Tai Makaba Sarasademba

Dawid sarasademba.

Dawidi tekülak maliba nisung ka ama pei o bendangtsü ayimtendang, pei mulung aya nung bushia aser pei tetsüng oa madok. Mita nung atsüka aliba molusongzü ka ariba, pai tenük metoklashi ama anüktsü ayimtendang, aser pei tsükchirtem akanga pei Bu dang angutsü yongya.

Chapter 17.

Oh Oba, ochishiba tepu angangma; kü ayimten angangma; tekülak maliba tebang nungi kü sarasademba angangma. Ne tsüngdang nungi kü obendang adokang; ne tenüki shitakba angutsü sang.

Nai kü mulung bushiogo, aonung nai ni reprangogo, nai ni tendang kecha manguogo; kü bang temenen meinyaktsü ta ni mulungtetogo. Nisung mapatem indang, ne bang o agi ni tesashi nisung lenmang nungi pila liogo. Kü tsüng ne lenmang dak akanga sotogo; kü tetsüng oa madok.

Ni ne dang ajar, kechiaser nai kü dang langzütsü, Oh Oba; kü dang angangma; kü o angangma. Ne temeim yimlibilem sayatenya sayuangma, nai ne teka tajichi agi parnok tsükchirtem ket nungi ne dak jenoktsü kümzüker. Ne tenük metoklashi ama ni nükangma; ne tashikang akhüm kübok ni miimangma, ni anema aruba tamajunger ket nungi, ni meketbangba kü tasüba tsükchirtem ket nungi.

Parnoki pei mulung merangba shibangogo; parnok bang agi asüküm o jembir. Parnoki asenok bushia menepogo, aser tang asenok meketbanger; asenok ali nung tsükdaktsü asoshi parnoki pei tenük akhümtsübu. Pa pei shiruru shisatsü asoshi ayaba molusongzü ama lir, mita nung atsüka aliba molusongzü pungtu ama.

Aramesoang, Oh Oba! Pa ajuruteptang, pa apudakang! Ne nok agi tamajunger ket nungi kü taküm kümzükangma, Oh Oba, ne ket agi, pei tajangzük iba taküm nung aliba iba alima kasa nisung nungi kü kümzükangma. Nai ne terizüngdak agi parnok tepok süngdaktsür; parnok chirtem teperi angur, aser parnoki pei rongsen parnok tilatem dang anüng toktsü.

Ni nembo, temeshiba nung ni ne tejak angutsü; ni awakdir, ne mesük ngua ni tipatemtsü.