ዞረን ወደ ባሳን የሚወስደውን መንገድ ያዝን፤ የባሳንም ንጉሥ ዐግ ከሕዝቡ ሁሉ ጋራ በኤድራይ ሊዋጋን ወጣ።

²አባታችንም እንዲህ አለኝ፤ “አትፍራው፤ እርሱንና ሕዝቡን ሁሉ ምድሩንም በእጅህ ሰጥቼሃለሁና፤ በሐሴቦን ይኖር የነበረውን የአሞራውያንን ንጉሥ ሴዎንን እንዳደረግህበት እንዲሁ አድርግበት።”

³እንዲሁም አባታችን የባሳንን ንጉሥ ዐግን ሕዝቡንም ሁሉ በእጃችን ሰጠን፤ አንድም ሳያስቀር እስኪጠፉ ድረስ መታናቸው። ⁴በዚያም ጊዜ ከተሞቹን ሁሉ ያዝን፤ ያልያዝነው አንድም ከተማ አልቀረም፤ ስድሳውን ከተማ ሁሉ፣ የአርጎብን አውራጃ ሁሉ፣ በባሳን የነበረውን የዐግን መንግሥት ያዝን። ⁵እነዚህ ሁሉ ከፍ ባለ ቅጥርና በተቈለፈ በር የተጠበቁ ከተሞች ነበሩ፤ ከዚህም ሌላ ቅጥር የሌላቸው እጅግ ብዙ መንደሮች ነበሩ። ⁶የሐሴቦንን ንጉሥ ሴዎንን እንዳደረግን እነርሱን ለጥፋት ለየናቸው፤ ከተማውን ሁሉ፣ ወንዶቹን፣ ሴቶቹንና ሕፃናቱን ለጥፋት ለየን። ⁷እንስሳውን ሁሉና የከተሞቹን ብዝበዛ ግን ለራሳችን ማርከን ወሰድን። ⁸በዚያም ጊዜ ከዮርዳኖስ ማዶ ከነበሩት ከእነዚህ ከሁለቱ የአሞራውያን ነገሥታት ከአርኖን ሸለቆ አንሥቶ እስከ አርሞንኤም ተራራ ድረስ ያለውን ምድር ወሰድን። ⁹(አርሞንኤምን ሲዶናውያን ሲርዮን ይሉታል፤ አሞራውያን ግን ሴኒር ይሉታል)፤ ¹⁰የአምባውን ከተሞች ሁሉ፣ ገለዓድን ሁሉ፣ እስከ ሳሌካና እስከ ኤድራይ ድረስ ያለውን ባሳንን ሁሉ፣ በባሳን የነበሩትን የዐግን የመንግሥት ከተሞች ወሰድን። ¹¹(ከቀሩት ከሬፋውያን የባሳን ንጉሥ ዐግ ብቻ ቀርቶ ነበር፤ አልጋውም የብረት አልጋ ነበር፤ በአሞናውያን ረባት ያለው አይደለምን? ርዝመቱ ዐሥራ ሦስት ጫማ ተኩል፣ ስፋቱም ስድስት ጫማ ያህል ነበር።)። ^a a v11 ሬፋውያን ቀድሞ በከነዓን ይኖሩ የነበሩ የግዙፍ ተዋጊዎች አፈ ታሪካዊ ወገን ነበሩ።

ከዮርዳኖስ በስተ ምሥራቅ የተከፈለው ምድር

¹²በዚያን ጊዜ የወሰድነው ይህ ምድር ይህ ነው፤ በአርኖን ሸለቆ ዳር ካለችው ከአሮዔር አንሥቶ ያለውን፣ ከገለዓድም ተራራማ አገር እኩሌታውንና ከተሞቹን ለሮቤላውያንና ለጋዳውያን ሰጠኋቸው። ¹³የቀረውን የገለዓድ ክፍልና የዐግ መንግሥት የነበረችውን ባሳንን ሁሉ ለምናሴ እኩሌታ ነገድ ሰጠኋቸው፤ የአርጎብን አውራጃ ሁሉ ሰጠኋቸው። (ያ የባሳን ክፍል ሁሉ የሬፋውያን ምድር ይባል ነበር። ¹⁴የምናሴ ልጅ ኢያዕር እስከ ጌሹራውያንና እስከ መዓካውያን ድንበር ድረስ የአርጎብን አውራጃ ሁሉ ወሰደ፤ ባሳንንም እስከ ዛሬ ድረስ በስሙ ሐዎት ኢያዕር ብሎ ሰየማት።)። ¹⁵ለማኪርም ገለዓድን ሰጠሁት። ¹⁶ለሮቤላውያንና ለጋዳውያን ከገለዓድ አንሥቶ እስከ አርኖን ሸለቆ ድረስ—የሸለቆው መካከል ድንበር ሆኖ—እስከ ያቦቅ ወንዝ የአሞናውያን ድንበር ድረስ ያለውን ሰጠኋቸው። ¹⁷ደግሞም ዓረባን፣ ዮርዳኖስ ድንበሩ ሆኖ፣ ከኪኔሬት አንሥቶ እስከ ዓረባ ባሕር (የሙት ባሕር) ድረስ፣ ከፈስጋ ተዳፋት በታች፣ ወደ ምሥራቅ ያለውን ሰጠኋቸው።

¹⁸በዚያም ጊዜ እንዲህ ብዬ አዘዝኋችሁ፤ “አባታችሁ ይህችን ምድር ትወርሷት ዘንድ ሰጥቷችኋል፤ ተዋጊዎቻችሁ ሁሉ የጦር ዕቃ ይዘው ከወንድሞቻችሁ ከእስራኤላውያን ፊት ተሻግረው ይሂዱ። ¹⁹ሚስቶቻችሁ፣ ልጆቻችሁና እንስሶቻችሁ ብቻ—ብዙ እንስሳ እንዳላችሁ ዐውቃለሁ—በሰጠኋችሁ ከተሞች ይቀመጡ፤ ²⁰አባታችን እንደ እናንተ ለወንድሞቻችሁ ዕረፍት እስኪሰጥ፣ እነርሱም አባታችሁ ከዮርዳኖስ ማዶ የሚሰጣቸውን ምድር እስኪወርሱ ድረስ፤ ከዚያም እያንዳንዳችሁ ወደ ሰጠኋችሁ ርስት ትመለሳላችሁ።”

²¹በዚያም ጊዜ ኢያሱን እንዲህ ብዬ አዘዝኩት፤ “አባትህ በእነዚህ በሁለቱ ነገሥታት ያደረገውን ሁሉ ዐይኖችህ አይተዋል፤ አባትህ ወደ ምትሻገርባቸው መንግሥታት ሁሉ እንዲሁ ያደርጋል።

አትፍራ፤ እርሱ ስለ አንተ ይዋጋል

²²አትፍራቸው፤ አባትህ ራሱ ስለ አንተ ይዋጋልና።”

²³በዚያም ጊዜ አባታችንን እንዲህ ብዬ ለመንኩት፤ ²⁴“ጌታ አባቴ ሆይ፣ ታላቅነትህንና ብርቱ እጅህን ለባሪያህ ማሳየት ጀምረሃል፤ በሰማይ ወይም በምድር እንዳንተ ሥራና ኀያል ተግባር ሊያደርግ የሚችል የትኛው አምላክ ነው? ²⁵እባክህ ተሻግሬ ከዮርዳኖስ ማዶ ያለውን መልካሙን ምድር፣ ይህን መልካም ተራራማ አገርና ሊባኖስን አይ ዘንድ ፍቀድልኝ።”

²⁶አባታችን ግን ስለ እናንተ ተቈጣኝ፤ አልሰማኝም፤ አባታችንም እንዲህ አለኝ፤ “ይበቃሃል! ከእንግዲህ ስለዚህ ነገር አትናገረኝ። ²⁷ወደ ፈስጋ ጫፍ ውጣ፤ ዐይኖችህንም ወደ ምዕራብ፣ ወደ ሰሜን፣ ወደ ደቡብና ወደ ምሥራቅ አንሥተህ በዐይኖችህ ተመልከት፤ ይህን ዮርዳኖስ አትሻገረውምና። ²⁸ነገር ግን ኢያሱን ሹመው፤ አበረታታው፤ አጠንክረውም፤ እርሱ ከዚህ ሕዝብ ፊት ይሻገራልና፤ የምታየውንም ምድር ያወርሳቸዋልና።”

²⁹እንዲሁም በቤትፌጎር ትይዩ ባለው ሸለቆ ተቀመጥን።