Saamu 18

18 ¹Mo fẹ́ ọ, Baba mi, agbára mi. ²Baba mi ni àpáta mi àti odi mi àti olùgbàlà mi; Baba mi, àpáta mi, ẹni tí mo fi ṣe ibi ìsádi mi, asà mi, àti agbára ìgbàlà mi, ibi ààbò mi. ³Mo ké pe Baba mi, ẹni tí ó yẹ láti yìn, a sì gbà mí là kúrò lọ́wọ́ àwọn ọ̀tá mi.

⁴Okùn ikú yí mi ká; ìkún-omi ìparun bò mí mọ́lẹ̀. ⁵Okùn isà òkú dì mí mọ́lẹ̀; ìdẹkùn ikú dojú kọ mí. ⁶Nínú ìpọ́njú mi mo ké pe Baba mi; mo kígbe sí Baba mi fún ìrànlọ́wọ́. Láti inú tẹ́mpìlì rẹ̀ ó gbọ́ ohùn mi, igbe mi sí i sì dé etí rẹ̀.

⁷Nígbà náà ni ayé mì tìtì tí ó sì jìgìjìgì; ìpìlẹ̀ àwọn òkè ńlá wárìrì tí ó sì mì, nítorí tí inú bí i. ⁸Èéfín ta sókè láti ihò imú rẹ̀, iná ajónirun sì ti ẹnu rẹ̀ jáde; ẹyín iná tí ń jó rere ràn jáde láti ọ̀dọ̀ rẹ̀. ⁹Ó tẹ àwọn ọ̀run ba, ó sì sọ̀kalẹ̀; òkùnkùn biribiri wà lábẹ́ ẹsẹ̀ rẹ̀. ¹⁰Ó gun kérúbù, ó sì fò; ó rábàbà lórí ìyẹ́ apá afẹ́fẹ́. ¹¹Ó fi òkùnkùn ṣe ìbòrí rẹ̀, ìbòjú rẹ̀ yí i ká—omi dúdú àti àwọsánmà biribiri ojú ọ̀run. ¹²Láti inú ìmọ́lẹ̀ tí ń bẹ níwájú rẹ̀ àwọsánmà rẹ̀ la jáde, pẹ̀lú yìnyín òkúta àti ẹyín iná. ¹³Baba mi sì sán àrá ní ọ̀run, Ọ̀gá-ògo sì gbé ohùn rẹ̀ sókè, pẹ̀lú yìnyín òkúta àti ẹyín iná. ¹⁴Ó ta àwọn ọfà rẹ̀, ó sì tú wọn ká; ó sọ mànàmáná, ó sì dà wọ́n rú. ¹⁵Nígbà náà ni a rí àwọn ipadò òkun, ìpìlẹ̀ ayé sì farahàn nípa ìbáwí rẹ, Baba mi, nípa fífẹ́ èémí ihò imú rẹ.

¹⁶Ó na ọwọ́ rẹ̀ láti òkè, ó sì gbá mi mú; ó fà mí jáde nínú àwọn omi ńlá. ¹⁷Ó gbà mí là lọ́wọ́ ọ̀tá mi tí ó lágbára, lọ́wọ́ àwọn tí ó kórìíra mi, nítorí wọ́n ní agbára jù mí lọ. ¹⁸Wọ́n dojú kọ mí ní ọjọ́ àjálù mi, ṣùgbọ́n Baba mi ni aláfẹ̀yìntì mi. ¹⁹Ó mú mi jáde sí ibi gbígbòòrò; ó gbà mí là, nítorí inú rẹ̀ dùn sí mi.

²⁰Baba mi ṣe sí mi gẹ́gẹ́ bí òdodo mi; gẹ́gẹ́ bí mímọ́ ọwọ́ mi ó san ẹ̀san fún mi. ²¹Nítorí mo ti pa ọ̀nà Baba mi mọ́, èmi kò sì fi ìwà búburú yà kúrò lọ́dọ̀ Baba mi. ²²Nítorí gbogbo òfin rẹ̀ wà níwájú mi, èmi kò sì gbé àwọn ìlànà rẹ̀ sẹ́gbẹ̀ẹ́ kan. ²³Mo jẹ́ aláìlẹ́gàn níwájú rẹ̀, mo sì pa ara mi mọ́ kúrò nínú ẹ̀ṣẹ̀. ²⁴Nítorí náà Baba mi ti san ẹ̀san fún mi gẹ́gẹ́ bí òdodo mi, gẹ́gẹ́ bí mímọ́ ọwọ́ mi níwájú rẹ̀.

²⁵Fún olóòtítọ́ ìwọ a fi ara rẹ hàn ní olóòtítọ́; fún aláìlẹ́gàn ìwọ a fi ara rẹ hàn ní aláìlẹ́gàn; ²⁶fún ẹni mímọ́ ìwọ a fi ara rẹ hàn ní mímọ́, ṣùgbọ́n fún ẹni wíwọ́ ìwọ a fi ara rẹ hàn ní ológbọ́n. ²⁷Nítorí ìwọ a gba àwọn onírẹ̀lẹ̀ là, ṣùgbọ́n ojú ìgbéraga ni ìwọ a rẹ̀ sílẹ̀. ²⁸Nítorí ìwọ ni ẹni tí ó tan fìtílà mi; Baba mi tan ìmọ́lẹ̀ sí òkùnkùn mi. ²⁹Nítorí nípasẹ̀ rẹ ni mo lè sáré lu ọ̀wọ́ ogun, àti nípasẹ̀ Baba mi ni mo lè bẹ́ gba orí odi kọjá.

³⁰Ní ti Baba mi—ọ̀nà rẹ̀ pé; ọ̀rọ̀ Baba mi fihàn pé òtítọ́ ni; òun ni asà fún gbogbo àwọn tí ó fi ṣe ibi ìsádi. ³¹Nítorí ta ni Baba wa bí kò ṣe Baba mi? Ta sì ni àpáta bí kò ṣe Baba wa? ³²Baba mi ni ẹni tí ó fi agbára dì mí lámùrè tí ó sì sọ ọ̀nà mi di aláìlẹ́gàn. ³³Ó sọ ẹsẹ̀ mi dàbí ẹsẹ̀ àgbọ̀nrín ó sì fi mí kalẹ̀ ní ìdúróṣinṣin lórí ibi gíga. ³⁴Ó kọ́ ọwọ́ mi fún ogun jíjà, kí apá mi lè fa ọrun idẹ. ³⁵Ìwọ ti fi asà ìgbàlà rẹ fún mi; ọwọ́ ọ̀tún rẹ gbé mi ró, ìwà tútù rẹ sì ti sọ mí di ẹni ńlá. ³⁶Ìwọ sọ ibi ìtẹ̀lẹ̀ mi di gbígbòòrò lábẹ́ mi, ẹsẹ̀ mi kò sì yẹ̀.

³⁷Mo lépa àwọn ọ̀tá mi, mo sì bá wọn; èmi kò sì padà sẹ́yìn títí tí wọ́n fi run tán. ³⁸Mo lù wọ́n bolẹ̀ tó bẹ́ẹ̀ tí wọn kò fi lè dìde; wọ́n ṣubú lábẹ́ ẹsẹ̀ mi. ³⁹Ìwọ fi agbára dì mí lámùrè fún ogun náà; ìwọ mú kí àwọn tí ó dìde sí mi ṣubú lábẹ́ ẹsẹ̀ mi. ⁴⁰Ìwọ mú kí àwọn ọ̀tá mi yí ẹ̀yìn wọn padà sí mi, àwọn tí ó kórìíra mi ni mo sì parun. ⁴¹Wọ́n kígbe fún ìrànlọ́wọ́, ṣùgbọ́n kò sí ẹni tí yóò gbà là; wọ́n kígbe sí Baba mi, ṣùgbọ́n kò dá wọn lóhùn. ⁴²Mo lù wọ́n kúnú bí erùpẹ̀ níwájú afẹ́fẹ́; mo dà wọ́n jáde bí ẹrẹ̀ ìgboro. ⁴³Ìwọ gbà mí là kúrò nínú ìjà àwọn ènìyàn; ìwọ fi mí ṣe orí àwọn orílẹ̀-èdè; àwọn ènìyàn tí èmi kò mọ̀ wá ń sìn mí báyìí. ⁴⁴Bí wọ́n bá ti gbọ́ nípa mi, wọ́n a tẹ̀lé mi; àwọn àjèjì yóò fi ìbẹ̀rù wá sọ́dọ̀ mi. ⁴⁵Àyà àwọn àjèjì já wọ́n sì fi ìwárìrì jáde kúrò nínú ibi ààbò wọn.

⁴⁶Baba mi wà láàyè! Ìbùkún ni fún àpáta mi, gbígbéga ni fún Baba tí ó gbà mí là, ⁴⁷Baba tí ó ń ṣe ìdájọ́ fún mi tí ó sì ń ṣẹ́gun àwọn ènìyàn lábẹ́ mi, ⁴⁸ẹni tí ó gbà mí là lọ́wọ́ àwọn ọ̀tá mi. Bẹ́ẹ̀ ni, ìwọ gbé mi ga ju àwọn tí ó dìde sí mi lọ; ìwọ gbà mí là lọ́wọ́ ẹni oníwà ipá. ⁴⁹Nítorí èyí ni èmi yóò yìn ọ́, Baba mi, láàrin àwọn orílẹ̀-èdè, èmi yóò sì kọ orin ìyìn sí orúkọ rẹ.

⁵⁰Ó fi ìṣẹ́gun ńlá fún ọba rẹ̀, ó sì fi ìfẹ́ májẹ̀mú hàn sí ẹni àmì òróró rẹ̀, sí Dafidi àti àwọn ọmọ rẹ̀ títí láéláé.