Kü Bou, Ngeibü Hau

Chia atkubou leiyeibou shanga. Seneibü Bou sambü Dawideibü chia. Haoeibü dangbou shuong pendou ik ka hoba Saul ik ka Bouei hao khümenkei khünyet chaloua, Dawidei Bou to ho ngüh shuong chia laukei.

Saul khulimbo khümenan apjinei, Dawidei kümsilei pendou lenda. Haoei hailabü jolühei kailepan kikei, hoba hao deinyu shuong ka sungletla hoba yungkabü kaoa settila shanga, haoeibü ngekei haoeibü Bou to müh la, sangmei you phanga, wankhük hoba ninthu yoa, khüpettian apbei.

Chapter 18.

Ngei no to sanouda, kü Bou, ngeibü hau. Kü Bou kho ngeibü laang, hoba ngeibü lapheishon, hoba ngeibü delila ki; kü Bou, ngeibü laang ki, aoyoa ngo maanglem phoda, ngeibü aih, hoba ngo khümenbü yaangbü, ngeibü satenshang ki. Ngei kü Bou to ngada, aoyoa nyensang muanko ki, hoba ngeibü dangbou shuong ka ngo khümenan kia.

Hailabü jolühei ngo kailepan kikei; mautilabü deishouei ngo moktikei. Sheol jolüh shuongei ngo shenlepbei; hoba hailabü sungei ngo thangetkei. Ngo maangshata ngei kü Bou to ngakei; maanglem shanga kü Bou jungto ngei ngekkei. Kü ngüh kho haoeibü lembü chem ka haoei ditkei; hoba hao to ngei ngekbü haoeibü nou to loukei.

Hao khauangko kibü aishanga, kaodak lühkei hoba nyaakkei; shongh shuongeibü denshang nyaakeikei hoba topeikei. Haoeibü kungkhün ka wankhük longkei; hoba haoeibü sembung ka yasebü wan longkei; hao ka wankak longtikei. Haoei müh la khüpettikei hoba yanbei; haoeibü you phanga sangmei nakthüh kikei. Haoei kherab thüka setkei hoba satkei; yeieibü kaak thüka hao hapbei. Haoei nakthüh haoeibü ngühlepbo kümbei, hoba hao kaijembo danglepan phokubei— nakthühbü deinyu shuong hoba mühshuong sangmei shangbü ki. Hao thedanga jajalalabü ka haoeibü sangmei shuong phaukei, senlaang hoba wankak si longkei. Kü Bouei tokei müh ka langmak maaktikei, hoba Thükkabouei ngüh longtikei, senlaang hoba wankak yantikei. Haoei haoeibü laujin kipbei hoba haoen lintikei; haoei langpon litikukei hoba haoen yoongtikei. Kheijinei yungnyu maang shuong tangto longkei, hoba nyi hakbü ka, kaodak denshang shuong, kü Bou, kaibü kungkhün hakhin metbü ka phaletham yeitikei.

Thükka ka haoei yanbei hoba ngo baman sungbei; deinyu yaangbü ka haoei ngo laian longkei. Haoei ngo ngeibü dangbou yaangbü ka khümenkei, kü to mangsenbü shuong ka khümenkei; aishanga haoen kü shanga yongko hau yaangbü kikei. Ngeibü thushed chaloua haoenei ngo thangetkei; lausikei kü Bou ngo kishanga kikei. Haoei ngo leian hopabü kao che ka longkei; ngo khümenkei, aishanga haoei kü to olinkei.

Ngo saopobü thüng kü Bouei kü to jungeikei; ngeibü ik sakto kibü thüng, haoei kü la pailet kukei. Aishanga ngo kü Boueibü lama paikei, hoba kü Bou ka amaiko bangjung ohau. Aishanga haoeibü matjem pendou ngo thedanga kikei, hoba haoeibü sakkubü ngühkhüm ka ngo abang. Hao thedanga ngo shedkhau aying kikei, hoba shabü ka ngo lolo bangbei. Hibü khoei kü Bouei ngo saopobü thüng, hao thedanga ngeibü ik sakteibü thüng pailetbü kukei.

Üeisanou dambü to nyi no lolo üeisanou lenlabü, shedbü akibü müt to nyi no lolo shed akibü lenlabü. Hinseibü shuong to nyi no lolo hinseibü lenlabü, lausikei kombünongbü shuong to nyi no lolo tangsheitham lenlabü. Aishanga nyi eaaoabü mütshuong khümenda, lausikei yonglam lilibü nyek nyi yantida. Aishanga nyi ngeibü hantin sapda; hoba kü Bouei ngeibü nakthüh ngesaktikulabü. Aishanga ngei no danko sepai tan nitnyinla thükda, hoba kü Bou danko ngo kümthang thüka saiyeila thükda.

Kü Bou shangaje haoeibü lamnyu benbüsoubü; kü Boueibü ngüh ngühmaian chüha; hao jungto maanglem phobü müt pendou shanga hao kho aih che ki. Kü Bou to limbo seneibü Bou ao ki? hoba seneibü Bou to liman Laangnyu ao ki? Kü Bouei kaangkhühtham ngo shenkukei, hoba ngeibü lamnyu maikeimainyu kümakei. Haoei ngeibü you meishi saoeneibü you tegü yeitida, hoba thükaenei kao ka ngo khümenan phokuda. Wapyola shanga haoei ngeibü ik lenenda, hoba ngeibü phemei chinam lau bühenla thükda. Nyi kaibü khümen aihtham kü la kukei; kaibü mae ikei ngo hatlepda, hoba kaibü thuibüei ngo yaang yeitia. Ngeibü younak shanga ongbü kao nyi kü phanga yeitikei; hoba ngeibü you asheket.

Ngei ngeibü dangbou shuong shijung haukei, hoba haoen laphetkei; ayingsi haoen amaushongko ngo asepei. Ngei haoen ngümbei, khei haoen aloenlabü; haoen ngeibü you phanga tuongkei. Nyi kü la lason shanga hau kaangkhühtham shenkukei; kükhu limbo huonseibü shuong nyi kü phanga tuongtikei. Nyi ngeibü dangbou shuong kü jungto haoeneibü shenjang thotikei, hoba kü to mangsenbü shuong ngei mautikei. Haoen thuibü shanga ngekkei, lausikei khümenbou aokei akitei; haoen kü Bou to ngekkei, lausikei Haoei haoen to ajongai. Ngei haoen to yei thükto hanpang thamngu tegü ngümbei; ngei haoen to khong kabü thime tegü jinkukei. Nyi ngo mütshuongeibü oyophetyobü ka khümenkei; nyi phangshuongeibü khu lela ngo phokukei; angebü müt shuongei ngo khangenda. Haoen kü shanga ditsilengko, kü to ngüha lelabü; yenbou shuongei kü jungto hehoat dogo loulabü. Küksithang shuong yui aplabü; haoen hushang ka lühjilühko longlabü.

Kü Bou langbü ki! Ngeibü laang to haülabou yingshi; ngo khümenbü Bou yaangentiashi, Bou, aoei mütshuong kü phanga lottida, hoba kü la phok lambuda, Aoei ngeibü dangbou shuong ka ngo khümenkei. Haü, nyi kükhu limbo huonseibü shuong thüka ngo yaangentikei; hoba sekbülakbü müt ka ngo khümenkei. Hibü, O kü Bou, phangshuong jembü ka ngei ka to nyensang kulabü, hoba ka nyen la nyensang chi laulabü.

Haoei haoeibü Choba la thüksimin yaang kuda, hoba haoei naangenbou to üeisanou lenda, Dawid hoba haoeibü thensilen la ponpen shanga lenda.