Ogu Oimagara Gũũka Kũrũa

Ogu wa Bashani na matũũra make mĩrongo ĩtandatũ marĩ na thingo makĩgũa o ta Sihoni, naguo bũrũri ũrĩa Ithe witũ aaheete ũkĩgayanio Rubeni, Gadi na nuthu ya Manase, arĩa andũ ao a mbaara maarĩ o na bata wa kũringa mbere ya ariũ a ithe wao marĩ na indo cia mbaara. Musa akĩũria oone bũrũri ũcio, agĩtũmwo ahaice Pisiga.

Gĩcunjĩ 3.

Nĩ twagarũrũkire tũkĩnyiita njĩra ya gũthiĩ Bashani, nake Ogu mũthamaki wa Bashani, hamwe na andũ ake oothe, akiumĩra agũũka kũrũa na ithuĩ kũu Edirei.

Nake Ithe witũ akĩnjĩĩra atĩrĩ, “Ndũkamwĩtigĩre, nĩgũkorwo nĩndakũneete we, na andũ ake oothe, na bũrũri wake; ũmwĩke o ũrĩa weekire Sihoni mũthamaki wa Aamori, ũrĩa watũũraga Heshiboni.”

Nĩ ũndũ ũcio Ithe witũ agĩtũneana o nake Ogu mũthamaki wa Bashani na andũ ake oothe, tũkĩmahũũra tũkĩmaniina, tũtiatigia mũndũ o na ũmwe ũtigaire muoyo. Hĩndĩ ĩyo nĩ twatunyanire matũũra make moothe manene—mothe mĩrongo ĩtandatũ, gũtirĩ o na rĩmwe twaagire kũnyiita—rũgongo ruothe rwa Arigobu, ũthamaki wa Ogu kũu Bashani. Matũũra macio moothe maarĩ mairigĩĩre na thingo iraaya na ihingo cia kũhingwo na mĩgĩĩko, hamwe na tũtũũra tũingĩ mũno tũtaarĩ na rũirigo. Nĩ twamaniinire biũ, o ta ũrĩa twekĩte Sihoni mũthamaki wa Heshiboni, tũkĩniina o itũũra o itũũra—arũme aakuo, na atumia, na ciana. No mahiũ moothe na indo iria twataahire matũũrainĩ macio, nĩ twecuukĩire ithuĩ ene. Nĩ ũndũ ũcio hĩndĩ ĩyo nĩ twatunyire athamaki acio eerĩ a Aamori bũrũri wao mũrĩmo ũrĩa ũngĩ wa Jorodani, kuuma Gĩtuamba kĩa Arinoni nginya Kĩrĩma kĩa Herimoni. (Asidoni meetaga Herimoni Sirioni, nao Aamori makamũĩta Seniri), matũũra moothe ma werũinĩ ũrĩa mwaraganu, Gileadi guothe, na Bashani guothe nginya Saleka na Edirei—matũũra ma ũthamaki wa Ogu kũu Bashani. (No Ogu mũthamaki wa Bashani wiki watigaire wa matigari ma Arefai. Ũrĩrĩ wake warĩ ũrĩrĩ wa kĩgera; githĩ ndũrĩ kũu Raba kwa Aamoni? Waarĩ na ũraihu wa ta buti ikũmi na ithatũ na nuthu, na wariĩ wa buti ithanthatũ.). ^a

Bũrũri Kũgayanio Mwena wa Irathĩro wa Jorodani

Bũrũri ũyũ nĩguo twanyiitire hĩndĩ ĩyo: kuuma Aroeri ĩrĩa ĩrĩ mũthiainĩ wa Gĩtuamba kĩa Arinoni, hamwe na nuthu ya bũrũri wa irĩma wa Gileadi na matũũra makuo, nĩndaheire andũ a Rubeni na a Gadi. Gileadi ĩrĩa yatigara na Bashani guothe—ũthamaki wa Ogu—nĩndaheire nuthu ya mũhĩrĩga wa Manase: rũgongo ruothe rwa Arigobu. (Gĩcigo kĩu gĩothe kĩa Bashani kĩetagwo bũrũri wa Arefai. Jairi mũrũ wa Manase akĩnyiita rũgongo ruothe rwa Arigobu nginya mũhaka wa Ageshuri na Amaakathi, akĩĩta Bashani na rĩĩtwa rĩake mwene, Havothu-jairi, nginya ũmũthĩ.). Nake Makiri nĩndamũheire Gileadi. Andũ a Rubeni na a Gadi nĩndamaheire kuuma Gileadi nginya Gĩtuamba kĩa Arinoni—gatagatĩ kakĩo nĩkĩo mũhaka—nginya Rũũĩ rwa Jaboko, mũhaka wa Aamoni. O na Araba, Jorodani ĩrĩ mũhaka wayo, kuuma Kinerethu nginya Iria rĩa Araba (Iria rĩrĩa Rĩkũũ), rungu rwa iharũrũka cia Pisiga, mwena wa irathĩro.

Hĩndĩ ĩyo nĩndamwathire atĩrĩ, “Ithe wanyu nĩamũheete bũrũri ũyũ ũtuĩke wanyu; arũme anyu othe a mbaara no mũhaka maringe meeohete indo cia mbaara mbere ya ariũ a ithe wanyu, andũ a Isiraeli. No atumia anyu, na ciana cianyu, na mahiũ manyu—nĩnjũũĩ atĩ mũrĩ na mahiũ maingĩ—nĩmaikare matũũrainĩ marĩa ndamũheire, nginya rĩrĩa Ithe witũ akaahe ariũ a ithe wanyu ũhurũko o ta ũrĩa amũheete inyuĩ, nao o nao makaanyiita bũrũri ũrĩa Ithe wanyu araamahe mũrĩmo ũrĩa ũngĩ wa Jorodani. Hĩndĩ ĩyo o mũndũ wanyu agaacooka igai rĩrĩa ndamũheire.”

Hĩndĩ ĩyo nĩndathire Joshua atĩrĩ, “Maitho maku we mwene nĩmoonire ũrĩa wothe Ithe waku eekire athamaki aya eerĩ. Ithe waku noguo ageeka mothamaki mothe marĩa ũracooka kũringĩra.

Ndũgetigĩre — Nĩwe Ũrakũrũĩrĩra

Ndũkametigĩre, nĩgũkorwo Ithe waku we mwene nĩwe ũrakũrũĩrĩra.”

Nake hĩndĩ ĩyo nĩndathaithire Ithe witũ, ngĩmwĩra atĩrĩ, “Wee Ithe wakwa Mwathani, nĩwambĩrĩirie kuonia ndungata yaku ũnene waku na guoko gwaku kũrĩ na hinya. Nĩ ngai ĩrĩkũ ĩrĩ igũrũ kana thĩ ĩngĩhota gwĩka ciĩko na maũndũ manene ta maku? Ndagũthaitha reke ndĩringe mũrĩmo ũrĩa ũngĩ, nyone bũrũri ũrĩa mwega ũrĩ mũrĩmo wa Jorodani, bũrũri ũyũ mwega wa irĩma, na Lebanoni.”

No Ithe witũ nĩandakarĩire nĩ ũndũ wanyu, akĩrega kũnjigua; Ithe witũ akĩnjĩĩra atĩrĩ, “Nĩkũigana! Ndũgacooke kwaria na niĩ ũhoro ũcio rĩngĩ. Haica gacũmbĩrĩ ka Pisiga, ũtiire maitho maku na ithũĩro, na gathigathini, na gũthini, na irathĩro, wĩonere na maitho maku we mwene, nĩgũkorwo ndũkũringa Jorodani ĩno. No rĩrĩ, atha Joshua, ũmũũmĩrĩrie na ũmwĩkĩre hinya, nĩgũkorwo nĩwe ũkũringa mbere ya andũ aya, na nĩwe ũkaamahe bũrũri ũrĩa ũkoona ũtuĩke igai rĩao.”

Nĩ ũndũ ũcio tũgĩikara gĩtuambainĩ kĩrĩa kĩngʼetheire Bethi-peori.