Khalatlui 3

3 ¹Ithumna ngareikhuida Bashan shongfa eina shanga. Chitharan Bashanwui awunga Ogna awui mibing saikorali thānda ithumli ngarar khavai Edre-ili shoka.

²Kala ithumwui Avāna ili hānga, "Ali mangacheealu, kaja ina ali, awui mi saikora, kala awui ngalei nawui pāngli horsangmihaira; Heshbonli kapama Amorwui awunga Sihonli nana kasā thāda, alila sālu."

³Chithāda sāda ithumwui Avāna Bashanwui awunga Og kala awui mi saikorali ithumwui pāngli horsangmi, kala ithumna athumli sāthatserhaida khipākha mataimana. ⁴Chitharan ithumna Bashanli khalei Ogwui wungram, Argobwui ram katongawui keinung hangtharuk saikora khuihaowa; makhui akhala maleimana. ⁵Hi saikora phākho kajui kala ngavei kakhāwui raipan sākahai keinungna; chi hailaga phākho makhalei kha̱ kachungkha lei. ⁶Ithumna Heshbonwui awunga Sihonli kasā thāda athumli peichaoda sāthatserhaowa; keinung kachiva̱wui sha̱nao, mayarnao kala naoshinao sāthatserhaowa. ⁷Kha sha̱kei saikora kala keinungbingwui ngaponkakhui chi ithumna khalattawui vang ngaponkhui. ⁸Chitharan ithumna Jordan zingshoshong khalei Amorwui awunga khani hibingwui eina, Arnon tampāk eina thuilaga Harmon Kaphung vāshungda, ngalei chi khuihaowa. ⁹(Sidonnaobingna Harmonli Sirion hoi, kha Amornaobingna chili Senir hoi), ¹⁰kaphung khangani keinung saikora, Gilead saikora, Salecah kala Edre-i vāshungda Bashan saikora, Bashanli khalei Ogwui wungram keinungbing chi ithumna khuihaowa. ¹¹(Rephaimwui shākkahai ngachaili Bashanwui awunga Og maningla taishoka. Awui pet chi mariwui pet sai; chi Ammonnaobingwui Rabbahli maleimala? Chi asān khuining tharāda kathum shāphangā, kala aret khuining tharukna.). ^a a v11 Rephaimbing chi kasāngkha Canaan ngaleili pamda leikahai, mi kahakyur raimibingwui ngayur akhana.

Jordan Zingshoshong Khalei Ngalei Ngayarkhaiya

¹²Chitharan ithumna khuikahai ngalei chiya: Arnon tampākwui akatangli khalei Aroer eina thuilaga, kala Gilead kaphungramwui tangkhai kala chiwui keinungbing, ina Reubenwui mibing kala Gadwui mibingli mi. ¹³Gilead taida khaleibing, kala Ogwui wungram Bashan saikora, chiya Argobwui ram katonga, ina Manasseh shang tangkhaili mi. (Bashan ram saikora chi Rephaimwui ngalei da hoi. ¹⁴Manassehwui nao Jairna Argobwui ram katonga Geshurbing kala Ma-acathwui thari vāshungda khuihaowa, kala aja rāshungda Bashanli akhalattawui ming eina Havvoth-jair hoi.). ¹⁵Kala ina Machirli Gilead mi. ¹⁶Reubenwui mibing kala Gadwui mibingli, Gilead eina thuilaga Arnon tampāk, tampāk alungthung chi thari sāda, kala Jabbok kong vāshungda, Ammonbingwui thari eina tangda ina mi. ¹⁷Kala Arabah, Jordan chiwui thari sai, Chinnereth eina thuilaga Arabah Ngayi (Kathi Ngayi) vāshungda, zingshoshongli, Pisgah kaphungpheili azingshong khalei ngalei chila ina mi.

¹⁸Atam chitharan ina nathumli kasoda hānga, "Nathumwui Avāna nathumli ngalei hi shimlui sākhavai mihaira; nathumwui rai kapinga saikora raisāri shaksāda nachināngarā, Israelwui mibingwui mangāli kānkāra. ¹⁹Nathumwui preiva̱ngarā, naoshinaobing, kala sha̱keibing maningla (nathumli sha̱kei kachungkhana lei kaji ina thei) ina nathumli mikahai keinungbingli pamsāra, ²⁰ithumwui Avāna nathumli ngasak kahai athishurda nachināngarāli ngasāmkhui ngasakta, kala athumnala nathumwui Avāna athumli khami Jordan kānda khalei ngalei chi khuikahai tharan, nathum kachiva̱na ina nathumli mikahai shimlui chili hanungra."

²¹Atam chitharan ina Joshuali kasoda hānga, "Nathumwui Avāna awunga khani hibingli sākahai saikora chi namik eina theihaira. Nathumwui Avāna nathumna kānvāki kaji wungram saikorali chithāda sāra.

Mangacheealu — Ana Nathumwui Vang Ngararmira

²²Athumli mangacheealu, kaja nathumwui Avā akhalattana nathumwui vang ngararmira."

²³Kala atam chitharan ina ithumwui Avāli seihā sāda hānga, ²⁴"Iwui amei Avā, nana narao ili nawui reikhamatai kala nawui pangshapa pāng chi chitheihaophok kahaina. Kazingramli lah okathuili nawui thāda ot kala hakkhamahā ot khipā varena sāshaprakhala? ²⁵Ina Jordan kānlaga khalei khamathā ngalei chi, hi khamathā kaphung, kala Lebanon theikhavai ili khamayāmilu."

²⁶Kha nathumwui vang eina ithumwui Avāna ilila malungvātta, kala ili mashāmithuwa; ithumwui Avāna ili hānga, "Shapaira! Hi maramli ili latluida mahānglakalu. ²⁷Pisgahwui kaphungtonli kālu, namik zingtunshong, atungshong, azingshong, kala zingshoshongli yangkālu, kala namik eina yanglu, kaja nana Jordan hi makānmara. ²⁸Kha Joshuali ot chisinlu, ali kasatsangmilu kala pangngasakmilu, kaja ana mibing hiwui mangāli kānra kala nana theiki kaji ngalei chi athumwui shimlui sāda athumli mira."

²⁹Chithāda sāda ithum Beth-peorli kāroda khalei tampākli pamsai.