مزمورلار 18 FHB Father's Heart Bible™

18 ¹سنی سِوئرَم، ای آتام، منئم قووّتئم. ²آتام منئم قایام، منئم قالام و منئم قورتاریجیمدئر؛ آتام، منئم قایام کی، اونا پناه گتئرئرم، منئم قالخانیم، منئم نئجات قووّتئم و منئم پناهگاهیمدیر. ³حمد اولونماغا لایئق اولان آتامی چاغیریرام و دوشمنلرئمدن خئلاص اولورام.

⁴اؤلوم ائپلری اطرافیما دولاشدی؛ هلاکت سل‌لری منی باسدی. ⁵قبئرئن ائپلری اطرافیما ساریلدی؛ اؤلوم تله‌لری قاباغیما چیخدی. ⁶سیخینتیمدا آتامی چاغیردیم؛ کؤمک اوچون آتاما فریاد اتدئم. معبدئندن سسئمی اشئتدی و اونا اتدئیئم فریاد قولاقلارینا چاتدی.

⁷او زامان یر لرزه‌یه دوشدو و تئتره‌دی؛ داغلارین بونؤوره‌لری تئتره‌یئب لرزه‌یه دوشدو، چونکی او قضبلَنمئشدی. ⁸اونون بورنوندان توستو یوخاری قالخدی، آغزیندان دا یاندیریب یاخان اود گلدی؛ یانار کؤزلر اوندان آلوولاندیلار. ⁹گؤیلری اَیئب آشاغی ائندی؛ آیاقلاری آلتیندا قاتی قارانلیق وار ائدی. ¹⁰کَرّوبا مئنئب اوچدو؛ یِل قانادلاری اوستونده پرواز اتدی. ¹¹قارانلیغی اؤز اؤرتویو، اطرافیندا چادیری اتدی؛ قارا سولار و گؤیون قالین بولودلاری. ¹²اونون قاباغینداکی پاریلتیدان بولودلاری دَلئب کچدی، داش دولوسو و اودلو کؤزلرله. ¹³آتام دا گؤیلرده گورلادی و اوجالاردا اولان سسئنی اوجالتدی، داش دولوسو و اودلو کؤزلرله. ¹⁴اؤز اوخلارینی گؤندَ‌رئب اونلاری داغیتدی؛ شئمشَکلری آتیب اونلاری مغلوب اتدی. ¹⁵او زامان دهنزئن آرخلاری گؤروندو و سنئن تَنبِهئندن دونیانین بونؤوره‌لری آچیلدی، ای آتام، سنئن بورنونون نفسئنئن ووروشوندان.

¹⁶یوخاریدان اَل اوزادیب منی توتدو؛ گوجلو سولاردان منی چکئب چیخارتدی. ¹⁷منی گوجلو دوشمنئمدن قورتاردی، مندن نئفرت ادنلردن؛ چونکی اونلار مندن گوجلو ائدئلر. ¹⁸بلالی گونومده قاباغیما چیخدیلار، آمّا آتام منه دایاق اولدو. ¹⁹منی گِنئش بئر یره چیخاردیب قورتاردی؛ چونکی مندن خوشلاندی.

²⁰آتام صالحلئیئمه گؤره منئمله رفتار اتدی؛ اَل‌لرئمئن پاکلیغینا گؤره منه عوض وردی. ²¹چونکی آتامین یوللارینی توتموشام و شرارت ائله آتامدان اوز دؤندَرمه‌مئشم. ²²چونکی اونون بوتون حؤکملری قاباغیمدا ائدی و اونون قایدالارینی کنارا قویمادیم. ²³اونون قاباغیندا قوصورسوز ائدئم و اؤزومو حاقسیزلیقدان ساخلادیم. ²⁴اونا گؤره آتام صالحلئیئمه گؤره منه عوض وردی، گؤزونون قاباغیندا اَل‌لرئمئن پاکلیغینا گؤره.

²⁵وفالی آداما اؤزونو وفالی گؤرسدئرسن؛ کامئل آداما اؤزونو کامئل گؤرسدئرسن؛ ²⁶پاک آداما اؤزونو پاک گؤرسدئرسن، آمّا اَیری آداما اؤزونو حئیله‌گر گؤرسدئرسن. ²⁷چونکی سن فاغیر بئر خالقی خئلاص ادئرسن، آمّا لووغالارین گؤزلرئنی آلچالدیرسان. ²⁸چونکی چیراغیمی سن یاندیریرسان؛ آتام قارانلیغیمی ایشیقلاندیریر. ²⁹چونکی سنئنله بئر قوشونا هوجوم اده بئله‌رم، آتاملا دا دووار اوستوندن اوچارام.

³⁰آتاما گلدئکده، یولو کامئلدئر؛ آتامین سؤزو دوغرو چیخیر؛ اونا پناه گتئرن هرکسه قالخاندیر. ³¹چونکی آتامدان باشقا کئم آتامیزدیر؟ و آتامیزدان باشقا کئم قایادیر؟ ³²آتامدیر کی، منی قووّتله قورشایار و یولومو کامئل ادر. ³³آیاقلاریمی مارالین آیاقلاری کئمی ادر، منی اوجا یرلرده برک ساخلاییر. ³⁴اَل‌لرئمه دؤیوش اوچون تعلئم ورئر، بله کی، قوللاریم دا بورونج کامانینی اَیه بئلسئن. ³⁵سن منه قورتولوشونون قالخانینی ورمئسن؛ صاغ اَلئن منی ساخلاییر و عئنایتئن منی اوجالدیب. ³⁶قدملرئم اوچون آلتیمدا گِنئش یر آچیرسان، آیاقلاریم دا سوروشمور.

³⁷دوشمنلرئمی تعقئب اتدئم و اونلارا چاتدیم؛ اونلار یوخ اولمایینجا گری قاییتمادیم. ³⁸اونلاری قیردیم کی، بئر داها قالخا بئلمه‌دئلر؛ آیاقلاریمین آلتینا ییخیلدیلار. ³⁹دؤیوش اوچون منی قووّتله قورشادین؛ ضئدّئمه قالخانلاری آیاقلاریمین آلتینا ییخدین. ⁴⁰دوشمنلرئمی منه آرخا چِوئرتدین، مندن نئفرت ادن کسلری هلاک اتدیم. ⁴¹ائمداد ائسته‌دئلر، آمّا قورتاران اولمادی؛ آتاما فریاد اتدئلر، آمّا اونلارا جاواب ورمه‌دی. ⁴²اونلاری یِل قاباغینداکی توز کئمی دؤیدوم؛ کوچه‌لرئن پالچیغی کئمی اونلاری تؤکدوم. ⁴³خالقین چکئشمه‌سئندن منی قورتاردین؛ مئلّتلره منی باشچی قویدون؛ تانیمادیغیم بئر خالق منه قوللوق ادئر. ⁴⁴منی اشئدن کئمی، منه ایطاعت ادرلر؛ یاداِللی‌لر منه یالتاقلانیرلار. ⁴⁵یاداِللی‌لرئن اورَکلری اوزولور، قالالاریندان تئتره‌یه-تئتره‌یه چیخیرلار.

⁴⁶آتام دئری‌دئر! منئم قایاما حمد اولسون، منی خئلاص ادن آتا اوجالسین، ⁴⁷منئم اوچون قئصاص آلان و خالقلاری منه تابع ادن آتادیر، ⁴⁸دوشمنلرئمدن منی خئلاص ادن اودور. بلی، ضئدّئمه قالخانلارین اوستونه منی اوجالدیبسان، ظالئم آدامدان منی قورتاردین. ⁴⁹بونا گؤره، آتام، سنه مئلّتلر آراسیندا شوکور اده‌جیم و آدینا حمد نغمه‌لری اوخویاجاغام.

⁵⁰او، اؤز پادشاهینا بؤیوک ظفر باغیشلاییر، مسح اتدئیئنه محبّتئنی گؤرسه‌دئر؛ داوودا و اونون توخومونا، ابدی‌یه کئمی.