Manda Og Si Kobargei
Ki manda Og laitoryatap Bashan ak nganasookyik pogol somok che tinyei irimoik, ko uu ye kigobut Sihon, ak kigeibagach emet ne kigoonu Kwandanyo kwenutap Reuben, Gad, ak kebebertap Manasseh, ago kanyool murenikwak che poorei kolanda kotai eng' tupchosyekwak kotinyei kaik. Ki saaei Musa kole koger emet, ak kiyookto kotogoste Pisga.
Ng'alaali Kwandanyo eng' mustarisyek 2, 26–28
3 1Ki kiweek ak kinam ooreet ne wendi Bashan, ak ki manda Og laitoryatap Bashan ak piikyik tugul, kwo kobargei ak acheek eng' Edrei.
2Ak ki leenjo Kwandanyo, “Mataniin ineendet, amu kaguutin ineendet, ak piikyik tugul, ak emennyi; iyachi ineendet ko uu ye kiyai Sihon laitoryatap Amorik, ne ki menyei Hesbon.”
3Ki guutech kora Kwandanyo Og laitoryatap Bashan ak piikyik tugul, ak kikipar, kot koma kimete agot agenge ne ki ng'et. 4Ki kinam eng' peetuunooto nganasookyik tugul—nganasook tugul tamanwogik lo, ma kimete agenge ne ma kinam—komoswek tugul che po Argob, laitornatetap Og eng' Bashan. 5Nganasochu tugul ko ki nganasook che king'ootaat che tinyei irimoik che kooen ak kurgotik che king'et, kobooto nganasook che chaang' miising' che ma tinyei irimoik. 6Ki king'em kogees icheek, ko uu ye kiyai Sihon laitoryatap Hesbon, king'em kogees nganaseet age tugul—piik, kwonyiik, ak lagok. 7Ago tuuga tugul ak tuguuk che ki kiluul eng' nganasook, ki kinam koek kabunjech. 8Ki kinam anyun emet eng' peetuunooto eng' laitorinichu aeng' po Amorik che ki mi Jordan pitoniin, kobooch atebweetap Arnon agoi tulweetap Hermon. 9(kuure Sidonik Hermon Sirion, ago kuure Amorik Senir), 10nganasook tugul che po warenget, Gilead tugul, ak Bashan tugul agoi Saleka ak Edrei—nganasook che po laitornatetap Og eng' Bashan. 11(Ki ng'et kityo Og laitoryatap Bashan eng' Repaik che ki ng'et. Ki po iron kiigennyi; tos ma mi Rabbah ne po lagogap Ammon? Ki kooen futisyek taman ak somok ak kebeberta, ak koyolu futisyek lo.). a a v11 Ki Repaik pororyet ne po murenik che eechen miising' che ki menyei emetap Kanaan eng' kasaaisyek che kiisiir.
Kipchei Emet eng' Jordan Komostap Kong'asiis
12Ni emet ne ki kinam eng' peetuunooto: kobooch Aroer ne tononi eng' tabandap atebweetap Arnon, ak kebebertap emetap tuloonoogap Gilead ak nganasookyik, ki aguutin piigap Reuben ak che po Gad. 13Ki aguutin kebebertap pororyetap Manasseh Gilead ne ki ng'et ak Bashan tugul—laitornatetap Og—komoswek tugul che po Argob. (Ki kiguure Bashan tugul nooto emetap Repaik. 14Ki nam Jair weeriitap Manasseh komoswek tugul che po Argob kot koit kiwoteet ne po Gesurik ak Maakatik, ak kotoochi Bashan kainennyi inegei, Habot-jair, agoi ra.). 15Ak ki aguutin Makir Gilead. 16Ki aguutin piigap Reuben ak che po Gad kobooch Gilead kot koit atebweetap Arnon—kwenutap atebwonooto ko kiwoteet—agoi aineetap Jabbok, ne kiwotetap lagogap Ammon. 17Kobooto Arabah, ne ki Jordan kiwotennyi, kobooch Kineret agoi nyanjetap Arabah (nooto Araraitap Munyuk), ne miitei chepkeigeusyegap Piska keel, komostap kong'asiis.
18Ki ang'atook eng' peetuunooto, “Kaguutin Kwandang'wong' emennii si inyaban; nyolu kolanda murenigwong' tugul che po lugeet che namaat kaik eng' taitap tupchosyekwok, piigap Israel. 19Kwonyiikwong' kityo, lagok ak tuuga—angen ile otinye tuuga che chaang'—omenye eng' nganasook che kaaguutin, 20agoi koguutin Kwandanyo tupchosyekwok mogornateet ko uu ye kaguutin okweek, ak konam kora emet ne guutin Kwandang'wong' eng' Jordan pitoniin. Yeityo koweekyigei age tugul eng' okweek eng' olooto ki aguutin.”
21Ki ang'at Joshua eng' peetuunooto, “Kogeer konyeguk inyegei tugul che ki yai Kwandang'ung' laitorinichu aeng'. Yaei Kwandang'ung' ko uu nooto laitornatosyek tugul che ilandoi koba.
Mataniin—Yaei Lugeet Agobo Inyee
22Mataniin icheek, amu Kwandang'ung' inegei ne yaei lugeet agobo inyee.”
23Ak ki asaa Kwandanyo eng' peetuunooto, ale, 24“Kwanda, Kiptaiyannyu, katau ande iboorchi otwogindeng'ung' etunateng'ung' ak eutap kimnateng'ung'. Ng'o kamuktaindet ne mi kipsengwet anan ng'wony ne imuuch koyai poisyonik ak kiisiek che eechen ko uu che ung'ung'? 25Asaain, alanda si ageer emet ne myee ne mi Jordan pitoniin, emetap tuloonook ne myee nii, ak Lebanon.”
26Ago kinereech Kwandanyo agobo okweek ak koma kas asanenyu; ki leenjo Kwandanyo, “Kagoik! Mata ng'alaalwo kora agobo kiit ni. 27Togos tulweetap Piska parak, ing'eeng' konyeguk ole kong'ulustoi asiista, kaataam, murot tai, ak komostap kong'asiis, ak igeer eng' konyeguk inyegei, amu ma ilanda Jordan ni. 28Ago ang'at Joshua, igaigai ak igimit ineendet, amu kolanda ineendet eng' taitap pichu ak koguutin icheek emet ne igeer si koek kayaabennywa.”
29Ki kimenye anyun eng' atebweet ne tokyingei Beth-peor.