Zaburi 20

20 ¹ Baba yetu na akujibu siku ya taabu; jina la Baba wa Yakobo na likulinde. ² Na akuletee msaada kutoka patakatifu, na akutegemeze kutoka Sayuni. ³ Na azikumbuke sadaka zako zote, na aitazame kwa upendeleo sadaka yako ya kuteketezwa. Sela. ⁴ Na akupe haja ya moyo wako, na atimize mashauri yako yote.

⁵ Tutashangilia kwa furaha kwa sababu ya wokovu wako, na kwa jina la Baba yetu tutainua bendera zetu. Baba yetu na atimize maombi yako yote. ⁶ Sasa ninajua ya kuwa Baba yetu humwokoa mpakwa mafuta wake; humjibu kutoka mbinguni kwake kutakatifu kwa nguvu ya wokovu ya mkono wake wa kuume. ⁷ Wengine hutumaini magari ya vita na wengine farasi, bali sisi tunalitumaini jina la Baba yetu. ⁸ Wao huanguka na kubwaga chini, bali sisi tunainuka na kusimama imara. ⁹ Baba yetu, mwokoe mfalme! Tujibu tunapokuita.