Sākahai Otna Matuia
Laa homkhamena vangna. Davidwui laa.
Shākhi kahani, ngarumda. Zimik kala kazingramna tui maleila okathui akatang vāshungda matuia; chieina ithumwui Avāwui ainna themlākda matuia, khuira̱ akhurwui eina tāmi chili lāngda shimmei. Khanikha shāhaida, laa sākasāna ana mathei kahai khayonkhamāngwui eina tharmi khavai poia.
19 1Kazingramna ithumwui Avāwui tekhamatei phongshoka; atungshong kazingramna awui pāngwui otsak vaosanga. 2Thangkachida athumna tui heishoka; ngayā kachida awor chitheimi. 3Tuimatui maleimana, tui maleimana; athumwui akhon mashāmana. 4Chithālala athumwui akhon okathui hupta shoka, athumwui tui okathui akatang vāshungda. Kazingramli ana zimikwui vang kachonshim akha khaningkaihaira, 5Chi mākakhāma awui sikhurwui eina kharā kathāna, awui shongfa kharin khavai ringphā kapanga kathāna. 6Chi kazingram akatang akhawui eina shoka, kala ngareivāda khangatei akatangli kāshunga; awui kasāwui eina ngathum kahai khikha maleimana.
7Ithumwui Avāwui ain kākashunga, manglāli pangshap mi; ithumwui Avāwui shākhi khuisangkapaimānga, ningkashambingli thangkhamei mi. 8Ithumwui Avāwui tamkachithei khangatara, ningli mathān mi; ithumwui Avāwui ningkhami horchamrihai, mikli kahor mi. 9Ithumwui Avāli khangachee tharāna, katang mavaila leichingra; ithumwui Avāwui bichar khamashungana, kala tongda khangarongna. 10Sināli lāngda, mathāmeikap kaji sinālila lāngda chibing ngahānngaimei; khuira̱li lāngda, khuira̱ akhurwui eina tāmi chilila lāngda shimmei. 11Chibingna nawui raoli hāngmachina; chi mayonda khamataia sāman samphangra.
12Khipāna akhalattawui khayonkhamāng phākhui samphangrakhala? Ngathumda khalei iwui moreiwui eina ili tharmilu. 13Nawui raoli chila langso moreiwui eina yangmilu; chibingna iwuitungli mamung ngasakmilu. Chithākha I shāt makāmara, kala khamataia salāngwui eina khayon maleimara.
14Ikhamorwui tui kala iningwui khamachuk nawui mangāli ningyāng ungranu, O iwui Avā, iwui lunghār kala iwui Ngatangkhame.
