Yaübü Kaodakei Lauda
Chia leiyeibou shanga. Dawideibü chia.
Aukabü nyi, jemala kia. Chanyu si mühei ngüh ayoko kaodak jithon sühko lauda; kheijinei seneibü Bou ngühkhüm chongchingko lauda, naodei tokei teibou. Nyibü lakei ditan, chia lenbouei haoei ahaptibü shabü shuong ka saüenla welauda.
19 1Mühei seneibü Bou soneikangbü thekuda; müh shuongei haoeibü ikkümiklei phinthonda. 2Chalou chaloua haoenei haoeneibü ngüh louda; nangnak nangnaka haoenei hapbüngebü ngetida. 3Ngühang aki, ngüh aki—haoeneibü ngüh ladangkei aditda. 4Lausikei haoeneibü ngüh kaodak pendou danko louda, haoeneibü ngüh kaodak jithon sühko louda. Müh ka haoei chanyu shanga neichem che dangkei, 5Kho jembü popchem ka longbü chemkanbou tegü ki, jembü lam to laangla olinbü lajamleibou tegü. 6Kho müh jithon che ka longda, hoba khoeibü lam lubü jithon sühko nongan; khoeibü aubü ka aikei huletla athük.
7Seneibü Bou ngühkhüm penbüsoubü ki, soushou haanbü kümda; seneibü Bou aukabü mailemlabü ki, maanglanbü shuong la songsido kibü kuda. 8Seneibü Bou ngühkhüm shuong tükde ki, maangpon la olinbü kuda; seneibü Bou sakkubü ngühkhüm soneikangbü ki, nyek la ngesakbü kuda. 9Seneibü Bou soumo hatbü hinseibü ki, ponpen thon akiko kida; seneibü Bou song shuong ngühmai ki, hoba pendou saopobü ki. 10Khübü hon toje aei dühlabü, haü, hon finehas toje gükei aeibou; naodei tokei teibou, haü, naodei chem ka longbü naodei tokei teibou. 11Khübüei kaibü sambou to maangsangko kümda; khübü jungeibüei yaangbü jongsak hapda.
12Atei jembü shabü shuong ditenan thük? Ngeibü hulabü shabü ka ngo saüenkushi. 13Tokei kaibü sambou maangangbüei kümbü shabü ka püetshi; khübüei ngo thüka song adaktishima; kheijinei ngo mubü yinglabü, hoba yaangbü rebeka ka bangan kilabü.
14Kü sembungeibü ngüh shuong hoba kü maangponeibü damanchühbü kaibü thedanga ponlem maibü yingshima, Abou, kü Laang hoba kü Khümenbou.
