Kü Bu, Kü Tashi

Kentenertem tanishir dang. Asen Tebu kilir Dawidi, pa tsükchir ajak nungi aser Saul ket nungi kümzükba anogo nung, asen Tebu dang iba otem ken aten.

Saul nungi pa kümzüka aruba tepiyong, Dawidi aji o ajak jembir. Tasüba lisüi pa meketbanger, aser pei olai pei Bu anüng nungi yima, tsüngmok aser rür lung den, aruadok; pai pa tzü telen nungi agitet aser tematiba tashikang nung yutet.

Chapter 18.

Kü Bu, kü tashi, ni na meimer. Kü Bu kü lung aser kü mitsa aser kü kümzükba lir; kü Bu, kü lung, shibai dak ni jenoka alir, kü jong, kü kümzük tashi, aser kü mitsa lir. Kü Bu, sangtsü tetemsüba dang ni jaa, anungji ni kü tsükchirtem nungi kümzüka lir.

Tasüba lisüi ni meketbang, aser tesamatsü tzükepraki ni aoksadaktsü. Sheol lisüi ni naibang, aser tasüba sangi ni noktang. Kü lendong nung ni kü Bu dang aja; kü Bu dang ni yaritsü asoshi jaa. Pa ki nungi pai kü ola angashi, aser pa dang kü arütsü o pa narong nung atu.

Idangji alima anokshi aser atenten; tenem tamentakdaktem atenten aser arakzü, kechiyong pa ain adok. Pa teni nungi mokozü lunga atu, aser pa tebang nungi temeyokba mi tugu; pa madaki mijang twangwang jangru. Pai anüng mokrema alu, aser pa tsüng bener mepet temelem liasü. Pai cherub ka nung asang aser yima ao; mopung tashikang manung pai yima angu. Pai ammang pa akhümbanga, pa meketa akhümbanga adenshia—ammang tzütem aser anüngtem mepet temelem yanglu. Pa madang sentsüprang nungi pa mepettemi sadanga adok, rür lung aser mijang den. Kü Bui anüng nung tsüngmok amok, aser tematibai pa ola adok, rür lung aser mijang den. Pai pei lijakjang yok, aser parnok prokshidaktsü; pai tsüngpret tsükloka parnok jenshidaktsü. Anungji tzüyim chanutem ngudaktsü, aser alima tamentakdaktem, ne arürtsüba agi, kü Bu, ne teni nungi apuoktsüba agi, moa kümdaktsü.

Temalen nungi alua pai kü dak sot; tzü tulu nungi pai ni agitet. Pai ni kü tsükchir tashi taitba nungi kümzük, kü sempartem nungi, kechiaser parnok ni asoshi tashi tulu liasü. Kü timtem anogo nung parnoki kü madak noktak, saka kü Bu kü yarir liasü. Tesadem tesem kati ni anir adok; pai ni kümzük, kechiaser pai kü dak pela.

Kü temeshiba yari kü Bui ni ajangzükdaktsü; aser kü teka merükba yari kü Bui kü nem meyip agütsü. Kechiaser ni kü Bu lenmangtem inyakogo, aser tamajung nung kü Bu dang nungi ni mepila. Kechiaser pa o bendang ajak kü nükdang liasü, aser pa telatet ozüng nungi ni mepila. Pa madang ni tetemjen liasü, aser tamajung nungi ni pila-a liasü. Anungji kü Bui kü temeshiba yari, pa nükdang kü teka merükba yari, ni meyipa agütsüogo.

Ochishiba dang nai ne sasa ochishir sayutsü; tetemjen dang nai ne sasa tetemjen sayutsü; Temerüker dang nai ne sasa temerük sayutsü, saka tekirak pur dang nai ne sasa togima sayutsü. Kechiaser nai ajemaluba nübur kümzüktsü, saka asükümer tenük nai ludaktsütsü. Kechiyong nai kü milen tsükloker; kü Bui kü ammang sangwadaktsü. Kechiyong na den ni temeranger telok anema akureptsütsü akok, aser kü Bu den ni jara manung jokdanga akok.

Kü Bu asoshibo, pa lenmang tabensa lir; kü Bu oji ochia lir; pa dang jenokba ajak asoshi pai jong ka lir. Kechiyong kü Bu masüra shir asen Tebu ali? Aser asen Tebu masüra shir lung ka ali? Kü Bu shibai tashi agi ni nangri kangtsü, aser kü lenmang kümzüka yanglutsü. Pai kü tsüng mesü tsüng küma yanglu, aser temalen tenem nung ni kümzüka yutsür. Pai tongbang asoshi kü teka sayuteter, aser kü tepeni yongmenyin lijak azüa arur. Ne tekümtet jong nai kü nem agütsüogo; ne tajichileni ni yarir, aser ne teyarii ni tulu kümdaktsü. Nai kü bener kü jenjang tesadem yanglu, anungji kü tsüng majudok.

Ni kü tsükchirtem aria oa parnok menep; aser parnok mesamatsü tashi ni tanaben memeyip. Ni parnok tepsetdaktsü, anungji parnok marameso; parnok kü tetsüng kübok laodaktsü. Tongbang asoshi nai tashi agi ni nangri kangtsü, nai kü anemertem kü tetsüng kübok laodaktsü. Nai kü tsükchirtem kü dangi terongdong tendaktsü, aser kü sempartem ni samatsü. Parnoki jaa, saka kümzüktsü shinga meli; parnoki kü Bu dang aja, saka pai parnok melangzü. Ni parnok mopung tsüngdang ali auyi küma menüngsa, aser yimdong nung lishi küma ni parnok tokshidaktsü. Nübur tsüngda raratepba nungi nai ni kümzük; nai ni kintem tekolaktsü yutsü; ni memetetba nübur kai ni tenzüktsü. Parnoki kü indang angashili-i, kü dang tashi angatsü; aenertemi kü madang hai-haura ka-a arutsü. Aenertemi temulung azüla-a aor, aser parnok sasa atentena pei mitsatem nungi adoktsü.

Kü Bu taküm lir! Kü lung temoatsü sangjang, aser ni kümzükba Tebu ulua kümdakjang, Tebu shibai ni asoshi temeden agütsür, aser kü bener nüburtem aitdaktsür, Shibai kü tsükchirtem nungi ni anitet. Hau, kü anemertem madak nai ni uludaktsü; aser tesashi nisung nungi nai ni kümzük. Anungji, Oba, kintem rongnung ni ne nüng asanger, aser ne tenüng indang ni ken atentsü.

Pei chuba nem pai takok tulu agütsütsü, aser pei mezüja shimtetba dang, oda Dawid dang aser pa metsü dang teti asoshi, temeim yimlibilem sayur.