Nna m, Ike m

Nye onyeisi ndị ọbụ abụ. Abụ Devid, ohu Nna anyị, onye bụụrụ Nna anyị abụ a nʼụbọchị ahụ a napụtara ya site nʼaka ndị iro ya niile na site nʼaka Sọl.

Mgbe a napụtara ya n'aka Sọl, Devid na-akọ akụkọ ahụ niile. Ụdọ ọnwụ na-emikpu ya, mkpu ákwá ya mekwara ka Nna ya si na mbara igwe rịdata n'elu ifufe, n'anwụrụ ọkụ na mkpụrụ mmiri igwe, iji dọpụta ya na mmiri miri emi ma guzobe ya n'ebe dị elu.

Isi 18.

Ahụrụ m gị nʼanya, Nna m, ike m. Nna m bụ nkume m na ebe mgbaba m na onye mgbapụta m; Nna m, nkume m, onye m na-ezo nʼime ya, ọta m, na ike nzọpụta m, ebe m e wusiri ike. Ana m akpọku Nna m, onye kwesiri ka e too, a zọpụtakwara m site nʼaka ndị iro m.

Ụdọ ọnwụ gbara m gburugburu; idei mmiri nke mbibi kpuchiri m. Ụdọ ili kegidere m; ọnya ọnwụ chere m ihu. Nʼime mkpagbu m, akpọkuru m Nna m; akpọkuru m Nna m maka enyemaka. O sitere nʼụlọnsọ ukwu ya nụ olu m, mkpu akwa m ruru ya na ntị.

Mgbe ahụ ụwa mara jijiji ma gbagharịa; ntọala ugwu ukwu niile mara jijiji ma maa jijiji, nʼihi na iwe were ya. Anwụrụ ọkụ sitere nʼimi ya rigoo, ọkụ na-erepịa erepịa sitekwara nʼọnụ ya; icheku ọkụ na-enwu enwu sitere nʼebe ọ nọ malie ọkụ. Ọ kwaturu eluigwe ala ma rịdata; ọchịchịrị gbara ọchịchịrị dị nʼokpuru ụkwụ ya. Ọ nọkwasịrị otu cherub felie elu; o jiri nku ifufe fefee nʼelu. O mere ọchịchịrị ihe mkpuchi ya, ụlọ ikwu ya nke gbara ya gburugburu—mmiri gbara ọchịchịrị na igwe ojii gbara ọkpọkọ nke mbara igwe. Site nʼìhè nke dị nʼihu ya, igwe ojii ya gbawara ọsọ, ya na mkpụrụ mmiri igwe na icheku ọkụ. Nna m mekwara ka égbè eluigwe gbaa nʼeluigwe, Onye kachasị elu welikwara olu ya, ya na mkpụrụ mmiri igwe na icheku ọkụ. O ziri àkụ ya ma chụsasịa ha; ọ tụpụrụ àmụmà ma mee ka ha gbaa ọsọ. Mgbe ahụ, a hụrụ ụzọ mmiri nke oke osimiri, e kpughekwara ntọala ụwa site nʼịba mba gị, Nna m, site nʼiku ume nke imi gị.

O sitere nʼebe dị elu setịpụ aka jide m; ọ dọpụtara m site nʼoke mmiri ndị ahụ. Ọ napụtara m site nʼaka onye iro m dị ike, site nʼaka ndị kpọrọ m asị, nʼihi na ha dị ike karịa m. Ha chere m ihu nʼụbọchị nke ọdachi m, ma Nna m bụụrụ m ihe nkwado. O mepụtara m gaa nʼebe sara mbara; ọ napụtara m, nʼihi na ihe banyere m na-atọ ya ụtọ.

Nna m mesoro m dịka ezi omume m si dị; dịka ịdị ọcha nke aka m si dị, o kwụghachiri m ụgwọ. Nʼihi na edebela m ụzọ niile nke Nna m, esitebeghịkwa m nʼajọ omume tụgharịa site nʼebe Nna m nọ. Nʼihi na iwu ya niile dị nʼihu m, ewepụghịkwa m ụkpụrụ ya wezụga. Abụ m onye enweghị ịta ụta nʼihu ya, edebekwara m onwe m pụọ nʼime njọ. Ya mere Nna m kwụghachiri m ụgwọ dịka ezi omume m si dị, dịka ịdị ọcha nke aka m si dị nʼanya ya.

Nʼebe onye kwesiri ntụkwasị obi nọ, ị na-egosi onwe gị onye kwesiri ntụkwasị obi; nʼebe onye enweghị ịta ụta nọ, ị na-egosi onwe gị onye enweghị ịta ụta; nʼebe onye dị ọcha nọ, ị na-egosi onwe gị onye dị ọcha, ma nʼebe onye gbagọrọ agbagọ nọ, ị na-egosi onwe gị onye maara ihe. Nʼihi na ị na-azọpụta ndị dị umeala nʼobi, ma anya nganga ka ị na-eweda ala. Nʼihi na ọ bụ gị na-amụnye oriọna m; Nna m na-eme ka ìhè mụba nʼọchịchịrị m. Nʼihi na site na gị, apụrụ m ịbuso ìgwè ndị agha agha, sitekwa nʼaka Nna m, apụrụ m ịwụfe mgbidi.

Ma banyere Nna m—ụzọ ya zuru okè; okwu Nna m na-egosi na ọ bụ eziokwu; ọ bụ ọta nye ndị niile na-ezo nʼime ya. Nʼihi na onye bụ Nna anyị ma ọ bụghị Nna m? Onyekwanụ bụ nkume ma ọ bụghị Nna anyị? Ọ bụ Nna m na-enye m ike ma na-eme ka ụzọ m ghara inwe ịta ụta. Ọ na-eme ụkwụ m ka ọ dị ka ụkwụ ele ma mee ka m guzosie ike nʼebe ndị dị elu. Ọ na-azụ aka m maka ịlụ agha, ka ogwe aka m wee nwee ike ịrọ ụta bronze. I nyela m ọta nke nzọpụta gị; aka nri gị na-akwado m, ịdị nwayọọ gị emekwala ka m dịrị ukwuu. Ị na-emepụ ebe sara mbara maka nzọ ụkwụ m nʼokpuru m, ụkwụ m adịghịkwa amịchapụ.

Achụrụ m ndị iro m ọsọ ma chụkwute ha; alaghachighị m azụ ruo mgbe e bibisịrị ha. Etidara m ha ala ka ha ghara inwe ike ibili; ha dara nʼokpuru ụkwụ m. I nyere m ike maka ịlụ agha; i mere ka ndị biliri imegide m daa nʼokpuru ụkwụ m. I mere ka ndị iro m tụgharịa azụ ha nye m, ndị kpọrọ m asị ka m bibiri. Ha tiri mkpu maka enyemaka, ma o nweghị onye ga-azọpụta; ha kpọkuru Nna m, ma ọ zaghị ha. Etiwara m ha ka ha dị nta dịka ájá nke ikuku na-efe efe; awụpụrụ m ha dịka apịtị nke okporo ụzọ. Ị napụtara m site nʼesemokwu nke ndị m; i mere m onyeisi nke mba niile; ndị m na-amaghị bu ụzọ na-ejekwara m ozi ugbu a. Ngwa ngwa ha nụrụ banyere m, ha na-erube isi nye m; ndị ala ọzọ na-abịakwute m nʼụjọ. Ndị ala ọzọ na-ada mbà nʼobi ma jiri ịma jijiji pụta site nʼebe ha e wusiri ike.

Nna m dị ndụ! Ka a gọzie nkume m, ka e bulikwa Nna ahụ na-azọpụta m elu, Nna ahụ na-ekpere m ikpe ziri ezi ma na-eme ka mba niile nọdụ nʼokpuru m, onye napụtara m site nʼaka ndị iro m. E, i buliri m elu karịa ndị biliri imegide m; ị napụtara m site nʼaka nwoke na-eme ihe ike. Nʼihi nke a, aga m eto gị, Nna m, nʼetiti mba niile, aga m abụkwa abụ otuto nye aha gị.

Ọ na-enye eze ya mmeri ukwu, ma na-egosi ịhụnanya ọgbụgba ndụ nye onye ya e tere mmanụ, nye Devid na ụmụ ụmụ ya ruo mgbe ebighị ebi.