መዝሙር 19

19 ¹ሰማያት የአባታችንን ክብር ይናገራሉ፤ ጠፈርም የእጆቹን ሥራ ያውጃል። ²ቀን ለቀን ቃላቸውን ያፈሳሉ፤ ሌሊት ለሌሊትም ዕውቀትን ይገልጣሉ። ³ንግግር የለም፤ ቃላትም የሉም፤ ድምፃቸውም ከቶ አይሰማም። ⁴ድምፃቸው ግን በምድር ሁሉ ይወጣል፤ ቃላቸውም እስከ ዓለም ዳርቻ ይደርሳል። በሰማያት ውስጥ ለፀሐይ ድንኳን ተከለ፤ ⁵እርሷም ከእልፍኙ እንደሚወጣ ሙሽራ፣ ሩጫውን ለመሮጥ ደስ እንደሚለው ኀያል ናት። ⁶ከሰማያት ዳር ትወጣለች፤ ዙረቷም እስከ ሌላው ዳር ይደርሳል፤ ከሐሩሯም የተሰወረ ምንም የለም።

⁷የአባታችን ሕግ ፍጹም ነው፤ ነፍስንም ያድሳል፤ የአባታችን ምስክር የታመነ ነው፤ የዋሁንም ጥበበኛ ያደርጋል። ⁸የአባታችን ሥርዐት ቅን ነው፤ ልብንም ደስ ያሰኛል፤ የአባታችን ትእዛዝ ብሩህ ነው፤ ዐይኖችንም ያበራል። ⁹የአባታችን ፍርሃት ንጹሕ ነው፤ ለዘላለምም ይኖራል፤ የአባታችን ፍርዶች እውነት ናቸው፤ ሁሉም ጻድቅ ናቸው። ¹⁰ከወርቅ ይልቅ የተወደዱ ናቸው፤ ከጥሩ ወርቅ እንኳ ይልቅ፤ ከማርም ይልቅ ጣፋጭ ናቸው፤ ከወለላ ማር ይልቅ። ¹¹ባሪያህን ያስጠነቅቃሉ፤ እነርሱን በመጠበቅም ታላቅ ዋጋ አለ።

¹²የራሱን ስሕተት ማን ያስተውላል? ከተሰወሩ በደሎቼም አንጻኝ። ¹³ባሪያህንም ኾን ብሎ ከሚሠራ ኀጢአት ጠብቅ፤ በእኔ ላይ አይግዙ፤ ያን ጊዜም ነውር የሌለብኝ እኾናለሁ፤ ከታላቅ ዐመፅም ንጹሕ እኾናለሁ።

¹⁴የአፌ ቃላትና የልቤ ሐሳብ በፊትህ ደስ የሚያሰኙ ይኹኑ፤ አባቴ ሆይ፣ ዐለቴና ቤዛዬ።