مخلوق خبرې کوى
د موسيقۍ د مشر دپاره. د داؤد يو زبور.
دوه شاهدان، سره یو ځای. لمر او آسمان بې له خبرو د ځمکې تر پایه خبرې کوي؛ بیا د زمونږ پلار لارښوونه په ښکاره خبرې کوي، د ګبینو له ګانډې شاتو هم خوږه. د دواړو له اورېدو وروسته، زبور لیکونکی غوښتنه کوي چې له هغو تېروتنو پاک شي چې نه یې ویني.
19 1آسمانونه د زمونږ پلار لوئى بيانوى، او فضا د هغۀ د لاسونو کار اعلانوى. 2هره ورځ خپلې خبرې زباتوى، او هره شپه علم ښکاره کوى. 3نۀ وئينا شته، نۀ خبرې شته، د هغوئ آواز هيچرې نۀ اورېدے کيږى. 4خو د هغوئ آواز په ټوله زمکه کښې خوريږى، او د هغوئ خبرې د دُنيا تر ارو پورې رسيږى. هغۀ په آسمانونو کښې د نمر دپاره يو خېمه جوړه کړې ده، 5کوم چې د خپلې حُجرې نه راوتونکى زوم په شان دے، او د منډې دپاره خوشحاله پهلوان په شان دے. 6دا د آسمان د يو ارو نه راختيږى، او د دې ګردش بل ارو ته رسيږى، د دې تودوخې نه هيڅ شے پټ نۀ دے.
7د زمونږ پلار شريعت کامل دے، چې روح تازه کوى، د زمونږ پلار ګواهى د اعتبار وړ ده، چې ناپوهان هوښيار کوى. 8د زمونږ پلار اصول صحيح دى، چې زړۀ ته خوشحالى ورکوى، د زمونږ پلار حُکم روښانه دے، چې سترګو ته رڼا ورکوى. 9د زمونږ پلار وېره پاکه ده، چې د تل دپاره پاتې کيږى، د زمونږ پلار فېصلې رښتينى دى، او ټولې صادقې دى. 10دا د سرو زرو نه زيات خوښ کېدونکى دى، بلکې د ډېرو خالصو سرو زرو نه هم، د شاتو نه خوږ دى، بلکې د ګبينې د شاتو نه هم. 11دا ستا نوکر خبردارى کوى، او د دې ساتل لويه بدله راوړى.
12څوک خپلې خطاګانې پوهېدے شى؟ ما د خپلو پټو ګناهونو نه پاک کړه. 13خپل نوکر د قصدى ګناهونو نه هم وساته، چې هغه په ما باندې حکومت ونۀ کړى. بيا به زۀ بېعيبه شم، او د لويې سرکشۍ نه به بېګناه يم.
14د زما د خولې خبرې او د زما د زړۀ سوچ، ستا په نظر کښې خوښ وى، اے زما پلاره، زما تيږه او زما خلاصونکے.
