Kuurei Ng'omnateet Oliny
Chiito ko Ng'omnateet yu, koriircho eng' ortinwek ole imuuchi age tugul kokas, ma kiibisyin among che ng'omen kityo. Kole eng' ineendet kolaitornatei laitorinik, yeityo koweekta kogeny, ki kisich eng' Kwandanyo ye ta koyaei kiy age tugul, komi ye kiyaei ng'wony, koboiboitune eng' ineendet ak eng' piik.
8 1Tos ma kuurei Ng'omnateet, ak kotoroor kaguiyet tweguunennyi? 2Tononi ineendet eng' komoswek che torooreen che mi ooreet, ole tuiyo ortinwek. 3Eng' ole neegit kurgotik, eng' kurgeetap nganaseet, koriircho miising' eng' kurgotik: 4“Akuurok okweek, piik tugul; koityi tweguunennyu piik tugul che po ng'wony. 5Okweek che matinyei kiy, onai utaatyet; okweek che perber, osich muguleldo ne tinyei kaguiyet. 6Ogas, amu ang'alaali tuguuk che torooreen, ak karaaran tugul che amwae. 7Mwaei kutinnyu imanda, amu wechei kutusweekyuk tengekto. 8Po imanda ng'aleek tugul che po kutinnyu; ma mi age eng' icheek ne ngelelyo anan ne mastaat. 9Eng' ineendet ne iguiye ko tiliileen tugul, ak karaaran eng' che nyooru naet. 10Nam kaneetisyennyu kosiir fedha, ak naet kosiir thahabu ne leweenen, 11amu siirei ng'omnateet koiik che kiguure peninim, ak ma mi kiy ne imache ne kiroge ineendet.
12Anee, Ng'omnateet, amenye ak utaatyet, ak anyooru naet ak ruchiinet. a a v12 Ng'omnateet ne ng'alaalei yu kosuldotunotet eng' Jeso, ne kuurei Paulo ng'omnateetap Kamuktaindet — 1 Korintho 1:24, 30. 13Iywetap Kwandanyo ko kowech ne ya. Aweche menateet ak menoteet, ooreet ne ya, ak ng'aleek che imaasat. 14Po anee rwooyet, ak utaatyet ne komyee; anee ko kaguiyet; po anee kimnateet. 15Eng' anee kolaitornatei laitorinik, ak kong'at kirwoogik ne imanat; 16eng' anee korwookyi pounik, ak piik che taagunotiin—che irwookyi tugul eng' imanda. 17Achame che chamei anee, ak nyooru anee che cheeng'ei anee. 18Mi anee mogornatosyek ak teegisto, mogornateet ne tebyei ak imanda. 19Siirei logoiywekyuk thahabu, ak thahabu ne leweenen miising', ak ne koonu kosiirei fedha ne leweenen. 20Awendi eng' ooreetap imanda, eng' ortinwegap imanat, 21Agoochi mogornateet koek poroteet che chamei anee, ak aisiepi konoraikwak.
22Ki koono Kwandanyo anee eng' taunetap ooreennyi, komong'u poisyonikyik che po keny. b b v22 Ng'omnateet — Weeriit — ki koono, ma ki yai; po Kwandanyo ineendet kobun koigeny tugul, kobooto saboondanyi komong'u koyaak kiy age tugul. 23Ki kigimit anee kobun agesen che po keny, kobun taunet, komong'u kotaune ng'wony. 24Ye ki ma mi peek che po rireet, ki koono anee, ye ki ma mi kong'ik che kutune peek. 25Komong'u kogimitsogei tuloonook, komong'u tuloonook che mengeechen, ki koono anee, 26Ye ma taga koyai ng'wony ak imbarenikyik, anan temburyek ne po tai ne po ng'wony. 27Ye ki igimit kipsengwet, ki ami anee; ye ki igoito karagendoet eng' taitap rireet, 28Ye ki igimit poolik che po parak, ye ki igimit kong'igap rireet, 29Ye ki igoochi araoet kiwotennyi si mata kosiir peek kiwotetokwak, ye ki imaar lumeiywegap ng'wony, 30Ki ami anyun neegit ineendet ko uu musogindet ne ng'oom, ak ki aegu boiboiyennyi ne po peetuut age tugul, abaibaitune eng' tainnyi koigeny, c c v30 Mwaei lewenisyek alak che po keny 'lakweet ne ming'in' yu komisto 'musogindet ne ng'oom,' koboorto ng'omnateet ko uu lakweet ne boiboitunei neegit Kwanda. 31Abaibaitune eng' ng'wonyennyi komugul, ak aboiboitunei pororyetap piik.
32Ak nguno, lagoguk, ogas ineenyu: iberuurotin che riibei ortinwekyuk. 33Ogas kaneetisyet ak oegu ng'oom; omeuny. 34Iberuurotin chiito ne kasei anee, ne geerei peetuut age tugul eng' kurgotikyuk, koriip neegit kurgennyu. 35Amu age tugul ne nyooru anee konyoor saboondo ak konyoor myeeindo kobun Kwandanyo. 36Ago age tugul ne ma nyooru anee koyaach saboondanyi; che wechei anee tugul kochamei meet.”