Og Lorai Koribole Ulai Ahhise
Bashan laga Og aru tar saath ta deyal thaka sohor khan Sihon nisena giri jai, aru amar Pitri pora diya desh tu Reuben, Gad aru Manasseh laga adha ke bhag kori dise, aru taikhan laga lorai kora manuh khan to tinu bhi hathiyar loi kene taikhan laga bhai khan age te paar hobo lage. Moses pora desh tu sabole mange aru tai ke Pisgah te uthai pathai dise.
3 1Amikhan ghuri kene Bashan laga rasta te jaise, aru Bashan laga raja Og, tar manuh khan sob logote, Edrei te amikhan ke lorai koribole ulai ahhise.
2Aru amar Pitri pora moi ke koise, “Tar ke bhoi nakoribi, kilemane Moi tar ke, tar manuh khan sob ke, aru tar mati ke tumi ke di dise; Heshbon te thaka Amor khan laga raja Sihon ke tumi kora nisina, tar ke bhi kori dibi.”
3Titia amar Pitri pora Bashan laga raja Og aru tar manuh khan sob ke bhi amikhan ke di dise, aru amikhan tarkhan ke mari dise, ekjon bhi bachi thaka nai. 4Hei somoite amikhan Argob laga gaon sob, Bashan te thaka Og laga rajyo laga sheher khan sob dhori loise—sothi ta sob, ekta bhi nolua nai. 5Eitu khan sob usa dewal aru bondh kora dorja pora mojbut kora sheher thakise, aru dewal nathaka bisi gaon khan bhi thakise. 6Amikhan tarkhan ke khotom kori dise, Heshbon laga raja Sihon ke kora nisina, sheher ekta ekta—tar manuh khan, mahila khan, aru bacha khan ke khotom kori dise. 7Kintu janwar khan sob aru sheher khan laga dhun-sompoti amikhan nijor nimite loot kori loise. 8Titia hei somoite amikhan Jordan laga opar phale, Arnon ghati pora Hermon pahar tak, eitu duijon Amor khan laga raja pora mati loise. 9(Sidon manuh khan pora Hermon ke Sirion koi, kintu Amor khan pora etu ke Senir koi), 10samtol jaga laga sheher khan sob, Gilead sob, aru Salecah aru Edrei tak Bashan sob, Bashan te thaka Og laga rajyo laga sheher khan—eitu sob amikhan loise. 11(Khali Bashan laga raja Og he Rephaim khan laga bachi juwa pora thaki jaise. Tar bisna tu loha laga bisna thakise; etu Ammon khan laga Rabbah te nai naki? Etu tera-ada feet lamba aru choi feet chaura thakise.). a a v11 Rephaim khan ekta purana kahani laga dangor lorai kora manuh khan laga jat thakise, jun khan age te Canaan te thakise.
Jordan Purab Phale Mati Bhag Korise
12Hei somoite amikhan loa etu mati: Arnon ghati laga kinar te thaka Aroer pora, aru Gilead laga pahari desh laga adha aru tar sheher khan, moi Reuben aru Gad laga manuh khan ke di dise. 13Bachi juwa Gilead aru Bashan sob—Og laga rajyo—moi Manasseh laga adha-jat ke di dise: Argob laga gaon sob. (Bashan laga hei bhag sob ke Rephaim laga mati koi thakise. 14Manasseh laga putro Jair pora Geshur aru Maacath laga simana tak Argob laga gaon sob loise, aru Bashan ke nijor nam pora Havvoth-jair koi kene matise, juntu aji tak ase.). 15Aru Machir ke moi Gilead di dise. 16Reuben aru Gad laga manuh khan ke moi Gilead pora Arnon ghati tak—ghati laga majkhan tu simana ase—aru Jabbok nodi, Ammon khan laga simana tak, di dise. 17Aru Arabah, Jordan tu tar simana, Chinnereth pora Arabah laga samundar tak (mane Mora Samundar), Pisgah laga dhal laga nichete, purab phale—eitu sob moi di dise.
18Hei somoite moi tumikhan ke hukum dise, “Tumar Pitri pora tumikhan ke etu mati adhikar koribole di dise; tumikhan laga lorai kora manuh khan sob hathiar loi kene tumar bhai khan, Israel khan laga age te paar hobo lage.” 19“Khali tumikhan laga maiki khan, bacha khan, aru janwar khan—tumikhan logote bisi janwar ase moi jane—moi tumikhan ke diya sheher khan te thakibi,” 20“jitia tak amar Pitri pora tumikhan ke diya nisina tumar bhai khan ke bhi aram nadiye, aru tarkhan bhi Jordan laga opar phale tumar Pitri pora tarkhan ke diya mati nolua tak. Titia tumikhan sob-jon moi tumikhan ke diya adhikar te wapas jabi.”
21Hei somoite moi Joshua ke hukum dise, “Tumar Pitri pora eitu duijon raja ke kora sob tumar nijor suku pora dikhise. Tumi jun rajyo khan te paar koribo tai, tumar Pitri pora etu khan sob ke bhi eneka he koribo.”
Bhoi Nakoribi — Tar he Tumikhan Nimite Lorai Koribo
22“Tarkhan ke bhoi nakoribi, kilemane tumar Pitri nijor he tumikhan nimite lorai koribo.”
23Aru hei somoite moi amar Pitri logote binti kori kene koise, 24“Hey moi laga Adhipati Pitri, Apuni laga bisalta aru takot thaka hath Apuni laga noukar ke dikhabole shuru korise. Sorgo te nahole prithibi te kun isor Apuni kora nisina kaam aru mohan kaam khan koribo pare?” 25“Moi ke paar hobole anumoti dibi aru Jordan laga opar phale thaka bhal mati, eitu bhal pahari desh, aru Lebanon ke sabole dibi.”
26Kintu amar Pitri tumikhan karone moi uporte khong uthise aru moi laga kotha huna nai; amar Pitri pora moi ke koise, “Bisi hoise! Etu kotha moi ke aru nakobi.” 27“Pisgah laga chuti te uthibi, tumar suku paschim, uttar, dakshin, aru purab phale uthai kene tumar nijor suku pora sabi, kilemane tumi etu Jordan paar nakoribo.” 28“Kintu Joshua ke hukum dibi, tar ke mon dangor koribi aru takot dibi, kilemane tai etu manuh khan laga age te paar koribo aru tumi dikha mati tarkhan ke uttoradhikar hisab te di dibo.”
29Titia amikhan Beth-peor laga thik samne ghati te thaki jaise.