Buddhi Jorse Mati ase

Iate Buddhi ekjon manuh nisena ase, jun rasta te chiyari ase jate sob manuh huni pare, jankar manuh khan majot lukai kene rakha nohoi. Tai koi raja khan tai pora he raj kore, aru pichete aru pichete jai: gehra pani khan age te amar Pitri pora tai ke anise, prithibi bona homoi te tai ta te thakise, aru etu ke aru manuh khan ke saabi kene khushi hoise.

Adhyay 8.

Buddhi pora mati nathake naki, aru samaj pora Tar awaj uthai nathake naki? Rasta laga uncha jaga khan te, rasta khan mili juwa thaai te, Tai khara hoi thake. Sahar laga dorja khan usorte, sahar bhitor juwa jagate, dorja mukh khan te Tai jorse mati ase: “Tumikhan ke, sob manuh ke, Moi mati ase; Moi laga awaj sob manuh jati te pugi ase. Tumikhan kun gyaan nathaka ase, hoshiyari sikhibi; tumikhan kun murkho ase, bujhibo para mon lobi. Huni bi, kilemane Moi bhal-dangor kotha koi ase, aru Moi kowa sob kotha thik ase. Moi laga mukh pora hosa kotha ulai, kilemane Moi laga oth pora dusta kaam ke ghin kore. Moi laga mukh laga sob kotha dhormik ase; eitu khan majot ekta bhi tera-bang nohoi. Kun pora bujhi pare, tar nimite eitu sob sapha ase, aru kun pora gyaan pai, tarkhan nimite thik ase. Chandi laga bodli te Moi laga sikhani lobi, aru bhal suna laga bodli te gyaan lobi, kilemane buddhi tu moni-mukta pora bhi bhal ase, aru tumi itcha kora eku bhi tai logot tulona koribo napare.

Moi, Buddhi, hoshiyari logot te thake, aru Moi gyaan aru soch-bichar pai. ^a Amar Pitri ke bhoi kora tu biya kaam ke ghin kora ase. Ahankar aru ghamondi, biya rasta, aru ulta-palta kotha, eitu khan ke Moi ghin kore. Salah tu Moi laga ase, aru bhal buddhi bhi; Moi bujhi-samaj ase; takot Moi laga ase. Moi pora raja khan raj kore, aru cholawta khan pora ki thik ase hukum diye; Moi pora rajkumar khan raj kore, aru dangor manuh khan, prithibi raj kora sob, niyai pora raj kore. Moi morom kore kun pora Moi ke morom kore taikhan ke; aru kun pora Moi ke mon dikene bisare, taikhan pora Moi ke pai. Moi logot te dhun-sompoti aru sonman ase, hodai thaka dhun aru dharmikota ase. Moi laga phol tu suna pora bhi bhal ase, sobse bhal suna pora bhi, aru Moi diya tu bhal chandi pora bhi dangor ase. Moi dharmikota laga rasta te berai, niyai laga rasta khan te berai thake, kun pora Moi ke morom kore taikhan ke adhikar hisab te dhun di kene, aru taikhan laga bhandar khan bhorti kori diye.

Amar Pitri pora Tar kaam laga shuru te Moi ke jonom dise, Tar purana kaam khan sob age te. ^b Age laga yug khan pora Moi ke sthapona korise, shuru pora, prithibi shuru nohua age te. Jitia gohin pani eku nathakise, titia Moi ke jonom dise, jitia pani pora bhorta thaka jhorna khan nathakise. Pahar khan sthapona nohua age te, tilla khan age te, Moi ke jonom dise, jitia tak Tai prithibi aru tar kheti khan bona nai thakise, nahole prithibi laga poila dhuli bhi. Jitia Tai akas khan thik jagate rakhise, titia Moi ta te thakise; jitia Tai gohin pani laga upor te gol ekta tanise, jitia Tai upor te akas khan thik rakhise, jitia Tai gohin pani laga jhorna khan sthapona korise, jitia Tai samundar nimite tar simana bandi dise, titia pani khan tar simana paar nokoribo nimite, jitia Tai prithibi laga bhetimul khan thik kori dise, titia Moi ekjon kushol karigor nisena Tar usorte thakise, aru Moi hodai Tar khushi thakise, hodai Tar age te anond kori thakise, ^c Tar guru prithibi te anond kori kene, aru manuh jati logot te khushi pai thakise.

Aru etiya, Moi laga bacha khan, Moi ke huni bi: kun pora Moi laga rasta khan rakhe taikhan dhonyo ase. Sikhani ke huni bi aru gyaani hobi; eitu ke chari nadibi. Dhonyo ase kun pora Moi ke hune, hodai Moi laga dorja te rukhi kene, Moi laga dorja mukh te rukhi thake. Kilemane kun pora Moi ke pai tai jivon pai, aru amar Pitri pora anugrah pai. Kintu kun pora Moi ke napai, tai nijor jivon ke nuksan kore; kun pora Moi ke ghin kore taikhan sob mrityu ke morom kore.”