Laa 18

18 ¹Ina nali leishi, iwui Avā, iwui pangshapa. ²Iwui Avā iwui lunghār kala iwui raipan kala iwui ngachonkhamena; iwui Avā, iwui lunghār, ali ina ngayinkhui, iwui chāngvei, kala iwui huikhame pangshap, iwui ngayin khavaipam. ³Ina masot mikhangaye iwui Avāli ngakaoda, yangkashebingwui eina huimi.

⁴Kathiwui khara̱na ili kuinama; kazeipongwui tara̱na ili yuihaira. ⁵Kathewui ramwui khara̱ eina ili neikhuiya; kala kathiwui khalen eina ili ngasunga. ⁶Ining kachot tamli, iwui Avāli ina ngakaowa; iwui Avāli ina ngachonmi khavai vaowa. Iwui akhon chi awui khorumshimwui eina ana shāmi, kala iwui kachap awui tungli khuisangmi.

⁷Chieina okathuina nganukta nganinga; kaphungbingwui shimphunga kathira kala nganuka, kaja ana malungvātlakhaowa. ⁸Anātangkhurli meikhut shoka, kala akhamorwui eina kachuia mei shoka; meithā malingting eina awui eina shokngasaka. ⁹Ana kazingram nemzang ngasakta tunga; tangmangting kahai apheizingli lei. ¹⁰Ana cherub tongda yonga; ana masiwui angachāngli yongvai. ¹¹Ali tangkhamangna afaror ngasaka, kala kazingramwui tangmang tara̱ kala muiyā kashā chi awui kuimareiphin khaya̱larna. ¹²Awui mangāli kahor chiwui eina theih kala meithā eina awui muiyā kānhaowa. ¹³Iwui Avāna kazingramwui eina khangangtai; kala Reikhamataiyana theih kala meithā eina vaotai. ¹⁴Ana awui malāthing thaivāda athumli chaiyāngmi; rikhān thaivāda athumli yuikhui. ¹⁵Chieina, iwui Avā, nawui kakharar eina, nawui nātangkhurwui zangkatang eina shamadruwui ra̱khongbing theihaowa, kala okathuiwui shimphunga ngahāhanghaowa.

¹⁶Kazingwui eina ana ili tukkhuida, kapanga tara̱wui eina ili khāngshokmi. ¹⁷Iwui yangkashe kapangawui eina ana ili kanshokmi, ili ningkachaibingwui eina, kaja athum iwui vang pangnahaowa. ¹⁸Ina khananglakha athumna ili rāngarara; kha iwui Avāna ili makārmi. ¹⁹Khamashā pamli ana ili khuishokmi; ili ngahānkhangaiwui vang, ana ili kanshokmi.

²⁰Iwui khangarong athishurda iwui Avāna ili sāman mi; ipāng katharwui athishurda ana ili samphang ngasaka. ²¹Kaja ina iwui Avāwui apong mayonrā kahaina, kala makhayā sāda iwui Avāwui eina mangareithuimana. ²²Kaja awui sharphahor saikora ina iwui mangāli haichinga, kala ina awui shiyan-chikan chi mahorhaimana. ²³Awui mangāli I shāt makāmana, kala ina morei masāmana. ²⁴Chiwui vang eina awui mikyanli ipāng kathar athishurda, iwui khangarong athishurda iwui Avāna ili samphang ngasaka.

²⁵Nana khangavapali ngavapmi; nanala shāt makakā mili shāt machigatmana; ²⁶Nanala katharali tharda chitheimi, kha nana khanguiyali khangui sāchithei. ²⁷Kaja nana malung khanima mibingli kanshokmi, kha khanganing mikyan chi nana maishi ngasakra. ²⁸Kaja nana iwui thaomei chi shārmi; iwui Avāna tangkhamangli hormi. ²⁹Kaja nawui mangā eina ina raimibingli yuishapa; kala iwui Avāwui mangā eina ina raipan yongkānshapa.

³⁰Iwui Avāwui apong mangapeilakmana; iwui Avāwui tui khamashungnada theikhui; ali yāmkhangayin saikorali ana chāngvei sāmi. ³¹Kaja ithumwui Avā hi iwui Avā maningmala? Kala ithumwui Avā maningla lunghār khipa lei? ³²Iwui Avāna ili yāng eina neira ngasakmi, kala iwui shongfa kalā mashingasakmana. ³³Iphei chaophei thāda ana thākngasaka; kala kaphungli yansāngsa̱ eina ili chipama. ³⁴Ngarar khavai ana ipāng tamchitheimi, chithāda iwui pāngthei eina pithraiwui malā chi hunshapa. ³⁵Nana ili nawui huikhamiwui chāngvei mihaira; nawui yāpangna ili ringkhangasakna, kala nawui ja̱mi katheina ili reingasaka. ³⁶Nana izingli iwui pheikārwui vang khamashāpamli zatngasaka, kala iphei manganaithuimana.

³⁷Ina yangkashebingli kharoma kala ngaphankhuida; athum makānranglakha eina tangda mangareiungmana. ³⁸Ina athumli hortāhaira, chithākha athum mangakarthuipaimana; athum iwui pheizingli pitāhaowa. ³⁹Raiwui pangshap eina nana ili sangmi; kala ili khangararbingli iwui pheizingli pitā ngasaka. ⁴⁰Nana iwui yangkashebingli iwui eina yāmngasaka, kala ili yangkakharingbingli ina sākazamhaowa. ⁴¹Athumna ngachonmi khavai ngakaowa, kha kankhame khipā maleimana; athumna iwui Avāli ngakaowa, kha ana athumli mangahānkāmana. ⁴²Ina athumli masi mangāli chifa thāda ngaphitkachupa; ina athumli shongfa leikhon thāda heishoka. ⁴³Mibingwui rotkhamarātwui eina nana ili kanshokmi; nana ili yurbingwui akhavā sāngasaka; ina makathei mibingna ara ili otram ngatha̱mi. ⁴⁴Iwui tui shākhaleoda athumna kahāng nganai; yur kateibingna ili lumashanmi khavai rāra. ⁴⁵Yur kateibingna malung tātungda, athumwui raipanwui eina kathirriri shokra.

⁴⁶Iwui Avā kharingana! Iwui lunghār chili sochikatranu, kala ili huikhame Avā chili maiyāranu, ⁴⁷Ili athut hāngsangmi kala iwui azingli mibingli hamsang ngasakmi Avā chi, ⁴⁸iwui yangkashebingwui eina ili kanshokmi. Mha, nana ili khangararbingwui atungshong maiyā ngasaka; sākashe miwui eina nana ili kanshokmi. ⁴⁹Hiwui vang, O iwui Avā, yurbingwui alungli nali sochingra, kala namingli laa sāchingra.

⁵⁰Awui awungali yuikhamataiya sangasakmi, kala awui thao neomi kahaia Davidli kala awui naotunli katang mavaila makhangachei leikashi chitheimi.