መዝሙር 17

17 ¹አባቴ ሆይ፤ ጽድቅን ስማ፤ ጩኸቴን አድምጥ፤ ተንኰል ከሌለበት ከንፈር የሚወጣውን ጸሎቴን አድምጥ። ²ፍርዴ ከፊትህ ይምጣ፤ ዓይኖችህም ቅኑን ይመልከቱ።

³ልቤን መረመርህ፤ በሌሊት ጐበኘኸኝ፤ ፈትነኸኝ ምንም አላገኘህብኝም፤ አፌ ኀጢአት እንዳይሠራ ቈርጫለሁ። ⁴የሰዎችን ሥራ በተመለከተ፣ በከንፈሮችህ ቃል ከጨካኞች መንገድ ራሴን ጠብቄአለሁ። ⁵ዕርምጃዬ በመንገዶችህ ጸንቷል፤ እግሮቼም አልተንሸራተቱም።

⁶እጠራሃለሁ፣ አንተ ትመልሰኛለህና፤ አባቴ ሆይ፤ አድምጠኝ፤ ቃሌን ስማ። ⁷ድንቅ ምሕረትህን አሳይ፤ በአንተ የሚጠለሉትን ከጠላቶቻቸው በቀኝ እጅህ የምታድን ሆይ። ⁸እንደ ዓይንህ ብሌን ጠብቀኝ፤ በክንፎችህ ጥላ ሥር ሰውረኝ፤ ⁹ከሚያጠቁኝ ክፉዎች፣ ከከበቡኝ ገዳይ ጠላቶቼ ሰውረኝ።

¹⁰የደነደነ ልባቸውን ዘግተዋል፤ አፋቸውም በትዕቢት ይናገራል። ¹¹ተከታትለው አግኝተውናል፤ አሁንም ከበውናል፤ መሬት ላይ ሊጥሉን ዓይናቸውን ተክለዋል። ¹²ሲሳዩን ለመቅደድ እንደተራበ አንበሳ፣ አድብቶ እንደሚጠብቅ የአንበሳ ደቦል ነው።

¹³አባቴ ሆይ፤ ተነሥ! ተጋፈጠው፣ ጣለው! ነፍሴን ከክፉው በሰይፍህ አድን፤ ¹⁴አባቴ ሆይ፤ በእጅህ ከእንደነዚህ ካሉ ሰዎች አድነኝ፤ ዕድል ፈንታቸው በዚህ ሕይወት ካለው ከዚህ ዓለም ሰዎች። ባከማቸኸው ነገር ሆዳቸውን ትሞላለህ፤ ልጆቻቸው ይጠግባሉ፤ ትርፋቸውንም ለታናናሽ ልጆቻቸው ያስቀራሉ።

¹⁵እኔ ግን በጽድቅ ፊትህን አያለሁ፤ ከእንቅልፌ ስነቃ፣ አምሳልህን በማየት እረካለሁ።