Ọg Pụtara Ịlụ Ọgụ

Ọg nke Bashan na obodo iri isii ya e wuru mgbidi gburugburu dara dị ka Saịhọn dara, e kewakwara ala ahụ Nna anyị nyere n'etiti Ruben, Gad na ọkara Manase, ndị ikom ha bụ ndị agha ka ga-ebu ngwa agha gafee n'ihu ụmụnne ha. Mosis rịọrọ ka ọ hụ ala ahụ, e zigakwara ya n'elu Pisga.

Isi 3.

Anyị tụgharịrị were ụzọ gaa Bashan, Ọg eze Bashan, ya na ndị ya niile, pụtara ịlụ anyị ọgụ nʼEdrei.

Nna anyị gwara m sị, “Atụla ya egwu, nʼihi na enyela m gị ya, na ndị ya niile, na ala ya; mee ya dịka i si mee Saịhọn eze ndị Amọraịt, onye bi na Heshbọn.”

Ya mere, Nna anyị nyekwara anyị Ọg eze Bashan na ndị ya niile, anyị tigburu ha, hapụghị onye ọbụla dị ndụ. Nʼoge ahụ, anyị dọtara obodo ya niile nʼagha—iri isii niile, o nweghị nke anyị na-edotaghị—mpaghara Agọb niile, bụ alaeze Ọg nʼBashan. Ndị a niile bụ obodo e wusiri ike nke nwere mgbidi dị elu na ọnụ ụzọ ama e ji mkpọrọ kpọchie, tinyere ọtụtụ obodo nta nke na-enweghị mgbidi. Anyị bibiri ha kpamkpam, dịka anyị si mee Saịhọn eze Heshbọn, na-ebibi obodo ọbụla kpamkpam—ụmụ nwoke ya, ụmụ nwanyị ya, na ụmụaka ya. Ma anụ ụlọ niile na ihe nkwata nʼagha nke obodo ndị ahụ ka anyị kwatara maka onwe anyị. Ya mere, nʼoge ahụ, anyị napụrụ eze ndị Amọraịt abụọ a ala ahụ dị nʼofe Jọdan, site na Ndagwurugwu Anọn ruo nʼUgwu Họmọn. (ndị Saịdọn na-akpọ Họmọn Sirịọn, ebe ndị Amọraịt na-akpọ ya Senịa), obodo niile dị nʼelu ugwu larịị, Gịliad niile, Bashan niile ruo Saleka na Edrei—obodo alaeze Ọg nʼBashan. (Naanị Ọg eze Bashan ka fọdụrụ nʼime ndị fọdụrụ nʼụmụ Refaịm. Ihe ndina ya bụ ihe ndina e ji igwe mee; ọ bụ na ọ nọghị na Raba nke ndị Amọn? Ogologo ya dị ihe dịka ụkwụ iri na atọ na ọkara, obosara ya dị ụkwụ isii.). ^a

Nkewa Ala Ahụ Dị nʼỌwụwa Anyanwụ Jọdan

Ala a ka anyị weere nʼoge ahụ: site na Aroea nke dị nʼakụkụ Ndagwurugwu Anọn, tinyere ọkara ala ugwu ugwu Gịliad na obodo ya niile, ka m nyere ndị Rubẹn na ndị Gad. Ihe fọdụrụ nʼGịliad na Bashan niile—bụ alaeze Ọg—ka m nyere ọkara ebo Manase: mpaghara Agọb niile. (A na-akpọ akụkụ ahụ niile nke Bashan ala ndị Refaịm. Jaịa nwa Manase weere mpaghara Agọb niile ruo nʼoke ala ndị Geshua na ndị Maaka, were aha ya kpọọ Bashan, Havọt-Jaịa, ruo taa.). Makia ka m nyekwara Gịliad. Ndị Rubẹn na ndị Gad ka m nyere site na Gịliad ruo Ndagwurugwu Anọn—ebe etiti ya bụ oke ala—ruo nʼOsimiri Jabọk, bụ oke ala ndị Amọn. Tinyere Araba, ebe Jọdan bụ oke ala ya, site na Kinaret ruo nʼOsimiri Araba (bụ Osimiri Nwụrụ Anwụ), nʼokpuru mgbada ugwu Pisga, chere ihu nʼọwụwa anyanwụ.

Nʼoge ahụ ka m nyere unu iwu sị, “Nna unu enyela unu ala a ka unu nweta ya; ndị agha unu niile ga-ejirịrị ngwa agha gafee nʼihu ụmụnne unu, bụ ụmụ Izrel. Naanị ndị nwunye unu, ụmụ unu, na anụ ụlọ unu—amaara m na unu nwere ọtụtụ anụ ụlọ—ga-anọ nʼobodo ndị ahụ m nyere unu, ruo mgbe Nna anyị ga-enye ụmụnne unu izuike dịka o nyere unu, ha onwe ha ewerekwa ala ahụ Nna unu na-enye ha nʼofe Jọdan. Mgbe ahụ, onye ọbụla nʼime unu ga-alaghachi nʼihe nketa ahụ m nyere unu.”

Nʼoge ahụ ka m nyere Jọshụa iwu sị, “Anya gị abụọ ahụla ihe niile Nna gị mere eze abụọ ndị a. Otú ahụ ka Nna gị ga-eme alaeze niile ị na-agafe banye na ha.

Atụla Egwu — Ọ Na-alụrụ Gị Ọgụ

Atụla ha egwu, nʼihi na Nna gị nʼonwe ya na-alụrụ gị ọgụ.”

Nʼoge ahụ, arịọrọ m Nna anyị arịrịọ, na-asị, “Nna m, Onye na-achị ihe niile, ị malitela igosi ohu gị ịdị ukwuu gị na aka gị dị ike. Olee chi ọ bụla dị nʼeluigwe maọbụ nʼụwa nke pụrụ ime ọrụ na ọrụ dị ike dịka nke gị? Biko, kwere ka m gafee hụ ala ọma ahụ dị nʼofe Jọdan, ala ugwu ọma a, na Lebanọn.”

Ma iwe were Nna anyị megide m nʼihi unu, ọ geghịkwa m ntị; Nna anyị gwara m sị, “O zuola! Agwala m okwu banyere ihe a ọzọ. Rigoro nʼelu ugwu Pisga, welie anya gị lee anya nʼọdịda anyanwụ, nʼugwu, na ndịda, na ọwụwa anyanwụ, jiri anya gị abụọ hụ ya, nʼihi na ị gaghị agafe Jọdan a. Kama nye Jọshụa ọrụ, gbaa ya ume, mekwaa ka o sie ike, nʼihi na ọ ga-agafe nʼihu ndị a, meekwa ka ha keta ala ahụ ị ga-ahụ dịka ihe nketa ha.”

Ya mere, anyị nọgidere na ndagwurugwu ahụ chere Bet-Peọ ihu.