Zaburi 19

19 ¹ Mbingu zauhubiri utukufu wa Baba yetu; anga latangaza kazi ya mikono yake. ² Siku baada ya siku hufoka maneno; usiku baada ya usiku hufunua maarifa. ³ Hakuna usemi, hakuna maneno — sauti yao haisikiki kamwe. ⁴ Lakini sauti yao huenea katika dunia yote, na maneno yao hata miisho ya ulimwengu. Katika mbingu ameweka hema kwa ajili ya jua, ⁵ nalo ni kama bwana arusi atokaye chumbani mwake, kama shujaa afurahiaye kupiga mbio zake. ⁶ Latokea upande mmoja wa mbingu, na mzunguko wake wafika upande wa pili; wala hakuna kilichofichika na joto lake.

⁷ Sheria ya Baba yetu ni kamilifu, huiburudisha nafsi; ushuhuda wa Baba yetu ni wa kuaminika, humpa mjinga hekima. ⁸ Maagizo ya Baba yetu ni ya adili, huufurahisha moyo; amri ya Baba yetu ni angavu, huyatia macho nuru. ⁹ Kicho cha Baba yetu ni safi, kidumucho milele; hukumu za Baba yetu ni za kweli, tena zote pamoja ni za haki. ¹⁰ Zinatamanika kuliko dhahabu, naam, kuliko dhahabu iliyo safi kabisa; ni tamu kuliko asali, kuliko asali itokayo katika sega. ¹¹ Kwazo mtumishi wako huonywa; katika kuzishika kuna thawabu kubwa.

¹² Ni nani awezaye kuyatambua makosa yake mwenyewe? Unitakase na makosa yangu yaliyofichika. ¹³ Pia mzuie mtumishi wako na dhambi za kusudi; zisinitawale mimi. Ndipo nitakapokuwa mkamilifu, wala sitakuwa na hatia ya kosa kuu.

¹⁴ Maneno ya kinywa changu na mawazo ya moyo wangu yakubalike mbele zako, Ee Baba yangu, mwamba wangu na mkombozi wangu.