Àdúrà Ẹni Aláìjẹ̀bi
Àdúrà ti Dafidi.
Dafidi béèrè pé kí a gbọ́ tòun gẹ́gẹ́ bí aláìṣẹ̀, tí a ti yẹ ọkàn rẹ̀ wò ní òru, tí ẹsẹ̀ rẹ̀ kò sì yọ̀. Bí kìnnìún tí ó ba ní ibùba ti ń dọdẹ rẹ̀, ó béèrè pé kí a pa òun mọ́ bí ẹyinjú, ó sì wo ré kọjá àwọn ọ̀tá rẹ̀ sí rírí ojú Baba rẹ̀.
17 1Gbọ́ ẹjọ́ òdodo, Baba mi; dẹtí sí igbe mi; fetí sí àdúrà mi láti ètè tí kò ní ẹ̀tàn wá. 2Jẹ́ kí ìdáláre mi ti iwájú rẹ wá; jẹ́ kí ojú rẹ rí ohun tí ó tọ́.
3Ìwọ ti wádìí ọkàn mi, ìwọ ti yẹ̀ mí wò ní òru, ìwọ ti dán mi wò, ìwọ kò sì rí ohunkóhun; mo ti pinnu pé ẹnu mi kì yóò dẹ́ṣẹ̀. 4Ní ti ìṣe àwọn ènìyàn, nípa ọ̀rọ̀ ètè rẹ mo ti pa ara mi mọ́ kúrò ní ọ̀nà àwọn oníwà ipá. 5Ìgbésẹ̀ mi ti rọ̀ mọ́ ọ̀nà rẹ ṣinṣin; ẹsẹ̀ mi kò sì yẹ̀.
6Mo ké pè ọ́, nítorí ìwọ yóò dá mi lóhùn, Baba mi; dẹtí sí mi; gbọ́ ọ̀rọ̀ mi. 7Fi ìyanu ìfẹ́ májẹ̀mú rẹ hàn, ìwọ tí ń fi ọwọ́ ọ̀tún rẹ gba àwọn tí ń sá di ọ́ kúrò lọ́wọ́ àwọn ọ̀tá wọn là. 8Pa mí mọ́ bí ọmọ ojú rẹ; fi mí pamọ́ sábẹ́ òjìji ìyẹ́ apá rẹ, 9kúrò lọ́wọ́ àwọn ènìyàn búburú tí ń kọlù mí, àwọn ọ̀tá apani mi tí wọ́n yí mi ká.
10Wọ́n ti sé ọkàn líle wọn pa; ẹnu wọn ń sọ̀rọ̀ pẹ̀lú ìgbéraga. 11Wọ́n ti tọ̀ wá wá, wọ́n sì ti yí wa ká nísinsìnyí; wọ́n tẹ ojú wọn mọ́ wa láti gbé wa ṣánlẹ̀. 12Ó dàbí kìnnìún tí ebi ń pa láti fàya ohun ọdẹ rẹ̀, bí ọmọ kìnnìún tí ó ba ní ibùba.
13Dìde, Baba mi! Dojú kọ ọ́, rẹ̀ ẹ́ sílẹ̀! Gba ẹ̀mí mi là lọ́wọ́ ènìyàn búburú pẹ̀lú idà rẹ, 14pẹ̀lú ọwọ́ rẹ, Baba mi, kúrò lọ́wọ́ irú àwọn ènìyàn bẹ́ẹ̀—kúrò lọ́wọ́ àwọn ènìyàn ayé yìí ẹni tí èrè wọn wà ní ayé yìí. Ìwọ fi ohun tí ìwọ ti kó pamọ́ kún inú wọn; àwọn ọmọ wọn ní ọ̀pọ̀lọpọ̀, wọ́n sì fi ọ̀pọ̀ ohun ìní wọn sílẹ̀ fún àwọn ọmọ kékeré wọn.
15Ní ti èmi, èmi yóò rí ojú rẹ nínú òdodo; nígbà tí mo bá jí, yóò tẹ́ mi lọ́rùn láti rí àwòrán rẹ.
