Mi eng' bukuit

Tyenwogigap Kalasunet 18 FHB Father's Heart Bible™

Kiistoi 15% eng' kiy ne iale korook →
Bukuit

Kwandanyo, Kimnateennyu

Agobo kondoindetap musik. Netap Daudi, otwogindetap Kwandanyo, ne ki tyenji Kwandanyo ng'aleechu eng' peetuut ne ki kisar eng' puunikyik tugul ak eng' eutap Saulo.

Kingo kisaru eng' Saulo, mwaei Daudi ng'olyoot komugul. Ki yiema poroonigap meet, ak ki ipu kaayanennyi Kwandanyi kochoorugitu eng' kipsengwet eng' usoonet ak nesek, si koisto ineendet eng' peek che loo ak konde eng' olooto ne po barak.

Sura 18.

Achamin, Kwandanyo, kimnateennyu. Kwandanyo ko rwandennyu ak irimennyu ak saruunindennyu; Kwandanyo, rwandennyu, ne amang'u, long'ennyu, ak kimnateetap yetunennyu, ole aung'egei. Aguure Kwandanyo, ne nyolu kilas, ak asaruunegei eng' puunikyuk.

Ki yiema poroonigap meet; ki oona maranosyegap yaityet. Ki yiema poroonigap meet anee; ak ki chea mestonogap Olemi Che ki kobek. Eng' nyalildanyu aguure Kwandanyo; aguurchi Kwandanyo ale toreto. Kogas kaayanennyu eng' koonnyi ne tiliil, ak koit riireennyu iitwekyik.

Ki potan ng'wony ak kirgiren; ki tumdumgei lumeiywegap tuloonook ak twagei, amu kinereech. Ki togosta iyeto eng' seruunekyik, ak maat ne peelso eng' kutinnyi; kilalyo nesek che lelach eng' ineendet. Ki ipcha kipsengwet ak kochoorugitu; ki mi mesundeito ne oo keelyekyik keel. Ki laany kerubindet ak kotiriren; ki took eng' kebebaigap usoonet. Ki yai emaisyek koek mesundeito, kayumetapkei ne mi komoswekyik tugul— peek che tuuen Eng' kaluunet ne ki mi tainnyi kotuch poolikyik, kobooto koigap ropta ak nesegap maat. Kitul Kwandanyo kora eng' kipsengwet, ak Ineendet Ne Toroor Miising' ko kitwek kaayanennyi, kobooto koigap ropta ak nesegap maat. Kimwokto kipchabonikyik ak koiyesta icheek; kigon kalyelosyek ak ki iseer icheek. Kigeer kereruusyegap nyanjet, ak eng' kereetap kong'ung', Kwandanyo, king'ang'agis lumeiywegap ng'wony, eng' cheetap kabuusetap seruunekuk.

Ki ritoi eung' eng' parak ak konam anee; ki isto anee eng' peek che eecheen. Ki isarwo eng' punyondennyu ne kimnateet, eng' icheek che wecho, amu ki kiimeen kosiiro. Kichea eng' peetuutap nyalildanyu, ago ki ek Kwandanyo ne atiegei. Ki imuta amanda komaswet ne paraa; kisarwo, amu ki paiboitu agobo anee.

Ki koono Kwandanyo ko uu imandanyu; kigochwo melekta ko uu tiliilindap eunekyuk. Amu kaariib ortinwegap Kwandanyo, ak ma kabagaakta Kwandanyo eng' sogornateet. Amu ki mi tainnyu kirwoogutikyik tugul, ak ma aistoegei kaneetisyosyekyik. Ki aek ne ma tinyei perutyet eng' tainnyi, ak ki ariipkei eng' yaityet. Ki koono anyun Kwandanyo ko uu imandanyu, ko uu tiliilindap eunekyuk eng' tainnyi.

Eng' che iman iboortoigei ile ii imanit; eng' che ma tinyei perutyet iboortoigei ile ii ma tinyei perutyet; Eng' chiito ne tiliil iboortoigei ile ii tiliil; ago eng' chiito ne mastaat iboortoigei ile ii ng'aaliin. Amu isaru piik che nyerootiin, ago koonyek che mendos iming'in icheek. Amu inyee ne ilalanjinwo taitanyu; ilaalji Kwandanyu ununnyu. Amu eng' amuuchi aiyestoi lugeet eng' inyee, ak eng' Kwandanyu atorombeni asiire irimeet.

Kwandanyu ko, ititaat ooreennyi; ki konaak ng'olyootap Kwandanyu; ko ineendet long'eetap piik tugul che unegei eng' ineendet. Amu ng'oo Kwandanyo ngo ma Kwandanyu? Ak ng'oo ne rwandet ngo ma Kwandanyo? Kwandanyu ko ne igoochin kimnateet, ak koyai ooreennyu koek ne ititaat. Yaei keelyekyuk koek che po kenyeleet; ak koyai atonon eng' komoswek che torooreen. Ineeti eunekyuk agobo lugeet, si koimuuch eunekyuk kong'i kwangeetap sugunwet. Ki igoono long'eetap saruuneng'ung'; atiegei eutap taing'ung', ak ki koeeta anee talasyeng'ung'. Iparaita tyegutikyuk bene anee, ak ma chabaita keelyekyuk.

Asup puunikyuk ak aoon icheek; ma awendegei kot kobata icheek. Abar icheek si ma kimuuch kong'eet; ki but icheek bene keelyekyuk. Ki igoochin kimnateet agobo lugeet; iyai che ng'eetyina kobut bene anee. Ki iwelel puunikyuk kotuktocha patai, ak che wecho ko ang'em icheek. Ki guuro toreteet, ago ma mi chii ne sar; ki guurchi Kwandanyu, ago ma kowolji icheek. Ki atonaton icheek komengegitu koigei temburyek ne po usoonet; ki aiyeste icheek ko uu ng'atateek che mi ortinwek. Ki isarwo eng' pooryosyegap piik; ki iyae anee aek metitap pororyosyek; piik che tomo anai ko boisyechinwo nguno. Ye kagas agobo anee, ko winjinwo; pegunoti toek ko nyoo anee koigei che kase iit. Pegunoti toek kowandogei, ak komong' eng' irimoikwak kobotandos.

Sabei Kwandanyu! Ingolasunoot rwandennyu, ak ingotororit Kwanda ne sarwo, Kwanda ne igoochin imanda ak ne konde pororyosyek bene anee, ineendet ne isarwo eng' puunikyuk. Ee, itoroora kosiir anee icheek che ng'eetyina; ak ki isarwo eng' chii ne koroom. Aweegun kongoi anyun, ee Kwandanyu, eng' pororyosyek; atyenjini kalasunet kaineng'ung'.

Konde laitoryandennyi saruunet che eecheen, ak koboorchin rireenet ineendet ne iilaat, Daudi ak logokyik, agoi koigeny.